ამჯერად ისინი სექტემბრისა და ოქტომბრის თვეების ხელფასს ითხოვდნენ: _ თუ დღის ბოლომდე არ ჩამოირიცხება ჩვენი შრომითი ანაზღაურება, ხვალიდან ექიმები პაციენტებს აღარ მიიღებენ, _ თქვეს მაშინ ექიმებმა.
შპს “ადითის” დირექტორი, თემურ კოროშინაძე ჩვენთან საუბრისას ამბობდა, რომ დღის ბოლომდე დავალიანება ჩამოირიცხებოდა, მაგრამ 5 დეკემბერს, მხოლოდ ერთი თვის ანაზღაურება ჩამოერიცხათ და ექიმებიც გაიფიცნენ. მათთან საგანგებო სიტუაციის კოორდინაციისა და რეჟიმის სამსახურის უფროსი, ზურაბ უტიაშვილი მივიდა და პრობლემების მოგვარებას შეჰპირდა: _ ჩემთვის ყველაფერი ცნობილია, თქვენი პრობლემის შესახებ თემურ კოროშინაძე გვატყობინებს. გაფიცვით საქმე არ მოგვარდება. ჩვენ კანონის ფარგლებში უნდა ვიმოქმედოთ, რისთვისაც ცოტა დაცდა მოგვიწევს. იანვრიდან თითოეული თქვენგანი იგრძნობს ცვლილებებს და ეს ცვლილება სასიკეთო იქნება, როგორც მედპერსონალისთვის, ასევე პაციენტებისთვის. მე გპირდებით, რომ ოქტომბრის ანაზღაურებას რამდენიმე დღეში მიიღებთ. მოვითხოვოთ ხელშეკრულებით გათვალისწინებული პირობების შესრულება, თუ არა, ვიმოქმედოთ კანონით და მივმართოთ სასამართლოს, _ თქვა უტიაშვილმა.
მედპერსონალმა საავადმყოფო-პოლიკლინიკაში არსებული უამრავი პრობლემის შესახებ ისაუბრა. საუბარი შეეხო ასევე სასწრაფო-სამედიცინო დახმარების ბრიგადის გამოძახების პრობლემას _ რადგან რეგიონებში ოპერატორები აღარ მუშაობენ, პაციენტს ცენტრთან დაკავშირება უწევს, რაც აფერხებს დროულ მომსახურებას.
_ პაციენტი უნდა დაუკავშირდეს სამედიცინო დახმარების ბრიგადას და არა ოპერატორს _ ასე პრობლემა მარტივად გადაიჭრება. ამასთანავე, აუცილებელია გაიზარდოს უბნის ექიმების პასუხისმგებლობა _ მათ ყველაფერი უნდა იცოდნენ თავიანთ უბნებში მცხოვრები ადამიანების ჯანმრთელობის მდგომარეობის შესახებ და პაციენტები ხშირად მოინახულონ, _ თქვა უტიაშვილმა და დაემშვიდობა “ადითის” წარმომადგენლებს, რომლებიც მაშინვე შეუდგნენ პაციენტების მიღებას.
