ნიკოლოზ ჭეჟიამ ჩვენთან ამ ფაქტან დაკავშირებით კომენტარი არ გააკეთა და პრესსამსახურთან გადაგვამისამართა. პრესსამსახურს ვერ დავუკავშირდით, რადგან ჩვენს სატელეფონო ზარს არ უპასუხა.
ინფორმაციის გადასამოწმებლად “ალდაგი ბისიაის” პრესსამსახურის ხელმძღვანელს მაია ივჩენკოს დავუკავშირდით, რომელმაც განაცხადა, რომ აღნიშნულ ფაქტთან დაკავშირებით ინფორმაციას არ ფლობს და ისევ “ჩემი ოჯახის კლინიკის” პრესსამსახურთან გადაგვამისამართეს, რომელსაც ვერც ამჯერად დავუკავშირდით.
“გურია ნიუსი” გენერალურ პროკურატურასაც დაუკავშირდა იმის გასარკვევად, თუ რა ფაქტზე იქნა საქმე აღძრული და რის გამო დაიბარეს აღნიშნული პირები. როგორც გენერალური პროკურატურის პრესსამსახურმა გაგვიცხადა, უახლოეს საათებში გაგვიკეთებენ ოფიციალურ განმარტებას.
გარდა მენეჯერისა და იურისტისა, პროკურატურაში ის გათავისუფლებული მედპერსონალიც დაიბარეს, რომლებსაც სამედიცინო ცენტრის ხელმძღვანელობამ რეზერვისტობა და კვირაში ერთხელ სიარული შესთავაზა და ისიც იმ პირობით, თუკი ექიმები თანახმა იქნებოდნენ მათთვის პროცენტი გაეყოთ. ერთ-ერთი მათგანი, “გურია ნიუსთან” დეტალურად საუბრობს იმ საკითხებზხე, რითიც პროკურატურა დაინტერესდა.
_ ძირითადად აინტერესებდათ, რის საფუძველზე ვიყავით გათავისუფლებულები და ჩვენი პროტესტის შემდეგ, რის საფუძველზე დაგვაბრუნეს საავადმყოფოში ის 34 გათავისუფლებული თანამშრომელი.
ჩვენ ავუხსენით, რომ ამას არ ჰქვია დაბრუნება, რადგან რეზერვისტებად ჩაგვსვეს და მენეჯერმა შემოგვთავაზა ასეთი რამ: თქვენ სამსახურში მოხვალთ კვირაში ერთ დღეს და იქნებით პროცენტულ გამომუშავებაზე, ისიც იმ შემთხვევაში, თუ ექიმი გაგიყოფს პროცენტს. წინააღმდეგ შემთხვევაში, იქნება შემცირება და არა დაბრუნება.
მე განვუცხადე პროკურორს, რომ ეს ჩვენ არ გვაწყობს, რადგან მოხდა პაციენტების გადინება სხვადასხვა კლინიკებსა და სტაციონარებში. ამიტომ, ამ ფონზე პირველადი ჯანდაცვის შემცირება ჩვენთვის მიუღებელია. ჩვენ ვითხოვთ იგივე ხელფასს, რადგან ეს პროცენტული ანაზღაურება ელემენტარულ საარსებო მინიმუმს არ აკმაყოფილებს.
_ თქვენ დაახლოებით თუ გაქვთ დაანგარიშებული, რამდენს შეადგენს პროცენტული ანაზღაურება, რასაც გთავაზობენ?
_ დიახ, დაანგარიშებული გვაქვს. 100 ლარი არ გამოსდის ექიმს და ჩვენ დაახლოებით 30 ლარი გამოგვდის. ამას ჩვენ არ დავთანხმდებით.
_ გარდა ხელფასისა, პროკურატურაში იყო თუ არა საუბარი იმ პირობებზე, რაზეც თქვენს საჩივარში წერდით?
_ დიახ, იყო საუბარი მაგაზეც, რაზეც პრ0კურატურამ განაცხადა, რომ ამ საკითხების დეტალურად გაშიფვრა და გადაგზავნა მოხდება სასამართლოში.
შეგახსენებთ, რომ ზუსტად ერთი თვის წინ, 2 ნოემბერს, საქართველოს მთავარ პროკურორს, არჩილ კბილაშვილს; პარლამენტის ჯანდაცვის კომიტეტის თავმჯდომარეს დიმიტრი ხუნდაძეს; შრომის, ჯანმრთელობისა და სოციალური დაცვის მინისტრს დავით სერგეენკოს; “ქართული ოცნება – დემოკრატიული საქართველოს” ადამიანის უფლებათა დაცვის კომიტეტის თავმჯდომარეს თედო კობახიძეს შპს “უნიმედი აჭარა ქობულეთის სამედიცინო ცენტრის“ შრომითმა კოლექტივმა საჩივრით მიმართა.
„წინასაარჩევნო პერიოდში “ალდაგი ბისიაიმ” გადაწყვიტა შეემცირებინა ტარიფები და სექტემბრის თვეში კონსულტაცია გახდა 10 ლარი, ამჟამად კი ეს მომსახურება 25 ლარს შეადგენს, 400-ლარიანი მშობიარობა გახდა 600 ლარი; 290-ლარიანი რეანიმაცია _ 450 ლარი. ერთი ღამის საფასური სამკურნალოდ შემოსული პაციენტებისთვის, თანაც ყოველგვარი პირობების გარეშე, 100-ლარი ღირს. კლინიკაში არსებულმა ფასების შეცვლამ მოსახლეობაში გამოიწვია უკმაყოფილება და მათი რაოდენობა მნიშვნელოვნად შემცირდა. გარდა ამისა, გაზრდილი ფასების გამო, პაციენტების მხრიდან არაერთხელ ჰქონია ადგილი ექიმების სიტყვიერ შეურაცხყოფას.
მომატებულ ფასებთან შედარებით, კატასტროფულად გამოიყურება ექიმების ხელფასები, რადგანაც ქობულეთელი ექიმების საშუალო ხელფასი საარსებო მინიმუმზე დაბალია (100-იდან 120 ლარამდე მერყეობს).
სიტუაციის შესასწავლად, დაახლობით ერთი კვირის წინ ჩამოსული იყო ვინმე ვანო ბოკერია, რომელიც წარსდგა, როგორც “ალდაგი ბისიაის” წარმომადგენელი, მან კლინიკის დათვალიერების შემდეგ გამოხატა აღშფოთება არსებული პირობების გამო და განგვიცხადა, რომ ექიმებს ანაზღაურება ექნებათ გამომუშავების შესაბამისად. აღნიშნულ განცხადებას ექიმებში მოჰყვა აღშფოთება, რადგან საკურორტო სეზონის შემდე, ბუნებრივია, პაციენტთა ნაკლები რაოდენობა ფიქსირდებოდა, რასაც ემატებოდა ისიც, რომ შეუსაბამო პირობების გამო, პაციენტებს აღნიშნულ დაწესებულებაში მკურნალობა არ უნდოდათ. ამ ყველაფერს ზედ ერთვოდა არჩევნების შემდეგ გაორმაგებული ფასები. როდესაც მედპერსონალმა აღნიშნულ საკითხებზე დაიწყო საუბარი, “ალდაგი ბისიაში” დაიბარეს მთავარი მენეჯერი ნანა ვერულიძე, რომელსაც უთხრეს, რომ რადგან ის ვერ იმორჩილებდა კოლექტივს და რადგან ექიმებმა ჟურნალისტებთან კომენტარები გააკეთეს, რის აღკვეთაც მთავარმა მენეჯერმა ვერ მოახერხა, ის უნდა წასულიყო ქობულეთის კლინიკიდან და სამაგიეროდ, შესთავაზეს ჩაქვის საავადმყოფოში გადაყვანა, რაზედაც ამ უკანასკნელმა, ჩვენი ინფორმაციით, უარი განაცხადა.
ამის შემდეგ, თბილისში იბარებენ მენეჯერს სამედიცინო დარგში ზაალ მიქელაძეს, რომელმაც გუშინ, 30 ოქტომბერს, ჩამოსვლისთანავე განაცხადა, რომ იმ საუბრების შემდეგ, რაც მას ქონდა “ჩემი ოჯახის კლინიკის” ხელმძღვანელობასთან, ის უარს ამბობდა ამ კომპანიასთან თანამშრომლობაზე. ზაალ მიქელაძის ამ განცხადებას წინ უძღვოდა ექიმთა მასობრივი პროტესტი საავადმყოფოს ეზოში, რომელსაც ესწრებოდა საავადმყოფოს მენეჯერობის ახალი კანდიდატი ეკა გორაძე და “ჩემი ოჯახის კლინიკის” წარმომადგენელი ცინცაძე.
ექიმებმა აქციაზე კიდევ ერთხელ დააფიქსირეს გაუსაძლისი პირობები და მონური შრომა და მხარდაჭერა გამოუცხადეს ზაალ მიქელაძეს, რომელმაც იძულების შედეგად დატოვა თანამდებობა.
გუშინვე, მედიის თანდასწრებით, ეკა გორაძემ ზაალ მიქელაძე დაადანაშაულა აქციის მოწყობაში და დაემუქრა, რომ ამას არ შეარჩენდა.
30 ოქტომბერს, ქობულეთის სამედიცინო ცენტრის ადმინისტრაციის გადაწყვეტილებით, კლინიკაში დასაქმებული 316 თანამშრომლიდან 34 თანამშრომელს (მათ შორის მედპერსონალი 23, დანარჩენი ტექნიკური სამსახური და ადმინისტრაცია), რომელსაც 1 ნოემბრამდე ქონდა კონტრაქტი, აღარ გაუგრძელდა შრომითი ხელშეკრულება. რამდენიმე საათით ადრე კი, “ჩემი ოჯახის კლინიკის” წარმომადგენლები მედიისთვის მიცემულ ოფიციალურ კომენტარში აცხადებდნენ, რომ მხოლოდ 15 ადამიანის გათავისუფლებაზე იყო საუბარი, რაც ასევე მიუღებელია ჩვენთვის, _ ნათქვამია საჩივარში.
