(გურია ნიუსი, ლანჩხუთი) _ ლანჩხუთის “გურიამ” და ოზურგეთის “მერცხალმა” გასულ პარასკევს წარუმატებლად იასპარეზეს _ ორივე გურულმა კლუბმა დიდი ანგარიშით მარცხი განიცადა. ლანჩხუთელებმა უმაღლეს ლიგაში გადასვლის პრეტენდენტი ბათუმის “დინამო” მიიღეს. ჩვენებურებს წარმატების შემთხვევაში აჭარლებისთვის გადასწრება და მეოთხე ადგილზე აღზევება შეეძლოთ, მაგრამ შესუსტებულმა და უფულოდ დარჩენილმა “გურიამ” ფავორიტთან ვერაფერი გააწყო. მეტიც, საკუთარ მოედანზე დიდი ანგარიშით (1:4) დამარცხდა. პირველ წრეში ბათუმელებმა 5:1 გაიმარჯვეს, თუმცა იმ შეხვედრაში, თვითმხილველთა თქმით, რაოდენ გასაკვირიც არ უნდა იყოს, უპირატესობას “გურია” ფლობდა(!!!). რასაც ვერ ვიტყვით ლანჩხუთურ მატჩზე. აღსანიშნავია ისიც, რომ ლანჩხუთელებმა გუნდის ძირითადი გოლკიპერი მიხეილ გოგუაძე წინა შეხვედრაში ხონში მიღებული მესამე ყვითელი ბარათის გამო მოისაკლისეს. საინტერესოა ის ფაქტიც, რომ გურულებმა გოლი პირველივე წუთზე, ბურთის გათამაშებისთანავე მიიღეს.
ამ წაგებით, “გურია” კვლავ მეხუთე ადგილზე რჩება, მოწინავე 2 გუნდში მოხვედრის შანსს, მართალია, კიდევ ინარჩუნებს, თუმცა, “გურიამ” წელს ლიცენზირებაზე უარი თქვა, რაც იმის წინაპირობაა, რომ სპორტული წარმატების შემთხვევაშიც კი უმაღლეს ლიგაში ვერ გადავლენ. მორიგ შეხვედრას “გურია” 9 მარტს ჭიათურაში ლიგის აუტსაიდერ “მაღაროელთან” გამართავს.
ასევე დიდი ანგარიშით წააგო “მერცხალმა” _ ჩვენებურები ბათუმში “ადელს” ესტუმრნენ და 0:3 წააგეს. პირველი წრის შეხვედრაში ოზურგეთელებმა მეტოქე 2:1 დაამარცხეს. ამჟამად “მერცხალი” 19 ქულით მე-19-11 ადგილებს იყოფს “იმერეთსა” და “ნორჩ დინამოელთან” ერთად.
რაც შეეხება დანარჩენ შეხვედრებს, მარტვილის “მერანმა” საკუთარ მოედანზე “ჭიათურა” გაანადგურა (4:0) და ლიდერობა დაიბრუნა. “გაგრასა” და საჩხერის “ჩიხურას” შეხვედრა გადაიდო, რადგან იმერლებმა თოვლის გამო რიკოთის უღელტეხილის გადალახვა ვერ შეძლეს. ამით ისარგებლა გორის “დილამ” (წყალტუბოში “სამგურალს” 1:0 მოუგო) და ამ ჩემპიონატში პირველად მეორე ადგილამდე აღზევდა. თბილისის “ლოკომოტივი” ოზურგეთში წინა ტურში ნათამაშები ფრის შემდეგ უკვე საკუთარ მოედანზე ხარაგაულის “ჩხერიმელას” დაუზავდა, ხოლო ხობის “კოლხეთმა” მეგრულ დერბიში წალენჯიხის “სქურს” 2:0 მოუგო.
