საკრებულოს თავმჯდომარემ ალეკო მამეშვილმა პირველ საკითხად წარმოადგინა: “საკრებულოს გამოკლებული წევრის ადგილმონაცვლის, დიმიტრი კვერღელიძის საკრებულოს წევრობის უფლებამოსილების ცნობის შესახებ” უყარეს კენჭი და ხანმოკლე ტაშით მიესალმნენ კვერღელიძის საკრებულოში შესვლას.
დიმიტრი კვერღელიძემ ტრიბუნასთან მისვლისთანავე საყვედურებით აავსო საკრებულოს თავმჯდომარე ალეკო მამეშვილი:
_ალეკო მამეშვილი არ იყო ხალხის მიერ არჩეული თავმჯდომარე, მან დააცილა საკრებულო იმ პრინციპებს, რასაც ევროპული ქარტია თვითმმართველობის შესახებ ითვალისწინებს. ის დადის თავის პარტიულ ბოსებთან სკამის შესანარჩუნებლად, ნაცვლად იმისა, რომ ფინანსთა სამინისტროსი ირბინოს და ხალხს დაეხმაროს, _ განაცხადა მან.
კვერღელიძემ კიდევ არაერთი მიზეზი ჩამოთვალა, რა მიზეზებისა თუ დანაშაულობების გამო, უთხრა ხალხმა უარი მათ ხელისუფლებას. მათ შორის ცოცხების არამიზნობრივი ხმარება დაასახელა. კვერღელიძის ასეთ საუბარს, დეპუტატთა მხრიდან რეპლიკები და უკმაყოფილო შეძახილები მოჰყვა.
დღის წესრიგის მეორე საკითხი: “ოზურგეთის მუნიციპალიტეტის გამგებლის მოვალეობის შემსრულებლის ილია ვაშაყმაძის თანამდებობიდან გათავისუფლების გამო, საკრებულოს თავმჯდომარისთვის თანხმობის მიცემის თაობაზე”, კვლავ მამეშვილმა გააცნო დეპუტატებს. მან განმარტა, რომ მას შემდეგ, რაც ილია ვაშაყმაძემ დაწერა განცხადება თანამდებობის დატოვების შესახებ, განცხადება შემოიტანა კოტე შარაშენიძემ. ბიურომ განიხილა ეს. სხვა კანდიდატურა არ ყოფილა. ის არის კოალიცია „ქართული ოცნების“ ოზურგეთის შტაბის თავმჯდომარე და ყოველივე ქედან გამომდინარე, დღეს წარვადგენ გამგებლის მოვალეობის შემსრულებლად ოზურგეთში.
კოტე შარაშენიძის კანდიდატურას საკრებულოს შემადგენლობამ კენჭი უყარა, 30 ხმით ორის წინააღმდეგ.
_მე მივესალმები ოზურგეთის საკრებულოს და მსურს გითხრათ, რომ ეს საკრებულო არის ოზურგეთელი მოქალაქეებით დაკომპლექტებული საკრებულო. ერთი-ორის გარდა, აქ ვერავინ მაჩვენებს ნაციონალური პარტიის მანდატს. ჩვენ, ხალხმა ამ არჩევნებზე დავდეთ შედეგი. იყო მოცემულობა, სისტემა, რომელსაც ვერ ვცვლიდით. გამოჩნდა კაცი, ბიძინა ივანიშვილი, რომელიც დაბადებულია საჩხერეში, მაგრამ ოზურგეთელია. მან აქ გაიგო შრომის ფასი. არ მქონდა უფლება, არ გავმხდარიყავი „ქართული ოცნების“ წევრი, რადგან ამ კაცმა თქვა, რომ სამშობლოს კარგავდა თუ ამ ნაბიჯს არ გადადგამდა. დღეს ვხედავთ, რომ საქართველოს ყველა კუთხესი მეტ-ნაკლებად, არის მღელვარება. მე ვთვლი, რომ ოზურგეთში აკადემიურად ვდგამთ ნაბიჯებს უკეთესობისკენ. სკამების და ჯოხების სროლა არ მიმაჩნია აკადემიურ ქცევად. რაც შეეხება ჩემს მიმართ ოპოზიციონერ დეპუტატ ლელა ნაცვალაძის კრიტიკას, ღმერთმა გაუმარჯოს, ის იბრძვის, მებრძოლი ადამიანია, მაგრამ საგანგებოდ ვაცხადებ, როგორც კოალიცია “ქართული ოცნების” შტაბის ხელმძღვანელი, რომ მას არაფერი საერთო არ აქვს „ქართულ ოცნებასთან“. ის არც შტაბის წევრია და არც პარტიის. საერთოდ, არ ვიცი, რომელი პარტიიდანაა. ჩემი მიზანია, საქმის კეთება. ბევრი კარგი პიროვნება და პროფესიონალია, როგორც საკრებულოში, ისე მთელ ოზურგეთში. ამ რესურსს ვერ დავკარგავ. საქმის კეთებაში დავუდგეთ ერთმანეთს გვერდით.
კოტე შარაშენიძემ, სხდომის დასრულების შემდეგ, “გურია ნიუსთან” განაცხადა, რომ ვერ იქნება აგრესიული და უმისამართოდ მზირალი. ახლა საქმეა საკეთებელი, როგორც არასდროს, ისეთი სიდინჯე, წინდახედულება, გამჭრიახობა და შრომა სჭირდება თითოეულ ჩვენგანს. შედეგი, რომელიც არჩევნებზე დავდეთ, მომავალში უნდა გახდეს შედეგიანი. აი, მაშინ ვივლით წელგამართული,” _ თქვა მან.
