რატომ ამოიღეს სიიდან სიმსივნის მეოთხე სტადიით დაავადებული პატიმარი

სტატიაში საუბარი იყო გლდანის #18 მსჯავრდებულთა და ბრალდებულთა სამკურნალო დაწესებულების ქირურგიულ განყოფილებაში 14 ოქტომბერს შეყვანილ პატიმარზე, რომელიც სიმსივნის მძიმე ფორმით არის დაავადებული.

სამედიცინო დასკვნაში, რომელსაც ხელს აწერს მედიცინის დოქტორი, #18 მსჯავრდებულთა და ბრალდებულთა სამკურნალო დაწესებულების ქირურგიული განყოფილების ონკოლოგი თეიმურაზ ქემოკლიძე, ვკითხულობთ: “ავადმყოფს ჩაუტარდა მუცლის ღრუსა და გულ-მკერდის ღრუს კომპიუტერული ტომოგრაფიული კვლევები… ტომოგრაფიული მონაცემებით უდგინდება მარცხენა ფილტვის კიბო, მეტასტაზები თირკმელზედა ჯირკვალში, ელენთაში, მუცლის წინა კედელში (დაწყლულებით) და ლიმფურ კვანძებში. ზოგადი მდგომარეობა მძიმეა, გამოხატულია სიმსივნური ინტოქსიკაცია. დაავადება IV სტადიისაა, პაციენტი მიეკუთვნება IV კლინიკურ ჯგუფს”

პატიმრის მეუღლე, საქართველოს პრეზიდენტს მიხეილ სააკაშვილს და საქართველოს სასჯელაღსრულების, პრობაციისა და იურიდიული დახმარების საკითხთა მინისტრს სოზარ სუბარს თხოვდა, მის მეუღლეს შემსუბუქებოდა სასჯელი და  საკუთარ სახლში სიკვდილის უფლება მიეცათ…

“დახმარებას ვთხოვ ყველა სამართალდამცავი ორგანოს წარმომადგენელს, ქალბატონ თეა წულუკიანს, ქალბატონ ეკა ბესელიას, პროკურატურას… გაითვალისწინეთ ჩემი მეუღლის ჯანმრთელობის მდგომარეობა და გთხოვთ, მიეცით ჩემს მეუღლეს ოჯახში სიკვდილის უფლება,” _ ამბობს პატიმრის მეუღლე.

როგორც “გურია ნიუსისთვის” გახდა ცნობილი, პატიმარი კ.ჯ. ვერ მოხვდა მძიმედ დაავადებულ პატიმართა სიაში.  მისი მდგომარეობა ამ წუთისთვის ძალიან მძიმეა. იგი ინვალიდის სავარძელის გარეშე გადაადგილებას ვერ ახერხებს.

იმის გასარკვევად, თუ რატომ ვერ მოხვდა გლდანის #18 მსჯავრდებულთა და ბრალდებულთა სამკურნალო დაწესებულების ქირურგიულ განყოფილებაში მყოფი პატიმარი კ.ჯ გასათავისუფლებელ პატიმართა სიაში, სასჯელაღსრულების, პრობაციის და იურიდიული დახმარების სამინისტროს საზოგადოებასთან ურთიერთობის სამსახურის უფროსს, რეზო ხოფერიას ვესაუბრეთ.

“როგორც დეპარტამენტის უფროსმა განაცხადა, ამ პატიმართან დაკავშირებით, პირადად  გაეცანო მის საქმეს და ნახა, რომ ჩვენთან დეპარტამენტს ამ მსჯავრდებულის საქმე განხილული აქვს. მისი საქმე  გადაგზავნილი გვქონდა და სიაშიც იყო,  მაგრამ არ ვიცით შემდეგ რა მოხდა;  სად მოხდა ამ ადამიანის სიიდან ამოღება და უარის თქმა.

ჩვენს შემდეგ ორი ინსტანცია არის გასავლელი. დეპარტამენტიდან _ სამინისტროში იგზავნება, შედეგ _ პროკურატურაში, ანუ რაღაც ფილტრებია და ერთ-ერთს  უარი აქვს ნათქვამი. ეს უკვე დეპარტამენტის უფროსს აღარ ეხება. პატიმარ კ.ჯ-ს  უმძიმესი მდგომარეობა აქვს. მაგრამ, როგორც კი ამის საშუალება იქნება და ჯანდაცვის სამინისტროსთან ერთად, მუდმივმოქმედი კომისია შეიქმნება, პირველი  ამ პატიმრის   საკითხი გადაწყდება.

კონკრეტული მიზეზი ნამდვილად არ ვიცით რა მოხდა”, _ ამბობს ხოფერია.