“მათ ვერ უზრუნველყვეს გადაკეტილი გზის გახსნა და მუსლიმების სალოცავისკენ გადაადგილება. მოგვიანებით, ეს პრობლემა მოგვარდა, მაგრამ ხულიგნობის, მუქარის და სხვა სისხლის სამართლის წესით დასჯადი ქმედებები ჯერაც გამოუძიებელია,” _ განაცხადა მინდიაშვილმა ადამიანის უფლებათა დაცვის დღისადმი მიძღვნილ შეხვედრაზე, რომელსაც ამერიკის შეერთებული შტატების ელჩი რიჩარდ ნორლანდიც დაესწრო.
მინდიაშვილი ფიქრობს, რომ პრობლემა წინწყაროში ორი დეპუტატის ჩასვლამ გაამწვავა, რომლებიც მისი თქმით, “ფაქტობრივად დაეთანხმნენ მართლმადიდებლების მხრიდან გახორციელებულ მუქარას და გარდაუვლად მიიჩნევდნენ სისხლისღვრას.”
მისი ინფორმაციით, ანტიმუსულმანურ კამპანიაში სკოლის დირექტორმა და მასწავლებლებმა აქტიურად ჩააბეს მოსწავლეებიც, რომლებიც მუსლიმი ბავშვების დისკრედიტაციას ეწევიან.
“წინა პარასკევს არც ერთი ადგილობრივი მუსლიმი არ გამოვიდა სალოცავად. მლოცველები მახლობელი რაიონებიდან და სოფლებიდან ჩავიდნენ. მეჩეთის წინამძღოლმა განაცხადა, რომ უარს ამბობს სოფელში ცხოვრებაზე, რადგან მას და მის შვილებს სიცოცხლის ხელყოფით დაემუქრნენ.
იმის გამო, რომ ნიგვზიანში არ იყო ხელისუფლების ადეკვატური რეაქცია, ამან რეაქციის სახით გამოიწვია წინწყარო. მართალია პრემიერ-მინისტრმა გააკეთა განცხადება და დაგმო ძალადობა, მაგრამ მისი ინტენცია მიმართული იყო ორივე მხარისადმი, მაშინ როდესაც ერთმნიშვნელოვნად შეიძლება ითქვას, რომ მსხვერპლი ცალსახად მუსლიმი მოსახლეობაა,” _ ამბობს მინდიაშვილი.
ტოლერანტობის ცენტრის ხელმძღვანელი შინაგან საქმეთა მინისტრის განცხადებასაც შეეხო. ირაკლი ღარიბაშვილმა წინწყაროში ჩასვლის შემდეგ განაცხადა, რომ პრობლემა მოგვარებულია და არ საჭიროებს სამართალდამცავთა ჩარევას. მინდიაშვილი კი ფიქრობს, რომ პრობლემის მოგვარების ყველაზე ეფექტური გზა დამნაშავეთა დასჯაა.
“პოლიციამ პასუხი უნდა აგებინოს კონკრეტულ დამნაშავეებს, ეს არის გამოსავალი, თუ ამას არ მიმართავს, მაშინ ასეთი კერები სხვა სოფლებშიც გაჩნდება. ჩემი ინფორმაციით, ერთადერთი, რითაც გამოძიება დაინტერესდა, სასაფლაოდან ჯვრის ჩამოხსნის ფაქტია.”
მინდიაშვილი ფიქრობს, რომ სასაფლაოზე, სადაც ქრისტიანების გვერდით 7 მუსულმანია დაკრძალული, შეუარცხმყოფელია ჯვრის დაკიდება.
“წინწყაროში ჩასულმა დეპუტატებმა გასცეს დაპირება რომ ჯვრის ჩამომხსნელები დაისჯებიან. ვერავითარ კრიტიკას ვერ უძლებს ადამიანის უფლებათა დაცვის კომიტეტის თავმჯდომარის რიტორიკა ამ ინციდენტებთან დაკავშირებით,” _ ამბობს მინდიაშვილი.
ტოლერანტობის ცენტრის ხელმძღვანელი უმცირესობების დაცვის საქმეში ყოფილი ხელისუფლების დამსახურებასაც შეეხო.
“ყოფილი ხელისუფლება, მართალია, დიდი ჭოჭმანით მაგრამ მაინც ახდენდა რეაგირებას მსგავს დარღვევებზე, დააკავეს ის ადამიანები, რომლებიც სხვების რელიგიურ უფლებას ლახავდნენ. წინა ხელისუფლების დროს მიიღეს კანონი, რომელიც რელიგიურ და სექსუალურ გარემოებებს დანაშაულის დამამძიმებელ გარემოებებად თვლის.”
მინდიაშვილმა რიჩარდ ნორლანდს სოფელ უდეში კათოლიკური ეკლესიისათვის იერსახის შეცვლის შესახებაც მიაწოდა ინფორმაცია: დაიწყო ამ ტაძრისთვის კათოლიკური გუმბათის მართლმადიდებლურით შეცვლა. გალავნიდან ჩამოიღეს კათოლიკური სიმბოლოები. ეს ყველაფერი კულტურის სამინისტროსთან შეუთანხმებლად მიმდინარეობს. მსგავსი ვითარებაა ქვემო ქართლის სოფელ ასურეთში, სადაც მოსახლეობა ითხოვს ლუთერანული ტაძარი მართლმადიდებელ ეკლესიას გადაეცეს.”
ბაპტისტური ეკლესიის წარმომადგენელი საქართველოში რუსუდან გოცირიძე ამბობს, რომ წინა ხელისუფლების დროს უმცირესობების დაცვის კუთხით “მეტნაკლებად წარმატებული და წარმატებული ნაბიჯები გადაიდგა”.
“ჩვენ გვქონდა იმის შიში, რომ ის ბევრი კარგი, რაც ამ რვა წლის განმავლობაში ხდებოდა, იქნებოდა მივიწყებული. ნიგვზიანში მომხდარი ამბავი მიუთითებს, რომ შეინიშნება იზოლირება წინა მთავრობისგან და უარის თქმა ყველაფერზე, რაც წინა მთავრობამ გააკეთა,” _ განაცხადა რუსუდან გოცირიძემ.
სახალხო დამცველი უჩა ნანუაშვილი ამბობს, რომ ნიგვზიანი და წინწყარო ახალი მთავრობის ტესტია: “პარლამენტში შეხვედრის დროს, ნიგვზიანის ინციდენტთან დაკავშირებით ვთქვი, რომ ეს იყო ამ მთავრობის ერთ-ერთი შეცდომა, ხელისუფლებამ უნდა მოახდინოს მსგავს ინციდენტებზე რეაგირება.”
საია-ს წარმომადგენელი თამარ ჩუგოშვილის თქმით, პოლიციას , როგორც სახელმწიფო სტრუქტურას აქვს პოზიტიური ვალდებულება უზრუნველყოს უმცირესობების უფლებების დაცვა, თუმცა ტოლერანტობის პოლიციის მეშვეობით შემოტანა შეუძლებელია: “ქვეყანაში ტოლერანტული საზოგადოების ჩამოყალიბებას სჭირდება სამოქალაქო საზოგადოების განათლება, ის უნდა შევიდეს სასწავლო პროგრამებში და ბავშვებს საბავშვო ბაღიდან ვასწავლოთ. ამავე დროს პოლიტიკოსების განცხადებები უნდა იყოს განსხვავებული და მოხდეს ძალადობრივი ფაქტების გამოძიება.”
ჩუგოშვილმა ადამიანის უფლებათა დაცვის კომიტეტის თავმჯდომარე ეკა ბესელია ნიგვზიანის ინციდენტის შეფასების გამო გააკრიტიკა: “ბესელიამ ნიგვზიანის ინციდენტთან დაკავშირებით განაცხადა, რომ ადამიანის უფლებათა დარღვევა არ მომხდარა. ადამიანის უფლებათა დამცველი მსგავს განცხადებას არ უნდა აკეთებდეს”, _ ამბობს თამარ ჩუგოშვილი.
ამერიკის შეერთებული შტატების ელჩი რიჩარდ ნორლანდი აცხადებს, რომ ქართველი ხალხი ბუნებით ტოლერანტია და გარდამავალ პერიოდს ეს მიღწევა არ უნდა შეეწიროს: “მინდა შევეხო რელიგიური უმცირესობის საკითხს, რაც საქართველოში მცხოვრები მუსლიმების ლოცვის უფლებას შეეხება. საქართველოში ტოლერანტობის ტრადიცია არსებობს, ბოლო წლებში ეს თვისება კიდევ უფრო გაძლიერდა. გარდამავალ პერიოდს ეს პოზიტიური მიღწევა არ უნდა შეეწიროს.
ერთ მშვენიერ დღეს შეიძლება გაიღვიძო და აღმოაჩინო, რომ უმცირესობას ეკუთვნი. ეს შეიძლება იყოს რელიგიური ან სექსუალური უმცირესობა,” _ აცხადებს რიჩარდ ნორლანდი.
