პირველ ორ შემთხვევაში, პროცესის გადადების მიზეზი სასამართლოში ბრალდების მოწმეების გამოუცხადებლობა იყო. 26 ნოემბერს, მოსამართლემ პროკურატურა მკაცრად გააფრთხილა, რომ საქმის გაჭიანურებას აღარ დაუშვებდა და მოწმეების მოყვანა დაავალა.
მოწმეების ნაცვლად, დღევანდელ პროცესზე სულ სხვა პროკურორი გამოცხადდა _ ლევან ძნელაძემ მოსამართლეს საქმის გადადება სთხოვა. მისი განმარტებით, ჩატაევის საქმე მას გუშინ დაეწერა და შესაბამისად, მასალებს არ იცნობს.
უცნაური დამთხვევაა, რომ საბადრაგო სამსახურმა დღეს არც პატიმარი მიიყვანა სასამართლოში. მოსამართლის განმარტებით, ის სხდომაზე პატიმარს ელოდა, რადგან გლდანის მე-8 დაწესებულების საბადრაგო სამსახურს შესაბამისი მოთხოვნა გადაუგზავნა. პროცესზე განმარტეს, რომ ჩატაევი წარმოუდგენლობის მიზეზი მისი მე-18 სამკურნალო დაწესებულებაში გადაყვანაა, თუმცა, განსასჯელის ნათესავებს და მეგობრებს ამ ვერსიის არ სჯერათ. ისინი ფიქრობენ, რომ ხელისუფლებას ჩატაევის გათავისუფლება არ სურს და განზრახ აჭიანურებს საქმის განხილვას: “როგორც ჩანს, არავის ადარდებს მისი ჯანმრთლეობის მდგომარეობა. ამ ადამიანისთვის თითოეულ დღეს აქვს მნიშვნელობა, პროკურორი კი საქმის განხილვას განზრახ აჭიანურებს. დიდი იმედი გვქონდა ახალი პროკურატურის და დარწმუნებულები ვიყავით, რომ ჩატაევის საკითხი სამართლიანად გადაწყდებოდა უმოკლეს ვადებში. ძალიან გაოცებულები ვართ იმ პროცესებით, რაც ხდება, ბოლოსდაბოლოს, ადამიანია და ხომ არ შეიძლება საქართველოს ხელისუფლებამ ხელ-ფეხმოჭრილი კაცი საკუთარი ინტერესებისთვის გამოიყენოს?” _ აცხადებს ახმედ ჩატაევის ნათესავი აიუბ ბორჩაშვილი “გურია ნიუსთან” საუბარში.
“ცალხელა ახმედას” გირაოს სანაცვლოდ გათავისუფლება ჩატაევის ადვოკატებმა 1 თვის წინ მოითხოვეს. ბრალდების მოწმეების მიერ ჩვენების შეცვლის შემდეგ გაჩნდა მოლოდინი, რომ პატიმარს მალე გაათავისუფლებდნენ.
ორი დღის წინ იუსტიციის მინისტრმა თეა წულუკიანმა განაცხადა, რომ ჩატაევის რუსეთში ექსტრადიცია არ განიხილება, თუმცა, მისი გათავისუფლება ამ ეტაპზე მიზანშეწონილად არ მიაჩნია.
მინისტრის ეს განცხადება ჩატაევის გულშემატკივრებს პროკურატურაზე პირდაპირ ზეწოლად მიაჩნიათ. ისინი ფიქრობენ, რომ საქმის გაჭიანურება, შესაძლოა, ლოპოტას სპეცოპერაციასთნ დაკავშირებულ საქმის უკავშირდება, სადაც, როგორც ცნობილია, უკვე დაიკითხა ჩატაევი და ის სამი მესაზღვრეც, რომლებიც ამ საქმეში ბრალდების ძირითადი მოწმეები არიან. როგორც ჩატაევის ადვოკატ ნინო ანდრიაშვილისთვის არის ცნობილი, მესაზღვრეებმა კვლავ დაადასტურეს რომ ჩხრეკის ოქმზე ხელი იძულებით მოაწერინეს და ჩატაევი სინამდვილეში უიარაღოდ იყო.
ჩატაევის საქმის განხილვა 6 დეკემბერს გაგრძელდება. სავარაუდოდ, ამ დროისთვის გახდება ცნობილი წაუყენეს თუ არა მას დამატებითი ბრალი ლაფანყურის სპეცოპერაციასთან დაკავშირებით.
