სახალხო დმცველის თანამდებობაზე საპარლამენტო უმრავლესობა ნანუაშვილის კანდიდატურას ბიუროს წარუდგენს და სავარაუდოდ, 7 დეკემბრის პლენარულ სხდომაზე მას დაამტკიცებენ. დღემდე კი, სახალხო დამცველის თანამდებობაზე უმრავლესობის კანდიდატად ნინა ხატისკაცი სახელდებოდა.
“გურია ნიუსი” ნინა ხატისკაცს დაუკავშირდა, რომელმაც თქვა, რომ უმრავლესობის გადაწყვეტილებაზე გავლენა იმ საზოგადოებრივმა განწყობამ მოახდინა, რომელიც მის მიმართ გაჩნდა.
“ეს შემოთავაზება ჩემთვის თანამდებობის მიღება და პრივილეგია არ ყოფილა. ეს ჩემ მიერ უზომოდ დიდი პასუხისმგებლობის აღება იქნებოდა. ამ პასუხისმგებლობას დიდი სიამოვნებით ავიღებდი, თუმცაღა ის კითხვის ნიშნები, რომელიც ჩემს კანდიდატურასთან დაკავშირებით საზოგადოების მხრიდან არსებობდა და დამატებით ის პროცესი, რომელიც თითქოს რაღაც პერიოდში იმ მიმართულებით არ წარიმართა და შემდგომში გამოსწორდა (ვგულისხმობ, შეხვედრას სხვა კანდიდატურებთანაც), წინა პირობას იძლეოდა, რომ სხვა ღირსეული კანდიდატები გამოვლენილიყვნენ…
კითხვები ჩემს კანდიდატურასთან მიმართებაში _ ჩემს მეუღლესთან დაკავშირებით, ის, რომ ოცნებამ დამასახელა და ამ პოლიტიკური ძალის მიმართ ლოიალური ვიქნებოდი, ვთვლი, რომ სრულიად უსაფუძვლო იყო და არ წარმოადგენდა პრობლემას; მაგრამ ჩემთვის ერთგვარად უსამართლოც კი იყო, რომ სახალხო დამცველად ასეთი კითხვის ნიშნებით დავნიშნულიყავი. მოგეხსენებათ, ეს ცოტათი უმადური თანამდებობაა, რადგანაც ომბუდსმენი ყოველთვის ყველას გულის მოგებას ვერ მოახერხებს.
შესაძლოა, ეს საკითხები, რაც ჩემთან დაკავშირებით საზოგადოებაში წამოიჭრა, მუდმივად გაჟღერებულიყო.
ვთვლი, ჩემი დამოუკიდებლობა, ჩემი პრინციპულობა და საქმისადმი დამოკიდებულება ამას არ იმსახურებდა და აქედან გამომდინარე, პირიქით, მოხარული ვარ, რომ შეირჩევა კანდიდატი, რომლის მიმართაც ამგვარი კითხვები არ იარსებებს… ბოლო დღეებში, ამ საკითხთან დაკავშირებით, უმრავლესობის რამდენიმე წარმომადგენელთან კომუნიკაცია მქონდა და ველოდი, რომ სახალხო დამცველის თანამდებობაზე სხვა კანდიდატურა დასახელდებოდა,” – ამბობს ნინა ხატისკაცი.
სახალხო დამცველობის ერთ-ერთი კანდიდატი მიიჩნევს, რომ უჩა ნანუაშვილს ამ საპასუხისმგებლო საქმისთვის თავის გართმევა არ გაუჭირდება.
“უჩას, მისი საქმიანობიდან გამომდინარე, კარგად ვიცნობ. მიმაჩნია, რომ ის დღევანდელი სამოქალაქო სექტორის ერთ-ერთი თვალსაჩინო წარმომადგენელია. ყოველთვის პრინციპული იყო, პრობლემებზე თვალს არასდროს ხუჭავდა და მართლაც მაღალი პროფესიონალიზმით გამოირჩევა სწორედ ადამიანის უფლებების სფეროში. როდესაც უჩას კანდიდატურა დასახელდა, რამდენჯერმე აღვნიშნე, რომ ამ თანამდებობაზე მასაც სიამოვნებით ვიხილავდი. დასახელებულთაგან უჩა ერთ-ერთი მისაღები კანდიდატურა იყო… ვგულშემატკივრობ და მინდა, რომ ამ რთულ საქმიანობას მან თავი ეფექტურად გაართვას,” _ უთხრა “გურია ნიუსს” ნინა ხატისკაცმა.
(ფოტო “ექსპრესნიუსის”)
