“2012 წლის 1 ოქტომბერს, ქართველმა მოსახლეობამ გააკეთა თავისი არჩევანი. ადგილობრივი თვითმმართველობის წარმომადგენლები ამბობენ, რომ 2014 წლამდე იმუნიტეტი გვაქვს და არ წავალთო. აქ შეკრებილ ქობულეთის რაიონის მოსახლეობის მთავარი მოთხოვნაა, რადგან ხმა მივეცით “ქართულ ოცნებას”, დაე, პასუხისმგებლობა აიღოს კოალიციამ ხელისუფლების ყველა შტოში. გადადგეს ქობულეთის რაიონის პირველი და მეორე პირები და რაიონული განყოფილების ხელმძღვანელები ყველა შტოში,” – ამბობს აქციის მონაწილე, ქართული ოცნების აქტივისტი გიორგი მიქელაძე.
“მიუხედავად იმისა, რომ კომუნისტები იყვენენ ამ შენობაში 70 წელი, 1991 წელს ეყოთ სინდისი და გადადგნენ. აღორძინების წევრებიც მაშინვე გადადგნენ, რაც ნაცისტები მოვიდნენ. ამათ კიდევ არ ყოფნით ჭკუა და არ მიდიან,” _ ამბობს თამაზ გოგიბერიძე.
აქციის პარალელურად, ქობულეთის გამგებელთან შესახვედრად კოალიციის წარმომადგენლები და მოსახლეობის ნაწილი გამგებლის კაბინეტში შევიდა. რამდენიმე წუთიანი ხმაურიანი შეხვედრა “ქართული ოცნებისთვის” წარუმატებელი აღმოჩნდა. შეხვედრა ყვირილისა და შეურაცხმყოფელი სიტყვების ფონზე მიმდინარეობდა.
“ჩვენ, “ქართული ოცნების” წარმომადგენლები მოვედით აქ, რადგან შეკრებილი იყო მოსახლეობა. შევხვდით მოსახლეობას, ვისაუბრეთ და მოსახლეობამ გვაიძულა შევხვედროდით რაიონის ხელმძღვანელობას. რაიონის გამგებელს თენგიზ ზოიძეს ვესაუბრეთ და ვკითხეთ, აპირებს თუ არა გადადგომას ან კოჰაბიტაციას. როგორც აღმოჩნდა, იგი არ აპირებს არც გადადგომას და არც კოჰაბიტაციის რეჟიმში მუშაობას,” – აცხადებს კოალიციის წარმოადგენელი მაყვალა ცენტერაძე.
თანამდებობისან გადადგომას არ აპირებს რაიონის მოქმედი გამგებელი თენგიზ ზოიძე. მისი თქმით, აქციის მონაწილეები ვერ აკონკრეტებენ, რატომ უნდა გადადგეს იგი.
“მოთხოვნა იყო, უბრალოდ, გადადექი, მაგრამ რატომ გადადექი, არგუმენტირებულად არ იყო. ამბობდნენ, რომ უნდა გადადგე, რადგან ჩვენ ვართ გამარჯვებული კოალიციის წარმომადგენლები და ჩვენ უნდა მოვიდეთ როგორც ცენტრალური, ასევე ადგილობრივ დონეზე. ჯერჯერობით არ ვაპირებ თანამდებობის დატოვებას და ვრჩები კვლავ გამგებლად,” – განაცხადა თენგიზ ზოიძემ.
ქობულეთის გამგეობასთან შეკრებილი მოსახლეობა უარყოფს, რომ მათ კავშირი აქვთ კოალიცია “ქართულ ოცნებასთან”, თუმცა მოლაპარაკებაზე შესული “ოცნების” წარმომადგენლები და აქციაზე მყოფი ის პირები, რომლებიც საარჩევნოდ კოალიციის სახელით ეწეოდნენ აგიტაციას, ადასტურებენ, რომ მიმდინარე პროცესებში აქტიურად არიან ჩართულები.
