საქმე იმაშია, რომ 28 ნოემბერს, შსს კრიმინალური დეპარტამენტის თანამშრომლებმა საკუთარი სიდედრის მკვლელობაში ბრალდებული ელგუჯა კ. დააკავეს. მან 15 წლის წინ ჩადენილი მკვლელობა აღიარა და სამართალამცავებს, მის მიერ ჩაბეტონებული გვამის ადგილსამყოფელიც მიუთითა.
“სიდედრთან დაძაბული ურთიერთობა მქონდა და ერთხელაც გადავწყვიტე, რომ ბალიშით გამეგუდა. გავგუდე, გვამი გავიტანე სხვა ოთახში, ამოვთხარე მიწა და ჩავასვენე,” _ განაცხადა ბრალდებულმა აღიარებით ჩვენებაში. 70 წლის ნაზი ჯ.-ს გვამი ელგუჯა კ.-მ ცოლის დახმარებით ლეიბის პირში გაახვია და თავის დროებით საცხოვრებელ ოთახში ჩამარხა. კვალის დასაფარად ცოლ-ქმარმა აღნიშნულ ადგილზე სველი წერტილი მოაწყო.
გამოძიების ვერსიით, მკვლელობის მოტივი ბინის დაუფლება იყო. მკვლელობიდან ცოტა ხანში, ელგუჯა კ-მ პოლიციას სიდედრის გაუჩინარების შესახებ აცნობა, 2003 წელს კი სასამართლოს გარდაცვლილად აცნობინა. ამის შემდეგ, მან უპრობლემოდ გადაიფორმა სიდედრის ბინა და გაყიდა.
არსებული ინფორმაციით, დაკავებამდე ელგუჯა კ. თავს არიდებდა ნებისმიერი პირადობის დამადასტურებელი დოკუმენტის აღებას, შემდგომში მისი პიროვნების იდენტიფიცირებისა და დანაშაულში მხილების თავიდან აცილების მიზნით.
ელგუჯა კ.-ს მიმართ საქმე სსსკ 108-ე მუხლით აღიძრა, რაც 10-დან 15- წლამდე პატიმრობას ითვალისწინებს.
შს სამინისტროს მიერ გავრცელებულ ვიდეო კადრებში, რომელიც გვამის აღმოჩენას და მისი დაზიანებული თავის ქალის დათვალიერებას ასახავს, რატომღაც ექსპერტების ხმამაღალი სიცილი ისმის. უცნაურია, რომ პრესსამსახურს ეს დეტალი გამოეპარა.
იხილეთ ვიდეო http://police.ge/index.php?m=8&newsid=3631. სიცილი ისმის 42-ე წამზე
