შეგახსენებთ, რომ ვალერი ცერცვაძე, ამავდროულად, იუსტიციის უმაღლესი საბჭოს მდივანიცაა და ის ამ პოზიციაზე 2011 წლის 6 ნოემბრის გადაწყვეტილებით, ასევე მეორე ვადით აირჩიეს.
თუმცა, ოფიციალური ინფორმაცია ვალერი ცერცვაძის ახალი ვადით დანიშვნის შესახებ არც გახმაურებულა და არც სააპელაციო სასამართლოსა და იუსტიციის უმაღლესი საბჭოს ვებგვერდზე იძებნება.
საინტერესოა ის ფაქტიც, რომ სააპელაციო სასამართლოს თავმჯდომარეს ნიშნავს იუსტიციის უმაღლესი საბჭო, რომლის თავმჯდომარე უზენაესი სასამართლოს თავმჯდომარე კოტე კუბლაშვილია, მდივანი კი _ თავად ვალერი ცერცვაძე.
ამასთან დაკავშირებით კითხვა ვალერი ცერცვაძესაც დავუსვით, როდესაც სხვა საკითხზე კომენტარის ჩაწერისას მის სტატუსს ვაზუსტებდით. ჯერ კიდევ არ ვიცოდით, რომ ის მეორე ვადით იყო არჩეული.
_ ბატონო ვალერი, გარდა იუსტიციის უმაღლესი საბჭოს მდივნობისა, როგორ მოგიხსენიოთ, რა სტატუსით?
_ მე სააპელაციო სასამართლოს თავმჯდომარე გახლავართ.
_ თქვენ ხომ ამოგეწურათ უფლებამოსილება?
_ ამომეწურა, მაგრამ მეორე ვადით მოხდა ჩემი დანიშვნა.
_ ასე ჩუმად და უხმაუროდ?
_ რატომ უხმაუროდ, გეგონათ, რომ მე აღარ ვიქნებოდი?
_ არა, მეგონა, რომ ამის შესახებ რაიმე ინფორმაცია გავრცელდებოდა.
_ ეს ინფორმაცია დევს ჩვენს საიტზე…
როგორც უკვე მოგახსენეთ, ინფორმაცია ჩვენ ვერც სააპელაციო სასამართლოს საიტზე ვიპოვეთ და ვერც იუსტიციის უმაღლესი საბჭოს. მისი არსებობა ვერც პრესსამსახურმა დაადასტურა.
ეს ცვლილება მაინცდამაინც მნიშვნელოვნად არ მიაჩნია იუსტიციის მინისტრის პირველ მოადგილეს, სანდრო ბარამიძეს, რომელმაც მართალია, დაკავებულობის გამო სრული პასუხი ვერ გაგვცა, მაგრამ ორი სიტყვის თქმა მაინც მოასწრო:
_ რომ შევა ცვლილება, იქ ვალერი ცერცვაძე არ იქნება უბრალოდ, დანიშნეს, დანიშნეს, რა ვუყოთ, _ განაცხადა სანდრო ბარამიძემ.
