დღეს, თბილისის საქალაქო სასამართლოს მოსამართლე გიორგი არევაძემ სოსო ჩიქობავას მკვლელობაში ბრალდებულ ნიკოლოზ (ვაჟა) ხუბაშვილს, აღკმკვეთ ღონისძიებად პატიმრობა შეუფარდა. მას ბრალი სისხლის სამართლის კოდექსის 108-ე და 235 მუხლით ედება.
ბრალმდებელმა პროკოფ ჭანკოტაძემ სასამართლოში განაცხადა, რომ ხუბაშვილს ბრალი განზრახ მკვლელობაში სისხლის სამართლის 108-ე მუხლით ედება, რაც 7–დან 15 წლამდე პატიმრობას ითვალისწინებს. ასევე ბრალად ედება ცეცხლსასროლი იარაღის მართლსაწინააღმდეგო ტარებაში, რომელიც 5 წლამდე თავისუფლების აღკვეთას ითვალისწინებს. იგი პოლიციაში ბრალის აღიარებით გამოცხადდა. საქმეში არსებობს მტკიცებულება, მოწმეთა ჩვენებები, ბრალდებულს აღიარება. აღიარების დროს თან ჰქონდა ცეცხლსასროლი იარაღი, რომელსაც ჩაუტარდა ბალისტიკური ექსპერტიზა. ასევე გვამიდან ამოღებულია ტყვიის მასრები.
პროკურორის თქმით, ნიკოლოზ ხუბაშვილმა ჩაიდინა განსაკუთრებით სასტიკი დანაშაული და აღმკვეთ ღონისძიებად პატიმრობა მოითხოვა.
ბრალდებულის ადვოკატები: ნაირა ოტიაშვილი და ნიკა ლომიძე არ დაეთანხმნენ ბრალდების შუამდგომლობას აღმკვეთ ღონისძიებად პატიმრობის შეფარდებასთან დაკავშირებით და განცხადეს, რომ რადგან ხუბაშვილი ბრალის აღიარებით გამოცხადდა, წარადგინა დანაშაულის იარაღი, ის გამოძიებას არ აარიდებდა და თავს.
_ მე კარგად მესმის რომ ჩადენილია მძიმე დანაშაული. საქმის მასალები და გარემოებები იძლევა იმის საფუძველს, რომ არ იქნას გამოყენებული პატიმრობა. იგი დანაშაულის ჩადენას რომ აპირებდეს, არ გამოცხადდებოდა. თუ დაპატიმრება იქნება გამოყენებული, მზად ვართ ვითანამშრომლოთ გამოძიებასთან, _ განაცხადა ადვოკატმა.
მისი თქმით, ხუბაშვილი სოსო ჩიქობავასთან სრულიად ცივილიზებული ფორმით მივიდა და ჰკითხა: შენ ხომ არ მოგიცია თანხა? _ რასაც სოსო ჩიქობავასგან მოჰყვა ცინიკური დამოკიდებულება. ძალიან გაამწარა ოჯახი, სულაც არ მინდა გარდაცვლილზე ამის თქმა, თუ როგორ ცდილობდა ჩიქობავა თაღლითური გზით თანხის მითვისებას.
_ ეს ადამიანი არის ოჯახის კაცი. ჰყავს ცოლი და ორი შვილი, რომელიც ემსახურება საქართველოს. მიუხედავად იმისა, რომ კარგად მესმის ჩადენილი დანაშაულის სიმძიმე, არ ვეთანხმები პატიმრობას და მის მიმართ გამოყენებულ იქნას გირაო, 2000 ლარის ოდნობით.
გირაოს სახით 2000 ლარის შეფარდებას მეორე ადვოკატიც დაეთანხმა.
მოსამართლის კითხვაზე, _ ეთანხმებოდა თუ არა ხუბაშვილი ადვოკატების შუამდგომლობას, იცნობდა თუ არა სოსო ჩიქობავას ოჯახს, ჰქონდა თუ არა ოჯახთან რაიმე სახის კონფლიქტი, ბრალდებულმა განაცხადა:
_ როგორ არ ვიცნობ, ჩემს სახლში 10 წელი ცხოვრობდნენ. რაც გავასახლე, მის შემდეგ არ მინახია ნინო შონია (სოსო ჩიქობავას მეუღლე.ავტ.) კონფლიქტი არ მქონია.
პროკურორმა ამის შემდეგ, სასამართლოს მიმართა და ყურადღება ადვოკატებისა და ბრალდებულის საპირისპირო ჩვენებებზე გაამახვილა:
_ ვერ დავეთანხმები მათ აზრს 2000 ლარის გაირაოს შეფარდებასთან დაკავშირებით. ბრალდებულმა საერთოდ უარყო ოჯახთან კონფლიქტის შესახებ. ადვოკატებმა კი მიანიშნეს, რომ ჩიქობავას და მას შორის ერთ-ერთ საქმესთან დაკავშირებით არის დავადა. დანაშაულის ფაქტი ჩადენილია კონფლიქტიდან გამომდინარე, _ განაცხადა პროკურორმა.
გამოძიებამ წარმოადგინა მტკიცებულება, „მაკაროვის“ სისტემის ცეცხლსასროლი იარაღი, რომელიც რეგისტრირებული იყო 9 ძმის ქუჩა # 81 და შენახვის უფლება ჰქონდა ხუბაშვილს. მას კი იარაღი შენახული ჰქონდა ვერცხლის ქუჩაზე. იარაღის რეგისტრაციის დროს ხდება ბალისტიკა. ამოღებული 6 მასრიდან ემთხვევა წარმოდგენილ იარაღს. ასევე, ბრალდებული ხუბაშვილი პოლიციაში გამოცხადდა დანაშაულის ჩადენიდან რამდენიმე საათში. მის მიერ წარმოდგენილ „მაკაროვის“ მოცემულ იარაღს ეტყობა კვალი – დამრტყმელი აქვს შეცვლილი.
პროკურორის კითხვაზე, _ დამრტყმელი რომ შეცვალეთ, აცნობეთ თუ არა სამართალდამცავ ორგანოებს? _ ნიკოლოზ ხუბაშვილმა უპასუხა_ „სახლში მაქვს, მაგრამ იმ გაგებით კი არ შევცვალე… ორგანოებისთვის თუ უნდა მიმემართა, ამდენი არ ვიცოდი. სახლში მაქვს „შესტიგრანკა“ ცელოფნის პარკში დევს“.
მოსამართლე არევაძემ ხუბაშვილს განუმარტა, რომ როდესაც ცეცხლსასროლი იარაღის დარეგისტრირება ხდება, იქვე განმარტავენ, რა შეიძლება და რა იკრძალება.
ნიკოლოზ ხუბაშვილის განმარტებით, იგი 9 ძმის უქჩა #81–ში ცხოვრობს, ამჟამად უმუშევარია, არის ექსპერტი და მეუღლეს ეხმარება. აგრეთვე აქვს ვერცხლის ქუჩაზე საცხოვრებელი სახლი და არ არის ნასამართლევი.
ნიკოლოზ ხუბაშვილს სასმართლოზე არ უთქვამს, რომ იგი ინანიებს ჩადენილ დანაშაულს.
როგორც “გურია ნიუსისთვის” გახდა ცნობილი, პოლიციას, რომელმაც ხუბაშვილის საცხოვრებელ სახლში 9 ძმის ქ#81 ჩხრეკა ჩაატარა, ცელოფნის პარკში ჩადებული “შესტიგრანკა” არ აღმოუჩენია. სავარაუდოდ, “შესტიგრანკა” რომელზეც ხუბაშვილმა სასამართლოზე განაცხადა, ვერცხლის ქუჩაზე ინახება, თუმცა ამ დრომდე, ხუბაშვილის საცხოვრებელ სახლში ჩხრეკა არ ჩატარებულა.
