მოსალოდნელი პოლიტიკური სკანდალის თავიდან აცილების მიზნით, ზურაბ ადეიშვილმა გადაწყვიტა დაესწრო მოვლენებისთვის და სასაჯელაღსრულების დეპარტამენტის იმჟამინდელ ხელმძღვანელთან, დავით ჭაკუასთან ერთად შეიმუშავა სპეციალური დანაშაულებრივი გეგმა, რომლის თანახმადაც #8 იზოლატორის თანამშრომლებს, კერძოდ კი, ვლადიმერ ბედუკაძესთან დაახლოებულ პირებს – ლევან ფხალაძეს და ბორის ფარულავას (მეტსახელად “ბასტის” და “ბუბუს”) ციხეში უნდა ეცემათ და ეწამებინათ პატიმრები, ყოველივე ამის ამსახველი კადრები კი, რომელსაც ფარულად ჩაიწერდნენ, საზოგადოებითვის იმ დროინდელი ოპოზიციური პოლიტიკური გაერთიანების – “ქართული ოცნების” შეკვეთად წარედგინათ
დავით ხუჭუას ჩვენებიდან:
“დავით ჭაკუა იძახდა, რომ სიტუაცია იყო ძალზედ რთულად. იგი ელოდებოდა ზარს და ამბობდა, რომ უნდა შეხვედროდა ზურაბ ადეიშვილს. მართლაც, ცოტა ხანში დაურეკეს და დავით ჭაკუა წავიდა ზურაბ ადეიშვილთან შესახვედრად და მითხრა, რომ მომეყვანა ლევან ფურცხვანიძე. მე დავურეკე ჩემს ერთ-ერთ მოადგილეს, ვერ ვიხსენებ რომელს, და ვუთხარი, რომ დეპარტამენტში მოსულიყო ლევან ფურცხვანიძე. ამასობაში დაღამდა. ლევან ფურცხვანიძე მოვიდა დეპარტამენტში და დავხვდი ეზოში. ვიჯექით ჩემს მანქანაში და ველოდებოდით დავით ჭაკუას.
როდესაც დავით ჭაკუა დაბრუნდა ჩვენ შევიკრიბეთ მის სამუშაო ოთახში. მან გვითხრა, რომ შეხვდა ზურა ადეიშვილს და გადაწყდა, რომ ლევან ფურცხვანიძეს უნდა აეღო თავისთავზე პატიმრების წამება. წინააღმდეგ შემთხვევაში ციხის დირექტორს, უსაფრთხოების უფროსს, მოადგილეებს და ციხის სხვა თანამშრომლებსაც დაიჭერდნენ. ამ დროს დავით ჭაკუამ უკვე იცოდა, რომ ციხის ყოფილი თანამშრომელი ვლადიმერ ბედუკაძე რაღაც ბრიფინგისათვის ემზადებოდა და პატიმართა წამების გადაღებულ კადრებში ჩანდნენ მოქმედი თანამშრომლები ვინმე “ბასტი” და “ბუბუ”. მან თქვა, რომ “ბასტი”-სა და “ბუბუ”-ს, იგივე ბორის ფარულავას და ლევან ფხალაძის მონაწილეობით უნდა ეწამებინათ პატიმრები, რასაც ლევან ფურცხვანიძე გადაიღებდა ფარულად. პატიმრების ცემა და წამება ისე უნდა მომხდარიყო, რომ ამის შესახებ ლევან ფხალაძეს და ბორის ფარულავას არაფერი სცოდნოდათ.
ლევან ფურცხვანიძეს პატიმრების წამებისას უნდა ეხმარა შემდეგი სიტყვები: “დუბინკა გაუკეთე უკან”, “სიგარეტს გაიკეთე ტრაკში”. ლევან ფურცხვანიძემ თავდაპირველად უარი თქვა, მაგრამ, როდესაც გაიგო, რომ სხვა თანამშრომლებიც შეიძლება დაეჭირათ, დასთანხმდა. დავით ჭაკუამ ლევან ფურცხვანიძეს უთხრა, რომ სამი თვე უნდა ჩამჯდარიყო ციხეში და რაც შეეხება დაკარგულ ხელფასს, დავით ჭაკუამ თქვა ჩემზე, რომ დავურიცხავთ პრემიასო და შემდეგ გადავურიცხავ შენი ოჯახის წევრებსო.
შემდეგ, როგორც მახსოვს, გაგა მკურნალიძემ გაიყვანა ლევან ფურცხვანიძე გარეთ, სადაც ჩააცვეს სამსახურის ნაცრისფერი უნიფორმის მაისური, რომელზეც ფარულად დამონტაჟებული იყო მინი ვიდეოკამერა. ამის შემდეგ მე და ლევან ფურცხვანიძე წავედით გლდანის ციხეში. იქამდე დავით ჭაკუამ მითხრა, რომ ჩემი მოადგილეები და განყოფილების უფროსები დამებარებინა დეპარტამენტში, რათა #8 დაწესებულებაში არ ყოფილიყო ზედმეტი ხალხი. ჩვენი მისვლის შემდეგ, როცა უკვე წავიდნენ დაწესებულების ხელმძღვანელობა, ციხეში შემოვიდა ჩემთვის უცნობი პიროვნება, როგორც მივხვდი ფარული ჩამწერის სპეციალისტი. ლევან ფურცხვანიძე შევიდა თავის კაბინეტში და ჩვენი გეგმის მიხედვით, დაიბარა ლევან ფხალაძე და შემდგომ ბორის ფარულავა, რომლებსაც უთხრა, რომ უნდა შესულიყვნენ ერთ-ერთ კამერაში შესამოწმებლად, სადაც სინამდვილეში იჯდა ოთხი პატიმარი, მაგრამ იმ დროისათვის დატოვებული იყო ორი მათგანი. შემდეგ ლევან ფურცხვანიძე შემოვიდა ჩემი კაბინეტის მისაღებში, სადაც ჩემს მიერ ხსენებულმა უცნობმა მამაკაცმა ჩაურთო კამერა და ლევან ფურცხვანიძე ბორის ფარულავასთან და ლევან ფხალაძესთან ერთად გადავიდა სარეჟიმო კორპუსში.
დაახლოებით 15 წუთში ლევან ფურცხვანიძე დაბრუნდა თავის კაბინეტში და იმავე უცნობმა მამაკაცმა გამოურთო კამერა, გახადა ის მაიკა და თან წაიღო. მე დავურეკე ჭაკუას და ვუთხარი, რომ დამთავრდა და იმ კაცმა ყველაფერი წაიღო. შემდეგ სამსახურში დაბრუნდნენ ჩემი თანამშრომლები, რომლებიც იქამდე იყვნენ დეპარტამენტში. მათ უბრალოდ ვკითხე, თუ რა ხდებოდა, რაზედაც მიპასუხეს არაფერიო და ვუთხარი, რომ დაესვენათ. ეს ხდებოდა დაახლოებით დილის 6 საათზე. 10-11 საათზე დამირეკა დავით ჭაკუამ და მითხრა, რომ არ გამეშვა თანამშრომლები. 5-10 წუთში ისევ დამირეკა და მითხრა, რომ ლევან ფურცხვანიძე მისულიყო დეპარტამენტთან, ხოლო ბორის ფარულავა და ლევან ფხალაძე არ გამეშვა არსად. დაახლოებით 30 წუთში მოვიდა დავით ჭაკუა, რომელსაც დავხვდი ეზოში. მან მითხრა, რომ შემოვიდოდა შავი ფერის “ტოიოტა პრადო” და შემომეშვა. ჩვენ ველოდებოდით ეზოში. მართლაც მოვიდა ხსენებული ავტომანქანა და გადმოვიდა 3 ან 4 მამაკაცი. ჩვენ ერთად ავედით ჩემთან კაბინეტში. მე მითხრეს, რომ დამეტოვებინა მარტო ისინი თავმჯდომარესთან ერთად.
10 წუთში გამოვიდა დავით ჭაკუა და მითხრა, რომ მეჩვენებინა ლევან ფურცხვანიძის კაბინეტი. მათ ნახეს კაბინეტი და მითხრეს, რომ მომეტანა სეიფი. მე ჩემს მოადგილესთან – ალექსანდრე ჯანჯღავასთან შევედი, დავაცლევინე სეიფი, გამოვართვი გასაღები და ეს სეიფი შევატანინე რომელიღაც თანამშრომელს ფურცხვანიძის კაბინეტში. ამის შემდეგ, ციხის შემოსასვლელთან მოვიდა ავტომანქანა, რომელიც არ მახსოვს რა მარკისა და მოდელის იყო.
დავით ჭაკუამ მითხრა, რომ მოსული პიროვნება არ უნდა შემოწმებულიყო საგუშაგოზე და ამოეყვანათ ლევან ფურცხვანიძის ოთახთან. მამაკაცმა მოიტანა მაისური, რომელზედაც დამონტაჟებული იყო კამერა და იმ ღამეს ეცვა ლევან ფურცხვანიძეს, დოლარების შეკვრა და ლაზერული დისკი, მაგრამ რამდენი _ არ ვიცი და დაალაგა მაგიდაზე.
იქამდე მოსულმა მამაკაცებმა ეს ნივთები და ფულადი თანხა შეინახეს სეიფში და ასევე სეიფში ჩადეს ლევან ფურცხვანიძის მაგიდიდან აღებული ფურცლები. ამასობაში მოვიდა ლევან ფურცხვანიძე და შეიყვანეს ალექსანდრე ჯანჯღავას ოთახში, სადაც ალექსანდრე ჯანჯღავას მაგივრად წინასწარ შესული იყო სხვა ადამიანი, რომელსაც არ ვიცნობ და არ მახსოვს მისი აღწერილობა. ეს მამაკაციც მოვიდა ლევან ფურცხვანიძის მოსვლამდე დაახლოებით 20-30 ადამიანთან ერთად, რომლებიც იყვნენ სამოქალაქო ფორმებში, მაგრამ ჩემი ვარაუდით იყვნენ პოლიციიდან. მათგან ზოგიერთი კითხავდა იმ ორ პატიმარს, რომლებიც აწამეს ბორის ფარულავამ და ლევან ფხალაძემ, ზოგიერთმა კი დააკავეს ლევან ფხალაძე და ბორის ფარულავა. ამასობაში მოვიდა ვიდეოოპერატორი, გამოიყვანეს ლევან ფურცხვანიძე, მისცეს სეიფის გასაღები და შეიყვანეს თავის კაბინეტში. დაახლოებით ერთ საათში წაიყვანეს ლევან ფურცხვანიძე, ლევან ფხალაძე და ბორის ფარულავა და წავიდნენ. მათი გასვლის შემდეგ წავიდა დავით ჭაკუაც”.
