“სამინისტროს ბიუჯეტის ნახევარზე მეტი, საავტომობილო გზების დეპარტამენტზე მოდის. ამიტომაც, ჩვენი უწყება ორი მნიშვნელოვანი გამოწვევის წინაშე დგას; პირველი _ მოხდეს ფინანსების რაციონალური და ეფექტური ხარჯვა და მეორე _ საგზაო სამუშაოების ხარისხი მნიშვნელოვნად გაუმჯობესდეს, რათა გზების ექსპლუატაციის ვადა უფრო ხანგრძლივი იყოს. საქართველოში გზების დიდი ნაწილი უცხოური კრედიტით კეთდება და მნიშვნელოვანია, რომ ვიდრე კრედიტების გასტუმრების ვადა დადგება, გზებმა, მინიმუმ, ამ პერიოდამდე მაინც გაძლოს…
გზებზე შესრულებული სამუშაოების ხარისხი გაკონტროლდება. ამ მიმართულებით შიდა სამსახურები მუშაობენ. ასევე, საკმაოდ აქტიურად იმუშავებს ლევან სამხარაულის სახელობის სასამართლო ექსპერტიზის ეროვნული ბიურო,“ _ აცხადებს დავით ნარმანია.
რეგიონული განვითარების სამინისტროს მიმართვის საფუძველზე ექსპერტიზის ეროვნული ბიურო არა მარტო გზებზე გახორციელებული სამშენებლო _ სარეაბილიტაციო სამუშაოების, არამედ, ყველა იმ პროექტის ხარისხს გააკონტროლებს, რომლებიც სამინისტროს დაფინანსებით ხორციელდება. დავით ნარმანიას განცხადებით, ეს სიახლე ყველა დასრულებულ პროექტზე არ გავრცელდება. “თითოეული მათგანის გადამოწმება შეუძლებელია.ახლა ვმუშაობთ, როგორ მოხდეს დასრულებული პროექტების გადამოწმების პროცესი. შემთხვევითი შერჩევის პრინციპით, თუ გარკვეულ პრიორიტეტებზე იყოს დაფუძნებული.”
უკვე დასრულებული პროექტებისგან განსხვავებით, განურჩევლად გაკონტროლდება მიმდინარე და მომავალში დაწყებული სამშენებლო- სარეაბილიტაციო სამუშაოების ხარისხი. ექსპერტიზის ეროვნული ბიურო ინფრასტრუქტურის სამინისტროს მიერ მითითებულ პროექტებს უფასოდ გააკონტროლებს. ამ ინიციატივით დავით ნარმანია 3 კვირის უკან გამართულ მთავრობის სხდომაზე გამოვიდა.
“მთავრობის სხდომაზე ჩვენ წარვადგინეთ ინიციატივა, რომ ინფრასტრუქტურული პროექტების ხარისხი ლევან სამხარაულის სახელობის სასამართლო ექსპერტიზის ეროვნულ ბიუროში შემოწმდეს. ამ შეკვეთისთვის კი, სამინისტრო შესაბამისი მოსაკრებლიდან გათავისუფლდეს. ინიციატივას საქართველოს მთავრობამ მხარი დაუჭირა. ეროვნული ბიურო უფასოდ მოგვემსახურება და ჩვენს მიერ მითითებული პროექტების ხარისხს მკაცრად გააკონტროლებს,” _ აცხადებს დავით ნარმანია.
