თუ თებერვალში კონკრეტულმა აბონენტებმა ენერგოვაუჩერი მიიღეს, მარტში მათ 30-ლარიანი სასურსათო ვაუჩერი გადაეცემათ. არ არის გამორიცხული, რომ ეს ვაუჩერებიც დენის ვაუჩერის მსგავსად გადანაწილდეს. როგორც იცით, ამ ეტაპზე ენერგოვაუჩერით ის ხალხი დასაჩუქრდა, ვინც აქტიური მომხმარებელი იყო. ტელევიზიები ხშირად ატრიალებენ კადრებს, როგორ ჩუქნის ვაუჩერს “მდიდარი” აბონენტი “ღარიბს” _ არსენას მოდიფიცირებულ მეთოდებს ხელისუფლება წარმატებით იყენებს _ “მდიდარს ჯერ აძლევს, შემდეგ ართმევს და ღარიბს აძლევს!”
პარლამენტარი გოჩა შანიძე ამბობს, რომ 30-ლარიან სასურსათო ვაუჩერების დარიგების ინიციატივა პირადად პრეზიდენტს ეკუთვნის, მისი გაცემა მარტიდან გახორციელდება და საქართველოში მცხოვრები ყველა ოჯახი მიიღებს:
“ამ საკითხის მომზადებას და განაწილების წესის დადგენას პრეზიდენტის ადმინისტრაცია და საქართველოს მთავრობა განახორციელებს ერთობლივად.
სასურსათო ვაუჩერის შემთხვევაში, მთავარი მომენტი მხოლოდ ის კი არ არის, რომ არსებული ინფლაციის პროცესში სახელმწიფო ეხმარება მოსახლეობას, არამედ ის ,რომ მოსახლეობას თავად შეუძლია დაეხმაროს ერთმანეთს ანუ შესაძლებელი იქნება სასურსათო ვაუჩერის გადაცემა უფრო შეჭირვებული და სოციალურად დაუცველი ოჯახებისთვის, მათ კი შეეძლებათ ეს ვაუჩერი ბანკში გაანაღდონ”, _ გვითხრა შანიძემ.
“ქრისტიან-დემოკრატების” ერთ-ერთი ლიდერის გიორგი ახვლედიანის თქმით, ვაუჩერების დარიგებას, ერთი კონკრეტული მიზანი აქვს _ ხელისუფლება ცდილობს, 50 მილიონად ხელისუფლებაში ყოფნის “ნებართვა” იყიდოს ანუ როგორმე შეაჩეროს საზოგადოებრივი უკმაყოფილების ქუჩაში გადმოღვრა: _ ფასების ზრდის, სოციალური მდგომარეობის მკვეთრი გაუარესების ფონზე, ნაციონალური მოძრაობა და მისი პირველი პირი მიხეილ სააკაშვილი, ვერ სთავაზობენ ქვეყანას რეალურ ანტიკრიზისულ გეგმას. ის, რომ, თურმე, საქართველოში სურსათი იმიტომ გაძვირდა, ჩინელებმა ჭამა დაუწყეს, არასაკმარისი “არგუმენტია” გაჭირვებული ქართველისთვის. ხელისუფლება უსუსურია იმ გამოწვევების წინაშე, რომელიც ეკონომიკურ კრიზისს მოჰყვა. ამიტომაც, ათუხთუხებული ქვაბიდან ორთქლის გამოშვების მიზნით, ხელისუფლებამ ჩვენი მოსახლეობის ჯიბიდან გადასახადების სახით ამოღებული საბიუჯეტო სახსრების ისევ უკან დაბრუნება გადაწყვიტა, ოღონდ დაამატა საკუთარი პიარი, თუ როგორი კეთილი ხელისუფლება გვყავს.
_ ბატონო გიორგი, კულუარებში საუბრობენ, რომ შეიძლება, საქართველოში ვადამდელი არჩევნები ჩატარდეს და ამიტომ ხელისუფლებამ მსგავსი აქციებით დაიწყო საარჩევნო კამპანია.
_ რაც შეეხება ვადამდელ არჩევნებს, მართალია ეს ხელისუფლების ინტერესში შეიძლება შედიოდეს, (2012-ის შემოდგომაზე მათი რეიტინგი არსებული კრიზისის გამო შესაძლოა ბევრად ნაკლები იყოს), მაგრამ ნაკლებად რეალურად მიმაჩნია. ქვეყანაში მიმდინარეობს საარჩევნო კოდექსზე მოლაპარაკების უმნიშვნელოვანესი პროცესი და, სავარაუდოდ, ამ კოდექსის დამტკიცება ზაფხულამდე არ მოესწრება. კოდექსის მიღებიდან არჩევნებამდე კი, უცხოელი პარტნიორების მოთხოვნით, მინიმუმ, ერთი წელი მაინც უნდა გავიდეს. გარდა ამისა, ვადამდელი არჩევნების ჩატარება სერიოზულ ცვლილებებს მოახდენს ახალი კონსტიტუციის ძალაში შესვლის ვადებზე, რამაც უამრავი გაუთვალისწინებელი პროცესი შეიძლება წარმოშვას. ასე რომ, ვადამდელი არჩევნების ჩატარების შანსები მცირეა, თუმცა, ქართულ პოლიტიკაში შეუძლებელი არაფერია.
“თავისუფალი დემოკრატების” ერთ-ერთი ლიდერი სულხან ღლონტი “გურია ნიუსთან” საუბარში ამბობს, რომ ნაციონალური მოძრაობა, მთელი ამ წლების განმავლობაში გეგმავდა და აწარმოებდა არასწორ ეკონომიკურ პოლიტიკას და ამიტომ გახდა საჭირო მსგავსი, ერთჯერადი დახმარებები გაეცათ: _ საქართველოს მოსახლეობას კარგად ესმის, რომ მსგავსი პოპულისტური აქციებით მათი პრობლემები ვერ მოგვარდება. ხელისუფლების პოლიტიკა, რომ ვაუჩერებით მოსახლეობა მოატყუოს, რეალურად შედეგს ვერ გამოიღებს. პრობლემების მოგვარება დაიწყება მაშინ, როცა ისინი ხელისუფლებიდან წავლენ და ახალი ხელისუფლება სწორ ეკონომიკურ პოლიტიკას გაატარებს, _ გვითხრა ღლონტმა.
“გურია ნიუსმა” ამ საკითხზე 20 მოქალაქე გამოკითხა. უმრავლესობა ამბობს, რომ 30 ლარად მხოლოდ ერთ ტომარა (25 კგ.) პურის ფქვილს იყიდის. ერთი ნაწილის თქმით, 20 და 30-ლარიან ვაუჩერით ხელისუფლება მოსახლეობას დამშვიდებას ცდილობს:
_ ყველაფერი ძვირდება და ეს 30-ლარიანი ვაუჩერი მხოლოდ რამდენიმე დღეს თუ გვიშველის. დამცირებულად ვგრძნობთ თავს. მეორე თვე დაიწყო და ყველგან არ არის დარიგებული დენის ვაუჩერი, ალბათ, ასე იქნება სურსათის ვაუჩერის დარიგების დროსაც. ახლა ამბობენ, რომ წყალზეც იქნება გადასახადიო. ბახვიდან ვარ, სად არის იქ წყალი? წყლის გამო ჩემმა შვილმა მოიტეხა ფეხი და სამკურნალოდ ახლა დამყავს… ერთი დღის სამყოფია 30 ლარის პროდუქტი, შემდეგ რა ვქნათ? _ გვითხრა ერთ-ერთმა ბახველებმა, რომელიც ოზურგეთში პროდუქტების შესაძენად იყო ჩამოსული.
