სანამ ამ ბიჭების აღმკვეთი ღონისძიების საკითხს განიხილავდნენ, უწმიდესმა და უნეტარესმა სრულიად საქართველოს კათოლიკოს პატრიარქმა ილია II-მ და რამდენიმე მეუფემ სასამართლოს მიმართეს, რათა აღმკვეთ ღონისძიებად მათთვის პატიმრობა არ შეეფარდებინათ. თხოვნა არავინ გაითვალისწინა.
საქმე ეხება მართლმადიდებელ ბიჭებს, რომლებიც ტელეკომპანია “კავკასიაში” 2010 წლის 7 მაისს მომხდარი ინციდენტის გამო გაასამართლეს.
ქართულმა მართლმსაჯულებამ 8 ახალგაზრდას გამამტყუნებელი განაჩენი გამოუტანა. აქედან ექვსს ოთხი წელი და 6 თვე მიესაჯა, ორს კი _ შვიდი წელი.
საქართველოს პრეზიდენტს ისინი ახლა გაახსენდა. 2 კვირის წინ სინდისის პატიმრებს უთხრეს, მიხეილ სააკაშვილმა თქვენი შეწყალება გადაწყვიტა და განცხადება დაწერეთ, რომ შეწყალებას ითხოვთო, მაგრამ უარი თქვეს. “დამნაშავდეები არ ვართ და შეწყალება რის გამო უნდა ვითხოვოთო.”
სოფელი დიღმის წმინდა მარინეს ტაძრის წინამძღვარი, დეკანოზი დავით ისაკაძე იხსენებს, ბოლო სხდომაზე როგორ თხოვდა ბიჭებს საქალაქო სასამართლოს მოსამართლე, რომ საპროცესო შეთავაზებას დათანხმებულიყვნენ. „მოსამართლე მილერ ხარებავა ბიჭებს ეხვეწებოდა, საპროცესო შეთანხმებას დათანხმდით და სასამართლო დარბაზიდანვე ისე გაგათავისუფლებთ, ფულს არ გადაგახდევინებთო.“
რწმენისთვის მსჯავრდებული 8 ახალგაზრდა არასამთავრობო ორგანიზაცია “ყოფილი პოლიტპატიმრები – ადამიანის უფლებებისთვის” ინიციატივით პოლიტპატიმრების და პოლიტდევნილების იმ 215 კაციან სიაში მოხვდა, რომელსაც პარლამენტის ადამიანის უფლებათა დაცვის და სამოქალაქო ინტეგრაციის კომიტეტი ერთი თვის განმავლობაში განიხილავდა.
საზოგადოების ნაწილს კითხვა გაუჩნდა, თუ რატომ გააიგივეს 8 მართლმადიდებელი ბიჭი პოლიტპატიმრებთან. პარლამენტის ადამიანის უფლებათა დაცვის კომიტეტის თავმჯდომარის ეკა ბესელიას განცხადებით, არასამთავრობო ორგანიზაციების მიერ კომიტეტისთვის წარდგენილი დასკვნა, რომლის მიხედვითაც 8 მართლმადიდებელი, პოლიტპატიმრების სიაში მოხვდა, საკმარისად დასაბუთებული იყო.
“დასკვნა არასამთავრობო უფლებადამცველი ორგანიზაციების მიერაა გაცემული. ამ ბიჭების დაკავება მოხდა სრულიად უსამართლოდ და პოლიტიკური მოტივით, მათი რწმენისა და აღმსარებლობის გამოხატვის გამო. დასკვნა საკმაოდ დასაბუთებულია. არასამთავრობო უფლებადამცველ ორგანიზაციებს შესწავლილი აქვთ ეს საქმე… დასკვნაში შეტანილი იყო საქმის მასალები, როდესაც დაზარალებულად ცნობილი პირები თავად ამბობდნენ, რომ ეს ადამიანები არასწორად დააკავეს. ანუ თუ მათი დაკავება უკანონოდ, მტკიცებულებების გარეშე მოხდა, დავინტერესდით რა იყო ის მოტივი, რომელმაც განაპირობა უსამართლო განაჩენის გამოტანა. გამოიკვეთა მოტივი, რომლის საფუძველზეც ისინი პოლიტ პატიმრების სიაში მოხვდნენ… კომიტეტში ამ საკითხის განხილვისას განსხვავებული აზრი არავის ჰქონია. ყველას პოზიცია ერთსულოვანი იყო.”
სახალხო დამცველობის ყოფილი კანდიდატი ნინა ხატისკაცი ერთ-ერთი მათგანია, რომელსაც ამ ადამიანებს მიმართ სხვა მოსაზრება აქვს:
“მე არც საქმის მასალებს ვიცნობ და არც დეტალურად ვარ ჩახედული საკითხში, თუმცა ის ზედაპირული ინფორმაცია, რომელიც ამ საქმესთან დაკავშირებით გამაჩნია, არ მაძლევს საშუალებას ვთქვა, რომ ის ადამიანები პოლიტ პატიმრები იყვნენ. ჩემთვის ხელმისაწვდომი ინფორმაციის თანახმად, საქმე ჰქონდა ტელევიზიაში შევარდნას, აქ იყო ხულიგნობა, როგორც მინიმუმ გამოხატვის შეზღუდვის მცდელობა და ჟურნალისტური საქმიანობისთვის ხელის შეშლა. ამ დაკავების პოლიტიკური მოტივები ჩემთვის დღემდე უცნობია. შესაძლოა აქ საუბარი იყოს იმაზე თუ რამდენად ადეკვატური იყო თავად სასჯელი, მაქსიმალური სასჯელი ხომ არ გამოიყენეს და ა.შ. მაგრამ მათი დაკავება პოლიტიკური ნიშნით რომ ყოფილიყო მოტივირებული, მე ეს ვერ დავინახე,” _ გვითხრა ნინა ხატისკაცმა.
ჩვენს შეკითხვაზე, _ ხომ არ ჯობდა, სახალხო დამცველობის კანდიდატი ჯერ ამ საქმის დეტალებს გაცნობოდა და განცხადებები მხოლოდ მას შემდეგ გაეკეთებინა, მან განგვიმარტა:
“ყველა განცხადება საქმის სიღრმისეულ გაცნობაზე დაფუძნებული ვერ იქნება. არსებობს მასმედიის საშუალებით გავრცელებული ინფორმაცია, არსებობს ის მასალები, რომელიც საჯაროდ ხელმისაწვდომია და ამაზე კომენტარის გაკეთება ნამდვილად არის შესაძლებელი. შესაძლოა, საქმის მასალების გაცნობის შემდეგ აღმოვაჩინო, რომ მნიშვნელოვანი დარღვევები, ან პროცედურული გადაცდომები იყო, რომ არაადეკვატური სასჯელი შეუფარდეს, თუმცა მეორე კომპონენტი, როგორც გითხარით – პოლიტიკური მოტივაცია, მე არ ვიცი, ასეთი რამ ამ საქმეში თუ არის. თუმცა თუ საქმეში ასეთი რამ არსებობს და მხარეებმა ამის დადასტურება მოახდინეს, ეს თავისთავად ნიშნავს, რომ იმ გარემოებებს არ ვიცნობ, რომელიც ამ საქმეს პოლიტიკურ მოტივაციებს შესძენდა… თქვენთანაც ამით დავიწყე. იმ ინფორმაციით, რაც მედიაში გავრცელდა, მე ამგვარი კომენტარის გაკეთების შესაძლებლობა მქონდა,” _ განაცხადა ხატისკაცმა.
ფაქტია, საქმეში ჩაუხედავი ადამიანები მიიჩნევს, რომ ტელეკომპანია “კავკასიაში” მომხდარი ინციდენტის გამო დაკავებული ბიჭები დამნაშავეები არიან. სწორედ ამიტომ, საჭიროდ ჩავთვალეთ, კიდევ ერთხელ გადაგვევლო თვალი ახლო წარსულში განვითარებულ იმ მოვლენებზე, რომლებიც რწმენისთ პატიმრების ირგვლივ ხდებოდა.
ყველაფერი ერეკლე დეისაძის წიგნით „საიდუმლო სირობით“ დაიწყო. წიგნის პრეზენტაცია “ილიას სახელობის უნივერსიტეტის” ლიტკაფეში 2010 წლის 4 მაისს გაიმართა.
პრეზენტაციამ საზოგადოებაში დიდი ვნებათაღელვა გამოიწვია. სწორედ ამიტომ მეორე დღეს, ილიას უნივერსიტეტის მთავარ კორპუსთან დეისაძის სოლიდარობის ნიშნად, სტუდენტების ერთმა ნაწილმა და მათმა მხარდამჭერებმა ტრანსფარანტით ხელში – “არა თავისუფლების შეზღუდვას,” აქცია გამართეს. პარალელურად მიმდინარეობდა “მართლმადიდებელ მშობელთა კავშირის,” “სახალხო მართლმადიდებლური მოძრაობის” წევრების, სტუდენტების და რიგითი მოქალაქეების საპროტესტო აქცია. ისინი აცხადებდნენ, რომ ერეკლე დეისაძის ამ წიგნის პრეზენტაცია, სახელმწიფო, მითუმეტეს საგანმანათლებლო დაწესებულებაში არ უნდა გამართულიყო. აქცია მალე დაიშალა, თუმცა ეს დრო გარკვეული შეხლა-შემოხლისთვის საკმარისი აღმოჩნდა. ფაქტს იმიტომ ვიხსენებ, რომ მოგვიანებით მოსამართლემ აქ მომხდარი მცირედი შეხლა-შემოხლის გამო 8 მართლმადიდებელი ბიჭიდან ორს – რატი მაისურაძეს და ავთანდილ ზუმბაძეს, ვითომდა ჩხუბში მონაწილეობისთვის საპატიმრო ვადა 2 წელიწადნახევრით გაუზარდა. რეალურად კი ისინი არაფერ შუაში იყვნენ.
აქციიდან ორი დღის შემდეგ, 7 მაისს, ტელეკომპანია “კავკასიის” გადაცემა “ბარიერში” “მართლმადიდებელ მშობელთა კავშირის” საქმიანობაზე იყო საუბარი, რომელიც მიბმული იყო ერეკლე დეისაძის წიგნის განხილვასთან. გადაცემაში მიწვეულები იყვნენ ორი სხვადასხვა მსოფლმხედველობისა და იდეოლოგიის საზოგადოებისთვის მეტ-ნაკლებად ცნობადი სახეები. ერთ მხარეს იყო ე.წ. ლიბერალების ფრთა – თეო ხატრიაშვილი, ბექა მინდიაშვილი, სერგო რატიანი და ა.შ. მეორე მხარეს კი “მართლმადიდებელ მშობელთა კავშირისა” და “სახალხო მართლმადიდებლური მოძრაობის” წევრები: ლევან ჩაჩუა, დავით შალამბერიძე, ჯაბა გურჩიანი, რატი მაისურაძე, მალხაზ გულაშვილი და სხვები.
გადაცემაში მეორე სარეკლამო წყვეტა წამყვანმა ნინო ჯანგირაშვილმა დროზე ადრე გამოაცხადა, რისი მიზეზიც იყო ის, რომ ლიბერალური ფრთის წარმომადგენლებმა გადაცემა დატოვეს. ამ ფაქტს წინ უძღოდა “სახალხო მართლმადიდებლური მოძრაობისა” და “მართლმადიდებელ მშობელთა კავშირის” მისამართით ბექა მინდიაშვილის მიერ გაკეთებული შეურაცხმყოფელი განცხადებები, რომ ორგანიზაციების წარმომადგენლები ფაშისტები არიან, მათთან სასაუბრო არაფერი აქვს და მოუწოდა პოლიციას დაეჭირათ ისინი. ამის შემდეგ ბექა მინდიაშვილი, თეო ხატიაშვილი, მოგვიანებით კი სერგო რატიანი და მისი თანმხლები პირები სტუდიიდან გავიდნენ. რასაც მოჰყვა წამყვანის ნინო ჯანგირაშვილის განცხადება, რომ გარეთ რაღაც ხდებოდა. თითქმის 20 წუთიანი სარეკლამო წყვეტის შემდეგ ჯანგირაშვილმა გადაცემის გაგრძელება სცადა. მან აღნიშნა, რომ ტელეკომპანიის ეზოში ჩხუბი მოხდა…
სტუდიაში გადაცემის დაწყებიდან ინცინდენტის სრულ ამოწურვამდე მიმდინარე მოვლენებს რამდენიმე კამერა იღებდა. მოგვიანებით, სასამართლო პროცესზე ეს ვიდეომასალა თავად ბრალდებამ წარმოადგინა. ჩანაწერში არ არის არც ერთი კადრი ჩხუბის, გინების და გადაცემის ჩაშლის მცდელობის. ჩანს, გადაცემის მსვლელობისას როგორ მშვიდად იჯდა ლევან ჩაჩუა. მასალაში ასევე ჩანს და ისმის, რომ ჯაბა გურჩიანმა აიღო მიკროფონი და თქვა: “ნუ შემიგინებთ ღვთისმშობელს…”
პოლიცია შემთხვევის ადგილზე ინციდენტის ამოწურვის მერე მივიდა. თვითმხილველები ყვებიან, რომ პოლიციელებმა ადგილზე მისვლის შემდეგ, პირების დაკავება გაურკვეველი შერჩევითა და წინაპირობებით დაიწყო. სტუდიაში დააკავეს მართლმადიდებელ მშობელთა კავშირის წარმომადგენელი, ეკლესიის სტიქაროსანი და მედავითნე ავთანდილ ზუმბაძე, სასულიერო აკადემიის სტუდენტი დავით შალამბერიძე. მგალობელი ზვიად ბლიაძის დაკავება კი ტელევიზიის ეზოში მოხდა. დაკავების ფაქტს ბლიაძის მამა შეეწირა. ამ ამბის გაგების შემდეგ ის ნერვიული შეტევით დაიღუპა… პატიმრის შესახებ კოდექსში წერია, რომ გარე ბადრაგირების რეალობით სახლში გამოსათხოვარ პანაშვიდზე პატიმარის მიყვანა შესაძლებელია, მაგრამ მას ამის ნება არ დართეს.
დაკავების შემდეგ სამივე ბიჭი თბილისის პოლიციის მთავარი სამმართველოს შენობაში გადაიყვანეს. “გადაცემაში მონაწილეები და საზოგადოების წარმომადგენლები, რომელთაც დაკავებულთა ბედი გვაინტერესებდა სწორედ ამ შენობისკენ გავემართეთ. ჩვენთან ერთად მყოფი ლევან ჩაჩუა და რატი მაისურაძე მთავარ სამმართველოში მოწმის სტატუსით შეიყვანეს და იქ დააკავეს იმ საბაბით, რომ ისინი მართლმსაჯულებას არ დამალვოდნენ. ასევე საკუთარი თხოვნის საფუძველზე, ჩვენების მიცემის სურვილით მთავარი სამმართველოს შენობაში შევიდნენ შოთა აფხაიძე და გიორგი გაბედავა, რომლებიც იმავე მოტივით დააკავეს, რომ არ დამალულიყვნენ. 10 მაისს პოლიციის განყოფილებაში სკოლის მოსწავლე და ეკლესიის სტიქაროსანი ჯაბა გურჩიანი გამოიძახეს. განყოფილებაში იგი საკუთარი ნებით გამოცხადდა და ამის შემდეგ დააკავეს. მათგან არც ერთი მიმალვას არ ცდილობდა, უფრო მეტიც მათი უმრავლესობა პოლიციის მთავარ სამმართველოში თავისი ნებით მივიდა და უნდოდათ ჩვენება მიეცათ,” _ ამბობს მართლმადიდებელ მშობელთა კავშირის თავმჯდომარე, ავთანდილ უნგიაძე.
მართლმადიდებელი ბიჭების ინტერესებს, სასამართლო პროცესზე, მოქმედი პარლამენტის ვიცე-სპიკერი, იმ პერიოდში კი ადვოკატი და უფლებადამცველი მანანა კობახიძე და ადვოკატი ბესარიონ ქარცივაძე იცავდა.
მანანა კობახიძე მაშინ „გურია ნიუსთან“ საუბრისას აცხადებდა, რომ „ე.წ ლიბერალები: მინდიაშვილი, ხატიაშვილი და რატიანი, სტუდიიდან აბსოლუტურად მშვიდობიანად წავიდნენ. ისინი, არც ჩვენებაში უარყოფენ, რომ მათ მიმართ რაიმე ფიზიკურ ანგარიშწორებას ადგილი არ ჰქონდა…”
“კავკასიაში” მომხდარ ინციდენტზე სახელმწიფო ბრალდებამ 32 მოწმე წარმოადგინა. საქმის მასალების მიხედვით, ძირითადი მოწმეები პოლიციელები იყვნენ. უნდა აღინიშნოს, რომ პოლიციელთა გარდა, ყველა სხვა მოწმემ, მათ შორის დაზარალებულებმა რვავე მართლმადიდებელი უდანაშაულოდ სცნო იმ ბრალდებაში, რაც მათ წაუყენეს. 24 სამართალდამცავის მიერ მიცემული ჩვენება კი, დროში, სივრცესა და რეალობაში აბსოლუტურად აცდენილი იყო ერთიმეორეს. ინციდენტი, გარეთ, მეორე რეკლამის გასვლის დროს დაიწყო. რეკლამა ეთერში 23:15 საათზე გავიდა და 23:33 საათზე დასრულდა. ჩხუბი, სწორედ ამ შუალედში მომხდ. პოლიციაში კი ზარი 23:45 საათზე ფიქსირდება. მათ მოსვლას, შემთხვევის ადგილამდე, მინიმუმ 10 წუთი მაინც ჭირდებოდა. ასე რომ, პოლიციის მისვლის დროს, ინციდენტი ამოწურული იყო და ისინი თვითმხილველები ვერ იქნებოდნენ.
პოლიციელების მიერ არასწორად შედგენილ ჩხრეკის ორდერებსა და ამოცნობის გაყალბებულ ოქმებში, არსებითი დარღვევები მოსამართლე მილერი ხარებავამ არ დაინახა… ოქმის მიხედვით, ჩხრეკა ჩატარდა სტუდიაში. კადრების მიხედვით, დაკავებულები მაშინვე გარეთ გამოიყვანეს და ფაქტია, ჩხრეკა იქ ვერ ჩატარდებოდა. პოლიციელ ბურდულის ჩვენების თანახმად კი, ჩხრეკა ბაღში ჩატარდა.
ტელეკომპანია “კავკასიაში” მომხდარი ინციდენტის გამო, სინდისის პატიმრები ორი მუხლით გაასამართლეს: ხულიგნობისა და ჟურნალისტური საქმიანობისთვის უკანონო ხელშეშლისთვის, თუმცა, რომელ ჟურნალისტს შეუშალეს ხელი, ეს ვერც ბრალდებამ დაადგინა და ვერც სასამართლომ. დაზარალებულად ამ საქმეში, ერთი ჟურნალისტიც კი არ არის ცნობილი.უფრო მეტიც, ტელეკომპანიის ყველა თანამშრომელი, მათ შორის გადაცემა “ბარიერის” წამყვანი და ტელევიზიის დირექტორი ნინო ჯანგირაშვილი დაკითხვისას აფიქსირებდა, რომ ჟურნალისტურ საქმიანობაში ამ ადამიანებს ხელი არ შეუშლიათ. მათი განცხადებით, ბრალდებულებს სტუდიის შიგნით თუ გარეთ, არც მათთვის და არც სხვა პირებისთვის ფიზიკური შეურაცხყოფა არ მიუყენებიათ. ამიტომ მათი მოთხოვნა ამ ადამიანების უკანონო პატიმრობიდან დაუყოვნებლივი გათავისუფლება იყო…
ბოლო სასამართლო პროცესზე მოსამართლე ხარებავა განაჩენს ჩუმად კითხულობდა. მსჯავრდებულები ფეხზე იდგნენ და უსამართლო ვერდიქტს გალობით ხვდებოდნენ – “უფალო, დიდება შენდა!” დარბაზში მსხდომი მამაოების შეგონებისა და გალობის ფონზე პროკურორები მოსამართლის სათათბირო ოთახიდან გაიპარნენ.
სააპელაციო სასამართლოს მოსამართლე გიორგი ჩემიამ საქალაქო სასამართლოს გადაწყვეტილება ძალაში დატოვა. სააპელაციოში პროკურორები დავით ხიზანაიძე და გიორგი მიქაია იყვნენ. შეგახსენებთ, რომ ამ სამეულის ხელში გაიარა სანდრო გირგვლიანის საქმემ.
როგორც კი გლდანის ციხეში გადაიყვანეს, რვავე მსჯავრდებული უწმინდესმა მოინახულა. მას უთქვამს, ღმერთმა ალბათ თქვენი აქ მოსვლა იმიტომ დაუშვა, რომ ქრისტიანობა უნდა იქადაგოთო.
“იქ ძალიან ბევრი მსჯავრდებული მოაქციეს. ჩვენ, სასულიერო პირები მათთან ახსარებაზე ხომ შევდიოდით და ბიჭების საკნებიდან პირველ ახსარებაზე ძალიან ბევრი მოდის… ეს ბიჭები არიან ბოკერიას პირადი პატიმრები. რაც მოხდა, თავისუფლების ინსტიტუტის უშუალო მითითება იყო. ეს ხალხი უშუალოდ კურირებდა ამ საქმეს და ყველა იმ საკითხს, რომელიც მართლმადიდებლური ეკლესიის საწინააღმდეგოდაა მიმართული. ამიტომ არიან ეს ბიჭები პოლიტიკური პატიმრები… მინდა გითხრათ, რომ საკითხით საქართველოში აშშ-ს მაშინდელი ელჩი ჯონ ბასი დაინტერესდა. მან მეორე დღესვე განცხადება გააკეთა, რომლის შინაარსიც პირდაპირ ბიჭების დაჭერისკენ მოწოდება იყო. ფაქტობრივად, ბასმა მწვანე შუქი აუნთო ხელისუფლებას,” _ ამბობს დეკანოზი დავით ისაკაძე.
სინდისის პატიმრების დაკავებიდან ორწელიწადნახევარი გავიდა. “გურია ნიუსი” დაინტერესდა მათი პოლიტპატიმრების სიაში შეყვანის ფაქტს როგორ შეაფასებდნენ ტელეკომპანია “კავკასიაში.”
არხის მფლობელმა ნინო ჯანგირაშვილმა გვითხრა, რომ ამ საკითხზე კომენტარს არ აკთებს და არ სცალია. არხის პოზიციის გასაგებად ჩვენ „კავკასიის“ ჟურნალისტს ალეკო ელისაშვილს ვესაუბრეთ:
“ამ ფაქტს მივესალმებით. ისინი დიდი ხნის განმავლობაში ტყუილად არიან დაკავებულები. ხელისუფლებამ მაშინ ამ ქმედებით ორი კურდღელი დაიჭირა. ერთის მხრივ “კავკასიას” ჩრდილი მიაყენა, ვითომ ჩვენ დაჟინებით ვითხოვდით ამ ხალხის დაჭერას, არადა ისინი არაფერ შუაში იყვნენ. ერთ-ერთი ჩაჩუა 4 შვილის მამაა. არ მოსწონდათ, გულზე არ ეხატებოდათ, მისი დაჭერა უნდოდათ. მივიდნენ და დააპატიმრეს ჟურნალისტური საქმიანობის ხელის შეშლის გამო, მაშინ როდესაც კაცი მთელი გადაცემის განმავლობაში სკამიდან არ ამდგარა. ძველი ბოღმა ჰქონდათ. ხელისუფლება ვერაფრით ახერხებდა „მართლმადიდებელ მშობელთა კავშირის“ გაჩერებას. ამ ინცინდენტით ისარგებლეს. სცადეს, რომ ჩვენთვის ჩრდილი მოეყენებინათ და მეორეს მხრივ, ესენი გაანეიტრალეს. სინამდვილეში, ტყუილად დაიჭირეს. მე ამოცნობაზე მიმიყვანეს. სამი ბიჭი წარმოადგინეს და არც ერთი იყო ამ საქმესთან დაკავშირებული. ამას გარდა ჩვენ: მე, დავით აქუბარდიამ, ნინო ჯანგირაშვილმა, “კავკასიის” ოპერატორმა, ყველამ ვინც იქ ვიყავით, სასამართლო პროცესზე ვთქვით, რომ ესენი არაფერ შუაში არიან… შეგიძლიათ კადრები ნახოთ, სადაც ჩანს, რომ ეს ბიჭები არაფერს აკეთებენ. ჯავრი ჰქონდათ და ტყუილ უბრალოდ ანგარიში გაუსწორეს… ძალიან კარგი, რომ სამართლიანობა აღდგება და ეს ბიჭები გათავისუფლდებიან. ვულოცავ, ნამდვილად მიხარია,” _ განუცხადა “გურია ნიუსს” ჟურნალისტმა ალეკო ელისაშვილმა.
რწმენის პატიმრებმა უარი თქვეს საქმის სტრასბურგში გასაჩივრებაზე. ისინი აცხადებენ, რომ მათ სამშობლო არ უპირისპირდება და შესაბამისად, თავს უფლებას არ მისცემენ, სტრასბურგის სასამართლოში სარჩელი საქართველოს წინააღმდეგ შეიტანონ.
