“ეს არის პოლიტიკური და სამართლებრივი დანაშაულის კომპლექსი და ამ საკითხის განხილვა მიზნად უნდა ისახავდეს არა ვინმეს პასუხისმგებლობის საკითხის გარკვევას, არამედ ობიექტური რეალობის დადგენას. რამდენად არის შესაძლებელი სამართლებრივი კომპონენტის პოლიტიკურისაგან გამოყოფა, ძნელი სათქმელია. ამიტომაც დღეის მდგომარეობით, არც პროკურატურაში და არც სხვა სამართალდამცავ სტრუქტურაში 2008 წლის ომის გამოძიება არ მიმდინარეობს. ჩვენ ზედაპირზე გვაქვს ისეთი საქმეები, სადაც პოლიტიკური ჩამოშორებულია და სამართლებრივ ფარგლებში ვართ. არ ვიცი, იქნებ ამ საკითხის შესასწავლად უკეთესი მექანიზმი პარლამენტის საგამოძიებო კომისიაა. პროკურატურა კანონის მიხედვით არის პოლიტიკური ნეიტრალიტეტის ორგანო. კარგად არის გასააზრებელი, რომ არ შევიდეთ ისეთ თამაშში, სადაც პოლიტიკას გვერდს ვერ ავუვლით. ვფიქრობ, რომ ომის შესაფასებლად რაღაც დროის გასვლაც არის საჭირო, რადგან როდესაც ხელისუფალს და მოქმედ გუნდს უპირისპირდები, იქ თავისთავად იკლებს ობიექტურობის ხარისხი.
ჩვენი უწყებისთვის 2008 წლის ომის გამოძიება არის შეუთავსებელი და შეუძლებელი. ასე რომ, საზოგადოებამ სხვაგვარად უნდა დაალაგოს ეს საკითხი,” _ აცხადებს მთავარი პროკურორი არჩილ კბილაშვილი.
სახალხო დამცველის უჩა ნანუაშვილის თქმით, 2008 წლის აგვისტოს ომი სისხლის სამართლის საერთაშორისო სასამართლოში კვლავაც წინასწარი გამოძიების ეტაპზეა: “ჯერჯერობით, პროკურორს არ მიუღია გადაწყვეტილება, დაიწყება თუ არა ოფიციალური გამოძიება. ჩემი ღრმა რწმენით, საქართველოს, როგორც ომის სტატუსით მონაწილე სახელმწიფოს, აქვს ვალდებულება, რომ შეასრულოს სტატუსით ნაკისრი ვალდებულებები. ჩვენდა სამწუხაროდ, ამას ვერ გავექცევით. შესაძლოა, ეს საკითხი დღეს არ დგას, მაგრამ ხვალ აუცილებლად დადგება”.
