“მედიაპრო ჯორჯიას” გუნდი სულ სამი თანამშრომლისაგან შედგება. ორგანიზაცია საბურთალოზე მდებარე ოროთახიან ოფისში არის განთავსებული. შენობა არც თუ ისე კეთილმოწყობილია, ოფისის ორი ოთახიდან ერთ-ერთს კი “მედიაპრო ჯორჯიას” თანამშრომლები, რამდენიმე სხვა პირთან ერთად ინაწილებენ. ოთახის კარზე არანაირი აბრა არ მიუთითებს შენობაში ისეთი მსხვილი კომპანიის არსებობაზე, რომლის შემოსავალმაც 2011 წელს, დაახლოებით 6.5 მილიონი ლარი შეადგინა.
კომპანია “მედიაპრო ჯორჯიას”, რომელიც 2008 წელს თბილისში დაფუძნდა, დღეს საქმიანობის პროფილი აქვს შეცვლილი. “მედიაპრო ჯორჯია” 2010 წლის 26 ივლისს ჯერ ერთმა ლიტვურმა კომპანია “კონტლანდმა” შეისყიდა, ხოლო იმავე წლის 17 აგვისტოს მონაცემებით, მეორე ლიტვურმა ფირმა “მედიაფონმამ“ კომპანიის 80% შეიძინა. “მედიაპრო ჯორჯიას” დირექტორია ნიკოლოზ მურღულია, რომელიც 2010 წლის ივლისის ბოლომდე კომპანიის 10% წილის მფლობელი იყო, ხოლო დანარჩენი 10% ეკუთვნოდა ნორვეგიაში რეგისტრირებულ კომპანია “სისტორ ინტერეუროპ სისტემს ას”. კომპანია იმ კომპიუტერული პროგრამების მწარმოებელია, რომელთაც ქართველი ადმინისტრატორი სააბონენტო ნომრების პორტაბელურობის მართვისას იყენებს. 2011 წლის დეკემბერში “მედიაფონმა” დარჩენილი 20% შეიძინა და მას შემდეგ ლიტვური კომპანია “მედიაპრო ჯორჯიას” ერთადერთი მფლობელია.
“მედიაპრო ჯორჯია” განსაკუთრებული კომპანიაა, რომელსაც საქართველოს კომუნიკაციების ეროვნულმა კომისიამ ათი წლით მონოპოლისტის სტატუსი მიანიჭა. კომპანია მაშინ გამოდის ასპარეზზე, როდესაც სატელეფონო ქსელის მომხმარებელს (ფიქსირებული ან მობილური) ქსელის სხვა ოპერატორზე გადასვლა სურს, ამასთან თავისი ძველი ნომრის შენარჩუნების გზით. კომპანია სწორედ ამ მომსახურებას უზრუნველყოფს. “მედიაპრო ჯორჯია” ფლობს მონაცემთა ბაზას, სადაც სატელეფონო ნომრების და ქსელის შესაბამისი ოპერატორების კავშირია აღწერილი. ოპერატორის შეცვლისას, მომხმარებლები გადასახადს არ იხდიან, ისევე, როგორც ეს ევროკავშირის წევრ ქვეყნებშია. ამ საფასურს საქართველოში არსებული მობილური ქსელის ოთხი და ფიქსირებული სატელეფონო ქსელის 27 ოპერატორი კომპანია იხდის.
ზოგიერთი კომპანია ამით უკმაყოფილოა, რადგან მიაჩნიათ, რომ “მედიაპრო ჯორჯიას” საკმაოდ სოლიდურ თანხებს უხდიან უმნიშვნელო ტექნიკური ხასიათის მომსახურებისთვის. “მედიაპრო ჯორჯიას” დირექტორი ნიკოლოზ მურღულია ამბობს, რომ ორმა მობილური ქსელის ოპერატორმა კომპანიამ “მედიაპრო ჯორჯიას” წინააღმდეგ სარჩელი სასამართლოში შეიტანა. სარჩელები განხილვის პროცესშია.
მცირე ფიქსირებული ქსელის ოპერატორები კი ჩივიან, რომ ისინი შესაძლოა ბაზრის შერწყმის შედეგად, საერთოდ გაქრნენ სამომხმარებლო ბაზრიდან, რადგან მომხმრებლებს უკვე შეუძლიათ ნომრის შეცვლის გარეშე გადავიდნენ უფრო მსხვილ ოპერატორებთან, მაშინ, როდესაც მარეგულირებელი კომისია ფიქსირებული ტელეფონით მომსახურების ფასებს არ არეგულირებს.
“ტენდერი გამჭვირვალედ ჩატარდა და ჩვენ მოვიგეთ,”_ ამბობს ნიკოლოზ მურღულია, “მედიაპრო ჯორჯიას” დირექტორი, _ “ტენდერისთვის მოთხოვნები სამუშაო ჯგუფმა შეიმუშავა, რომელიც ექსპერტებისა და ოპერატორების წარმომადგენლებისგან შედგებოდა. ასევე, გადაწყვეტილება იმ კომისიამ მიიღო, რომელშიც ქსელის ოპერატორებიც შედიოდნენ.” მურღულია ამბობს, რომ ნეიტრალური კომპანიის მიერ ნომრის პორტირების პროცესის მართვა უკვე გამოცდილი და კარგი მიდგომაა.
ნომრის პორტირების შესაძლებლობა საქართველოში 2011 წლის თებერვალში გაჩნდა. მარეგულირებელმა კომისიამ ეს გადაწყვეტილება პროვაიდერებს შორის კონკურენციის გაზრდის მიზნით მიიღო. 2012 წლის ოქტომბრისთვის მობილური ტელეფონის 110,453-მა მომხმარებელმა შეიცვალა მობილური ქსელის ოპერატორი პორტირების გზით.
ნომრის პორტირების შემოღებისთვის მზადება 2010 წელს დაიწყო, როდესაც მარეგულერებელმა კომისიამ პროცესის მიმდინარეობის წესები განსაზღვრა და გამოაცხადა კონკურსი იმ კომპანიის შესარჩევად, რომელსაც ნომრები ერთი ქსელიდან მეორეში უნდა გადაერთო.
ადგილობრივ ოპერატორებს გამოცხადებულ ტენდერში მონაწილეობის უფლება არ ჰქონდათ. განაცხადი სამმა კომპანიამ წარადგინა: შპს “კეთ ენდ კეთ მედია”, შპს “მედიაპრო ჯორჯია” და თურქული კომპანია სს “განთექ თექნოლოჯი ბილიშიმ ჩოზუმლერიმ”.
სატენდერო კომისიის უმრავლესობის გადაწყვეტილებით, კონკურსში გამარჯვებულად კომპანია “მედიაპრო ჯორჯია” გამოცხადდა. კომუნიკაციების ეროვნულმა კომისიამ კომპანიასთან 10- წლიანი ხელშეკრულება გააფორმა, რითაც “მედიაპრო ჯორჯია” სააბონენტო ნომრების პორტაბელურობის მონოპოლისტი ადმინისტრატორი გახდა.
ელექტრონული საკომუნიკაციო ქსელებითა და საშუალებებით უზუნველყოფაზე და /ან მომსახურებაზე ავტორიზებული პირები ვალდებულნი არიან მათ მფლობელობაში არსებულ ყოველ სააბონენტო ნომერზე ადმინისტრატორს გადაუხადონ წლიური 0,38 ევროს ეკვივალენტი ლარებში. სატელეფონო ოპერატორებს მფლობელობაში კლიენტების რეალურ რაოდენობაზე მეტი ნომერი გააჩნიათ. აღნიშნული რეზერვი კომპანიებს პოტენციური მომხმარებლებისთვის მომსახურების გაწევაში ეხმარება. პორტაბელურობის წესების ძალაში შესვლის შემდეგ კი, ოპერატორებმა შეამცირეს მათ განკარგულებაში არსებული ნომრები და კომუნიკაციების ეროვნულ კომისიას ისინი უკან დაბრუნეს.
მიმდინარე წლის ოქტომბერში, საპარლამენტო არჩევნების შემდეგ, “მედიაპრო ჯორჯიამ” სატელეფონო და მობილურ ოპერატორებს წერილით აცნობა, რომ ტარიფის 0,38 ევროდან 0,32 ევრომდე შემცირებას გეგმავდა.
არასამთავრობო ორგანიზაცია “საერთაშორისო გამჭვირვალობა _ საქართველო” კომუნიკაციების ეროვნულ კომისიას სატარიფო პოლიტიკისა და “მედიაპროსთან” დადებული ხელშეკრულების გადახედვისაკენ მოუწოდებს.
“სასურველია, რომ კომუნიკაციების ეროვნულმა კომისიამ გადახედოს სატარიფო პოლიტიკასა და ზოგადად, მთელ კონტრაქტს. მაგალითისთვის, პორტაბელურობის ტარიფი ავტორიზებული ოპერატორებისთვის ევროპის წევრ სახელმწიფოში როგორიცაა ლიტვა, სადაც არის რეგისტრირებული “მედიაპრო ჯორჯიას” მფლობელი კომპანია უფრო დაბალია (0, 29 ევრო ცენტი), ვიდრე საქართველოში. “მედიაპრო ჯორჯიამ” და კომუნიკაციების ეროვნულმა კომისიამ საჯარო უნდა გახადონ ინფორმაცია ადმინისტრატორის მიერ გახორციელებული ინვესტიციის და იმ გადასახადის შესახებ, რომელსაც კომპანია სერვერის კომპიუტერული მომსახურებისთვის იხდის. სასურველია, რომ კომუნიკაციების ეროვნულმა კომისიამ სააბონენტო ნომრების პორტაბელურობის ადმინისტრატორის საქმიანობის პერიოდული შეფასება განახორციელოს და კვლევის შედეგები გამოაქვეყნოს,” _ ნათქვამია “საერთაშორისო გამჭვირვალობა _ საქართველოს” მიერ მომზადებულ ანგარიშში.
