ჯერჯერობით, იდეის განხორციელება ვერ მოხერხდა. ლანჩხუთელ პოლიტიკოსთა ნაწილი ფიქრობს, რომ ამას აქვს თავისი მიზეზი.
დარბაზის შექმნის პირველი, ასევე წარუმატებელი მცდელობა მის დამფუძნებლებს დეკემბრის დასაწყისში ჰქონდათ. მაშინ ლანჩხუთის გამგეობის დიდ სხდომათა დარბაზში საკმაოდ დიდი რაოდენობის დამსწრეები შეიკრიბნენ. ინიციატორებმა საზოგადოებას საინიციატივო ჯგუფის შექმნის შესახებ აცნობეს და მისი წევრებიც წარუდგინეს, რომელთა უმრავლესობა ლანჩხუთელთათვის კარგად ცნობილი ადამიანები არიან.
საზოგადოებრივი დარბაზის ფუნქციებისა და მიზნების შესახებ პირველი სხდომიდან ბევრი ვერაფერი გავიგეთ. გაუგებარი დარჩა, როგორ აპირებს დარბაზი უამრავი იდეის გახორციელებას. მაგრამ გია გოთუას, როგორც თავად აღნიშნავდა, საზოგადოების თანადგომის იმედი აქვს.
ვახტანგ ზენაიშვილი, რომელიც კოალიცია “ქართულ ოცნებას” წარმოადგენს, ამბობს, რომ დარბაზის შექმნის და საკრებულოს პარალელურად, ფუნქციონირების საკითხი თვითმმართველობის შესახებ კანონში დევს. საკრებულოები ვალდებულიც კი არიან ხელი შეუწყონ საზოგადოებრივი დარბაზის ჩამოყალიბებისა და მუშაობის პროცესს, მაგრამ წინა ხელისუფლების მმართველობის დროს კანონის ეს მოთხოვნა უგულებელყოფილი იყო.
მეორე სხდომა, რომელიც კვლავ იგივე საკითხების განხილვას მიეძღვნა, შედარებით მცირეხნიანი გამოდგა და ხალხიც ნაკლები ესწრებოდა. არც აქ თქმულა რამე ახალი _ გამომსვლელები ამჯერადაც ზოგადი იდეების აფიშირებით შემოიფარგლნენ. ასე რომ, ცნობისმოყვარეთათვის კვლავ ბუნდოვანი დარჩა, როდის შეიქმნება საზოგადოებრივ საწყისებზე დაფუძნებული ორგანიზაცია, რომელიც ამ საზოგადოებისთვისვე სასარგებლოდ იმოქმედებს.
ეტყობა დარბაზის შექმნის ინიციატორის, გია გოთუასთვის იმდენად მნიშვნელოვანია ეს საკითხი, რომ ამ თემას ამჯერად ბრიფინგი მიუძღვნა. ყოფილმა გამგებელმა, რომელიც ახლა ბიზნესითაა დაკავებული, ჟურნალისტებისთვის განმარტა, რომ დარბაზის შექმნის იდეა კვლავ აქტუალურია: “ახლა ცოტა დაძაბული პერიოდია _ ლანჩხუთი ახალი გამგებლის დანიშვნის მოლოდინშია. გამგეობის წინ საპროტესტო აქცია მიმდინარეობს, რომლის მიზნებში და შედეგებში უკვე ვერავინ ვეღარ ერკვევა; თან საახალწლო სამზადისიც მოგვიახლოვდა და გადავწყვიტეთ ნაახალწლევს, იანვრის პირველი ნახევრისთვის გადავდოთ ჩვენი გეგმების შესრულება. ნაახალწლევს კვლავ შევიკრიბებით და უკვე რეალურად დავიწყებთ ჩვენი მიზნების გახორციელების გზების ძიებას,” _ თქვა პრესკონფერენციის ორგანიზატორმა.
გია გოთუას განმარტებით, დარბაზთან აუცილებლად იარსებებს კონსალტინგის სამსახური, რომელიც კონსულტაციებს გაუწევს ფიზიკურ პირებს, აუცილებლობის შემთხვევაში, დაეხმარება მათ ბიზნესგეგმების და სხვადასხვა ტიპის პროექტების მომზადებაში, ბანკებთან და საკრედიტო ორგანიზაციებთან ურთიერთობაში.
ამ თემით იგი პრემიერმინისტრის ტელევიზიებით ახლადგახმაურებულ ინიციატივას გამოეხმაურა, რომელიც სოფლად მცხოვრები მოსახლეობისთვის სამეურნეო დაბალპროცენტიანი სესხების გაცემას ისახავს მიზნად.
ლანჩხუთის ყოფილი გამგებელი, როგორც პოლიტიკოსებისთვისაა დამახასიათებელი, უამრავ სიკეთესა და დახმარებას ჰპირდება თანამოქალაქეებს, მაგრამ ამ გეგმების რეალობად ქცევის გზები ჩვენთვის, ჯერჯერობით, უცნობია.
