2013 წლის პირველი იანვრიდან საქართველოში ელექტროენერგიის ტარიფის გაიაფებასთან დაკავშირებით, ქვეყნის ენერგეტიკისა და ბუნებრივი რესურსების სამინისტრომ, დროებითი 3 თვიანი მემორანდუმი ორ კომპანიასთან “ინტერ-რაოსა” და “ენერგო-პრო ჯორჯიასთან“ გააფორმა. ენერგეტიკის მინისტრი აცხადებს, რომ ვადის ამოწურვის შემდეგ, ტარიფი არ გაიზრდება. პირიქით, შესაძლებელია, კიდევ შემცირდეს.
“მემორანდუმი 3 თვის ვადით გავაფორმეთ. პირველი იანვრიდან 31 მარტის ჩათვლით ის ტარიფები იქნება, რაც განვაცხადეთ, ამ დროის განმავლობაში კი მოხდება ელექტროენერგიის საფასურის დეტალების შესწავლა და არ გამოვრიცხავთ, რომ ტარიფის შემცირება უფრო მეტითაც გახდეს შესაძლებელი,” – განაცხადა კახა კალაძემ.
3 თვიანი მემორანდუმი პირველი 1 იანვრიდან მარტის ბოლომდე ყოველგვარი წინაპირობის გარეშე, მომხმარებლებისათვის ტარიფის 3.5 თეთრით შემცირებას ითვალისწინებს. ელექტროენერგია გაიაფდება იმ მოქალაქეებისთვის, რომლებიც 0- დან 301 კვ. საათამდე ელექტროენერგიას მოიხმარენ. ენერგეტიკის სამინისტროში აცხადებენ, რომ აღნიშნული კატეგორია აბონენტების 90%-ს მოიცავს.
ენერგეტიკის მინისტრის კახა კალაძის თქმით, ტარიფის შემცირება ელექტროენერგიის გამანაწილებელი კომპანიების ხარჯზე მოხდა.
მემორანდუმის თანახმად „თელასმა“ აბონენტებისათვის -1 კილოვატსაათზე ელექტროენერგის საფასური ასე დაადგინა: მომხმარებლები, რომლებიც 101კვ. საათ ელექტროენერგიას მოიხმარენ, 13,48 თეთრის ნაცვლად 9,94 თეთრს გადაიხდიან, ხოლო 101-დან 301კვ-მდე მოხმარებული ელექტროენერგიისათვის მათ 16 თეთრის სანაცვლოდ 12,46 თეთრს გადაიხდა მოუწევთ. 301კვ-ს ზემოთ დახარჯული ელექტროენერგიის საფასური არ შემცირებულა – 17,70 თეთრია.
კომპანია “ენერგო-პრო ჯორჯიას” იმ აბონენტებისთვის, რომლებიც 101კვ – ელექტროენერგიას მოიხმარენ, ტარიფი 12,98 თეთრის ნაცვლად 9,44 თეთრი იქნება, ხოლო 101-301კვ-მდე მოხმარებული ელექტროენერგიისათვის მოქალაქეები 12,98 თეთრს გადაიხდიან. ახლა კი ტარიფი16,52 თეთრია. 301კვსაათზე ზევით მოხმარებული ელექტროენერგიის საფასური არ შემცირებულა, ის 17,50 თეთრით არის განსაზღვრული.
შეკითხვაზე, თუ რატომ არ შეეხოთ დენის ტარიფის კლება იმ მოქალაქეებს, რომლებიც თვეში 301კვ.საათ-ზე მეტ ელექტროენერგიას მოიხმარენ? კახა კალაძემ გვიპასუხა: “ჯერჯერობით მხოლოდ ამის გაკეთება იყო შესაძლებელი. მოსახლეობა ტარიფების შემცირებას ითხოვდა. მთავრობას მათთვის დაპირება ჰქონდა მიცემული და წინასაახალწლოდ ტარიფების შემცირება მოხდა.”
ენერგეტიკის მინისტრის თქმით, ელექტროენერგიის ტარიფზე მუშაობა გრძელდება და შესაძლოა, აპრილიდან ტარიფის შემცირების საკითხი იმ მოქალაქეებსაც შეეხოს, რომლებიც თვის განმავლობაში 301 კვ. საათ ელექტროენერგიაზე მეტს მოიხმარენ.
რაც შეეხება კახეთის ენერგოდისტრიბუციას, უახლოეს მთავრობის სხდომაზე იგეგმება შესაბამისი დადგენილების მომზადება, რომლის შედეგადაც მოხდება ტარიფების სუბსიდირება და მათი კომპანია „ენერგო-პრო ჯორჯიას“ ტარიფებთან გათანაბრება.
ენერგეტიკისა და ბუნებრივი რესურსების მინისტრი აცხადებს, რომ ელექტროენერგიის ტარიფი მომდევნო რამდენიმე წლის განმავლობაში არ გაიზრდება.
