თუმცა, ანტონ ბარამიძე “გურია ნიუსთან” საუბარში აცხადებს, რომ ბრძანება მის ამ თანამდებობაზე დანიშვნასთან დაკავშირებით, დღეს ან ხვალ დაიწერება.
_ ჯერ არ ვარ ოფიციალურად დანიშნული, ბრძანება დღეს ან ხვალ დაიწერება, _ ამბობს “გურია ნიუსთან” ანტონ ბარამიძე.
_ ბატონო ანტონ, ვისი რეკომენდაციით დაინიშნეთ?
-როგორ გითხრათ. ამ პოსტზე ნიშნავს სამეთვალყურეო საბჭო.
_თქვენი აზრით, თქვენი საქმიანობა გურიის საგადასახადო სამსახურში, დადებითად შეიძლება შეფასდეს?
_ ეს საზოგადოებამ უნდა შეაფასოს, შეგიძლიათ, მეწარმეებს ჰკითხოთ ჩემი საქმიანობის შესახებ.
როგორ გითხრათ, ჩემს თავზე მე ვერ ვისაუბრებ, – გვითხრა ბარამიძემ.
ანტონ ბარამიძე, ათი წელია, რაც გურიაში საგადასახადო სამსახურში სხვადასხვა თანამდებობაზე მუშაობდა.
ანტონ ბარამიძის საქმიანობას ამ სისტემაში ბევრი სკანდალური ფაქტი უკავშირდება.
გურიის საგადასახადო ინსპექცია 2008 წლის საპარლამენტო არჩევნებამდე შეიქმნა და მის ჩამოყალიბებას მხარი გურიის მაშინდელმა გუბერნატორმა რამაზ ნიკოლაიშვილმა დაუჭირა. გაერთიანებულ სამსახურს, რომელშიც გურიასთან ერთად, სამეგრელოც არის გაერთიანებული, ანტონ ბარამიძე დღემდე ედგა სათავეში. რამდენიმე წელი გურია ფოთს ექვემდებარებოდა, მაგრამ რამაზ ნიკოლაიშვილის გურიის გუბერნატორად დანიშვნისთანავე, საგადასახადო სამსახური გურიაში დამოუკიდებლად დაფუძნდა.
ბოლოს მას ზემონახსენები ანტონ ბარამიძე თავკაცობდა. 2009 წელს ბარამიძემ ალეკო ბაქანიძე შეცვალა, რომელმაც თანამდებობა დიდი სკანდალის შემდეგ დატოვა _ გურიის საგადასახადოს სამი თანამშრომელი დააკავეს და მათ ბრალი მეწარმესთან გარიგებაში დადეს. მალე ისინი საპროცესო შეთანხმებით და 5 ათასი ლარის გადახდის შემდეგ გაათავისუფლეს. თუმცა, როგორც ირკვევა, სამივე მათგანი ტყუილად დაიჭირეს და “ჯარიმა, რომელიც მეწარმეს მათ თხოვნის გამო არ გამოუწერეს”, რეალურად არ არსებობდა!
მოკლედ, მაშინ ინსპექტორები ტყუილად გაწირეს და მათ “ნაციონალების” მიერ ისედაც “გაკულაკებული” ბიზნესმენი კორნელი კუკულაძე გააწირვინეს. ამ ამბით ყველაზე მეტად სწორედ ბარამიძემ იხეირა _ მან ბაქანიძის თანამდებობაც დაიკავა და როგორც ბიზნესმენი კორნელი კუკულაძე ამბობს, მის საბოლოოდ გაკოტრებაში დიდი წვლილი სწორედ საგადასახადოს უფროსმა ანტონ ბარამიძემ და მისმა “რჩევებმა” შეიტანეს.
ერთ-ერთი დაზარალებული, ასევე საგადასახადო პოლიტიკის მსხვერპლი, 60 წლის ვეტერანი მურთაზ აბაშიძე დღემდე უჩივის ანტონ ბარამიძეს.
“გურია ნიუსი” ყოფილი ინდ.მეწარმის მურთაზ აბაშიძის დაჯარიმებასთან დაკავშირებით, ანტონ ბარამიძის მიერ გამოცემულ უკანონო ადმინისტრაციულ აქტებს საზოგადოებას შეახსენებს:
1. ანტონ ბარამიძის მიერ გამოცემული აქტის მიხედვით, მ.აბაშიძე დააჯარიმეს “სამართალდარღვევიდან” 7 წლის შემდეგ. ( “სამართალდარღვევა” დაფიქსირებულია 2002 წელს და ადმინისტრაციული აქტი გამოიცა 2009 წელს ბარამიძის მიერ). მაშინ, როცა კანონის მიხედვით, ექვსწლიანი ხანდაზმულობის საგადასახადო „სამართლადდარღვევა“ არც კი განიხილება.
2. 2002 წელს ჩადენილი „სამართალდაღვევვები“ პრეზიდენტის 2004 წლის ბრძანებით, ამნისტირებული იყო.
3. მურთაზ აბაშიძე იყო და არის ომის ვეტერანი და ამის საფუძველზე გათავისუფლებული იყო საშემოსავლო გადასახადისგან. ამ ფაქტის გაუთვალისწინებლად დააჯარამა ანტონ ბარამიძემ მურთაზ აბაშიძე.
4. მ. აბაშიძეს საგადასახდო სამართალდარღვევასთან დაკავშირებით, არ გაგზავნია „საგადსახადო მოთხოვნა“, თუმცა, ანტონ ბარამიძის „კანტორა“ ორი წელი ამტკიცებდა, რომ ეს დოკუმენტი ჩააბარა მ. აბაშიძეს.
სასამართლოს მიერ დადგენილი იქნა, რომ ეს საგადასახადო მოთხოვნა მ.აბაშიძეს არა თუ არ ჩაბარდა, იგი საგადასადახო ორგანოს საერთოდ არ გამოუცია.
აღსანიშნავია, რომ როგორც ჩვენი წყაროები ამტკიცებენ, მ.აბაშიძის სკანდალურ საგადსახადო პოლიტიკას, ასევე “ნაციონალური” პოლიტიკური ელფერი დაჰკრავდა.
