თანხა გურჯაანის რაიონის 4 სოფელში სამეურნეო ნაკვეთების აღდგენისთვის დაიხარჯა. პროექტი საერთაშორისო ჰუმანიტარულმა ორგანიზაცია “ქეამ” განახორციელა.
გურჯაანის რაიონის ოთხ სოფელში: ვაზისუბანში, კალაურში, შაშიანში და ვაჩნაძიანში 2012 წლის 19 ივლისის სტიქიამ მოსავალი მთლიანად გაანადგურა და სახლები დააზიანა. სწორედ ამიტომ, სპეციალისტებმა დასახმარებლად ეს სოფლები შეარჩიეს.
“ქეას” წარმომადგენლები პროექტისთვის გამოყოფილი თანხით გლეხებს სათესი ფართობების აღდგენაში, ახალი სათესლე მასალების, სასუქებისა და მცენარეთა დაცვის საშუალებების შეძენაში დაეხმარნენ. პროექტში 268 ფერმერი ჩაერთო.
ჯამში, 300 ჰექტრამდე მიწა დაითესა _ 80 პროცენტზე ხორბალი, დანარჩენზე კი ქერი, კომბოსტო და ისპანახი.
“სტიქიის შემდეგ ჩვენ ზარალი სწრაფად შევაფასეთ. გერმანიის საელჩო დაგვიკავშირდა, რომელსაც თანხა ჰქონდა გამოყოფილი და ეს პროექტი დაიგეგმა. ავირჩიეთ ოთხი ყველაზე დაზარალებული სოფელი. პროექტში ორი ძირითადი მიმართულება იყო. პირველი ითვალისწინებდა, რომ ფერმერებს, რომლებსაც ვენახი და ატამი დაუზიანდათ, სწრაფად შეეწამლათ ბაღები. ეს უმნიშვნელოვანესი იყო მცენარეების გადასარჩენად. მეორე მიმართულება ფერმერების დახმარებას გულისხმობდა, მათ სხვადასხვა კულტურა რომ დაეთესათ… ფერმერები ატმის და ყურძნის მოსავალს აგვისტო-სექტემბერში იღებდნენ, მისი რეალიზაციის შემდეგ კი, რეინვესტირება სხვა კულტურებში ხდებოდა. ეს ჯაჭვი დაირღვა. დავეხმარეთ მათ, რომ ზარალი შემცირებულიყო და ხორბლის მოსავალი მაინც მიეღოთ. პროექტისთვის ის ადამიანები შევარჩიეთ, რომლებიც ფერმერობას სერიოზულად ეკიდებიან. გამოვრიცხეთ ისინი, რომლებსაც 10 წელია დაუმუშავებელი მიწა აქვს და ახლა მოუნდათ ნაკვეთებში მუშაობა. ასევე, შერჩევისას გავითვალისწინეთ ის ადამიანები, რომლებსაც დიდი ზარალი ჰქონდათ და რომლებისგანაც მივიღეთ გარანტია, რომ ხარისხიანად იმუშავებდნენ. ამ მცირე რესურსის ფონზე 268 ოჯახმა მიიღო კონკრეტული სარგებელი. თითოეული ოჯახი იმის მიხედვით, თუ რა კულტურა აქვს დათესილი 3000-დან 5000-მდე ლარის მოსავალს აიღებს,” _ ამბობს „ქეას” პროექტის „სასოფლო-სამეურნეო რეაბილიტაცია კახეთის ოთხ სოფელში” დირექტორი ვახტანგ ფირანიშვილი.
პროექტის მონაწილე ადგილობრივი მოსახლეობა აცხადებს, რომ დახმარება დროული იყო და იმედისმომცემი. „4 ათას მეტრზე ისპანახი დავთესე. ყველაფერი მათ დააფინანსეს. დეკემბრის ბოლოს უკვე მოსავალს ავიღებ. ამ ტერიტორიაზე ატამი მქონდა და სეტყვამ გამინადგურა. მხოლოდ ატამი რომ მეზარალა, კიდევ არა უშავს, ყურძენი სულ გააფუჭა, თხილი, მარწყვი, ჟოლო… მადლობელი ვარ გერმანელების, რომ მიწა დაგვითესეს და იმედი ჩაგვისახეს, რომ პურის ფული გვექნება და მშიერი არ დავრჩებით,” – ამბობს სოფელ კალაურში მცხოვრები თენგიზ ბაციაშვილი.
4-თვიანი პროექტი უკვე დასრულებულია. შედეგებს კი ადგილზე, საქართველოში გერმანიის ელჩი ორთვიaნ ჰენიგი, საქართველოს მთავრობის და “ქეას” წარმომადგენლებთან ერთად გაეცნო. გერმანიის ელჩი შესრულებული სამუშაოებით კმაყოფილია.
“გერმანიის მთავრობამ კატასტროფის შემდეგ სწრაფი დახმარებისთვის 50 ათასი ევრო გამოყო. ჩამოვედი და ვნახე, რომ თანხა ძალიან პოზიტიურად არის გამოყენებული. ეს რა თქმა უნდა, მცირე მასშტაბის დახმარება იყო, მაგრამ 268 ოჯახს მივეცით საშუალება, რომ შემოსავლის წყარო მთლიანად არ განადგურებოდათ. მოსახლეობამ თავიანთ ნაკვეთებში სხვადასხვა კულტურა დათესა. მათ მომავალ წელს მოსავალი და შესაბამისად, ცხოვრებისათვის საჭირო საშუალებები ექნებათ.”
გაგრძელდება თუ არა პროექტი, ელჩს, ამ ეტაპზე, პასუხი არ აქვს. მან აღნიშნა, რომ ვინაიდან საქართველოს განვითარებისთვის სოფლის მეურნეობის აღორძინებას გადამწყვეტი მნიშვნელობა გააჩნია, გერმანიის სხვადასხვა უწყებებთან პროექტის გაგრძელების საკითხს დასვამს.
