2012 წლის 8 სექტემბერს, “ერთიანმა ნაციონალურმა მოძრაობამ” საქართველოს 11 ქალაქში ყრილობა გამართა.
ქალაქ ზუგდიდში ხალხის ჩასაყვანად, პარტიის გენერალურმა მდივანმა მიხეილ მაჭავარიანმა, შესაბამისი ხელშეკრულებებით, დაიქირავა ეგრეთწოდებული “ყვითელი მიკრო ავტობუსები”-ს კომპანიები, რომლებსაც პარტიის ანგარიშიდან გადაერიცხათ მხოლოდ მძღოლების შრომის საფასური _ 39900 ლარი.
რადგან მიკრო ავტობუსებისთვის საჭირო იყო დიდი რაოდენობის საწვავი, შემუშავდა პარტიული ღონისძიების “შავი არხით” დაფინანსების თვალთმაქცური სქემა. სქემაში ჩაება შინაგან საქმეთა სამინისტრო.
გამოძიებით დადგენილია, რომ დანაშაულთან ბრძოლისა და საზოგადოებრივი წესრიგის დაცვისათვის ბიუჯეტიდან მიზნობრივად შესყიდული საწვავიდან, მინისტრის იმჟამინდელი მოადგილის – ნიკოლოზ ძიმცეიშვილის და კონსტიტუციური უსაფრთხოების დეპარტამენტის უფროსის ლევან ქარდავას ორგანიზებით, 54 000 ლიტრი დიზელის საწვავის ტალონები გადაეცა “ერთიანი ნაციონალური მოძრაობის” წარმომადგენელს, ზუგდიდის მუნიციპალიტეტის გამგებელს ალექსანდრე ქობალიას. ქობალიამ შინაგან საქმეთა სამინისტროსთვის განკუთვნილი დანაშაულებრივად მოპოვებული საწვავის ტალონები – გადაუნაწილა 393 მიკრო ავტობუსის მძღოლს.
“ერთიანმა ნაციონალურმა მოძრაობა”- მ ფაქტობრივი ხარჯების შენიღბვისა და ხელოვნურად შემცირების მიზნით, გააყალბა ანგარიშგების დოკუმენტები და მიუთითა, თითქოსდა, აქციაში მხოლოდ 93 მიკროავტობუსი მონაწილეობდა.
“გურია ნიუსისთვის” ხელმისაწვდომი გახდა რამდენიმე საინტერესო დოკუმენტი, რომლებიც ალექსანდრე ქობალიას მრავალწლიან მოღვაწეობას უკავშირდება ზუგდიდის მუნიციპალიტეტის გამგეობაში.
უნდა აღინიშნოს, რომ ქობალია ერთ-ერთი ყველაზე გრძელვადიანი გამგებელი იყო საქართველოს ისტორიაში “ვარდების რევოლუციის” შემდგომ. მისი ლობისტი კი არც მეტი, არც ნაკლები, მიხეილ სააკაშვილია, რომელსაც დიდი მეგობრობა აკავშირებდა აწ გარდაცვლილ პარლამენტარ გრიგოლ ქობალიასთან. გრიგოლ ქობალია კი ალექსანდრე ქობალიას მამა გახლდათ. იყო დრო, როდესაც გამგებელს ზურგს მისი მეჯვარე, სამეგრელო-ზემო სვანეთის გუბერნატორი ზაზა გოროზიაც უმაგრებდა, მაგრამ როგორც ამბობენ, მათ შორის ურთიერთობა დიდი ხნის წინ დაიძაბა და მას შემდეგ აღარც გამოკეთებულა…
რაც შეეხება მიხეილ სააკაშვილის “მარადიულ სიყვარულს” ქობალიების მიმართ, ის სათავეს იმ დროიდან იღებს, როცა “ნაციონალური მოძრაობა” სულ ახალი ჩამოყალიბებული იყო. როგორც ქობალიებთან დაახლოებული წყარო ამბობს, მაშინ ზუგდიდში ჩასულ ნაცმოძრაობის ახალგაზრდა ლიდერს ღამის გასათევი ადგილი მხოლოდ ქობალიებმა გამოუყვეს და კარგი მეგრული სუფრაც გაუშალეს. მას შემდეგ გაჩენილი მადლიერების გრძნობა სააკაშვილს დღემდე მოყვება და ამის შედეგია სწორედ ის, რომ 2006 წლიდან მოყოლებული დღემდე, ზუგდიდს ალექსანდრე ქობალია თავკაცობდა.
“ნერვიულობის ნიადაგზე” გადარიცხულ-გადმორიცხული სოციალური დახმარება საკრებულოს წევრისთვის
2006 წლის 29 დეკემბრით დათარიღებულ ზუგდიდის მუნიციპალიტეტის გამგებლის N87-ე ბრძანებას ხელს ზემოხსენებული ალექსანდრე ქობალია აწერს. ამ პატარა ბრძანებაში საკმაოდ ბევრ რბილად რომ ვთქვათ, “უცნაურობას” წააწყდებით.
ბრძანებაში “თანხის გამოყოფის შესახებ” ვკითხულობთ: “ზუგდიდის რაიონის გამგეობის 2006 წლის 22 მარტის #90 განკარგულებით, 2006 წლის ადგილობრივი ბიუჯეტით გათვალისწინებული სოციალური ღონისძიების პაკეტიდან გურგენ სართანიას (მცხოვრები ზუგდიდის მუნიციპალიტეტი სოფ. ოდიშში) გამოეყო 1750 (ათას შვიდას ორმოცდაათი) ლარი მკურნალობისთვის. 2006 წლის 25 აპრილს, გურგენ სართანიას დედამ ვერა (ლალი) ანთიამ ნერვიულობის ნიადაგზე თანხა უკან დააბრუნა. ვერა ანთიას 2006 წლის 22 დეკემბრის #227 განცხადებისა და ზუგდიდის მუნიციპალიტეტის იურიდიული სამსახურის უფროსის, ბატონ სულხან აგუმავას 2006 წლის 29 დეკემბრის #5 დასკვნის საფუძველზე.
ვბრძანებ:
1. დაუბრუნდეს შეცდომით ჩარიცხული 1750 (ათასშვიდას ორმოცდაათი) ლარი ზუგდიდის მუნიციპალიტეტის 2006 წლის ადგილობრივი ბიუჯეტით გათვალისწინებული სოციალური ღონისძიების პაკეტიდან ვერა ანთიას (მცხოვრები ზუგდიდის მუნიციპალიტეტი სოფ. ოდიშში).
2. დაევალოს ზუგდიდის მუნიციპალიტეტის გამგეობის საფინანსო სამსახურს (ნანი მიქენაია) უზრუნველყოს აღნიშნული თანხის ჩარიცხვა ქალბატონ ვერა ანთიას პირად ანგარიშზე.
3. კონტროლი ბრძანების შესრულებაზე დაევალოს ზუგდიდის მუნიციპალიტეტის გამგებლის მოადგილეს დარეჯან გაბედავას.
4. ბრძანების გასაჩივრება შესაძლებელია ზუგდიდის რაიონულ სასამართლოში ქ. ზუგდიდი, ლაღიძის ქ. #12) ერთი თვის ვადაში (საქართველოს ზოგადი ადმინისტრაციული კოდექსის 178, 180 მუხლი, საქართველოს ადმინისტრაციული საპროცესო კოდექსის 22 მუხლის მე-3 ნაწილი)
ქალბატონი ვერა, იგივე ლალი ანთია, იმ პერიოდისთვის, საკრებულოს წევრი გახლდათ და ამავდროულად, საკმაოდ დაახლოებული პირი მამა-შვილ ქობალიებთან. სოციალურად დაუცველთა სიაში კი ელემენტარულად, მისი ხელფასის ოდენობიდან გამომდინარე, ვერ მოხვდებოდა. უფრო მეტიც, ანთიას ფინანსური მდგომარეობა, ზუგდიდის რაიონში, ბევრისთვის საოცნებოც იყო. რა კრიტერიუმით გამოუყო მას თანხა ალექსანდრე ქობალიამ სოციალური ღონისძიების პაკეტიდან, აბსოლუტურად გაუგებარია. აქვე იმასაც დავძენთ, რომ არჩევნების პერიოდში ლალი ანთია “ქართული ოცნების” აქტივისტთა შორის იყო…
საერთო ჯამში, მეტად საინტერესო ფინანსური ოპერაცია დაფიქსირდა: ჯერ გადაურიცხეს, მერე ინერვიულეს და უკან დააბრუნეს, მერე გამგებელმაც ინერვიულა და ისევ უკან გადაურიცხა.
რაც შეეხება ლალი ანთიას, ამ ბრძანების გამოცემიდან დაახლოებით 8 თვეში, პოლიციის ვებ-გვერდზე ასეთი ინფორმაცია გაჩნდა.
“თბილისის მთავარი სამმართველოსა და ქ. თბილისის პროკურატურის თანამშრომლების მიერ გატარებული კომპლექსური ღონისძიებების შედეგად, დაკავებული იქნენ თბილისში მოქმედი ორგანიზებულ-დანაშაულებრივი ჯგუფის წევრები, რომელთა საქმიანობის სფეროს წარმოადგენდა ყალბი დოკუმენტაციის დამზადება-გასაღება და ასეულობით მოქალაქის ფულადი თანხების თაღლითური გზით მითვისება.
დანაშაულებრივი დაჯგუფების ორგანიზატორი, 1950 წელს დაბადებული ვერა ანთია, ზუგდიდის მუნიციპალიტეტის საკრებულოს მოქმედი წევრია, რომელიც თანამზრახველებთან ერთად, მაღალი პოლიგრაფიული ტექნოლოგიით დამზადებული ყალბი დოკუმენტებით, წითელი ჯვრის ეგიდით ჰპირდებოდა ათეულობით დაზარალებულს, იტალიაში სამუშაოდ გამგზავრებას…”
დამატებითი სიები დაზარალებულთათვის და მამისთვის გამოყოფილი 38 241 ლარი
მეორე საინტერესო ამბავი, რომელიც ალექსანდრე ქობალიას და მის მიერ გამოყოფილ ფინანსებს უკავშირდება, სტიქიური მოვლენების შედეგად მიყენებული ზარალის ანაზღაურებას ეხება.
საქართველოს მთავრობის 2007 წლის 20 ივნისის #315 განკარგულებით, დასავლეთ საქართველოში საომარი მოქმედებებისა და სტიქიური მოვლენების შედეგად მიყენებული ზარალის ანაზღაურების მიზნით, ზუგდიდის რაიონის მუნიციპალიტეტის გამგეობას სახელმწიფო ბიუჯეტიდან 309 800 ლარი გამოეყო.
ამ ბრძანების პარალელურად, ზუგდიდის რაიონის მუნიციპალიტეტის გამგეობაში ახალი, ე.წ. დამატებითი სია გაჩნდა. დაზარალებული მოსახლეობის წარმომადგენლებს გამგეობის წევრებმა მაშინ ორგვერდიანი თაბახის ფურცელი არ აჩვენეს და არც მისი შინაარსი გააცნეს.
როგორც გაირკვა, ფინანსთა სამინისტროში, 2006 წლის 20 აპრილს, სარეკომენდაციო წერილი და დამატებითი სიები ზუგდიდის გამგეობიდან გაიგზავნა. საქართველოს ფინანსთა მინისტრს, ლექსო ალექსიშვილს ზუგდიდის რაიონის გამგებლის მოვალეობის შემსრულებელი, ალექსანდრე ქობალია წერილში თხოვდა დაზარალებული ოჯახებისათვის ზარალის ანაზღაურების მიზნით, ასიგნების გამოყოფისას, გაითვალისწინოს დამატებით სიაში შეყვანილი მოქალაქეთა ზარალის ანაზღაურებისათვის საჭირო თანხა, რომელიც 360 564 ლარს შეადგენს.
დამატებითი სიის ჩამონათვალში ზუგდიდელი პარლამენტარი, ალექსანდრე ქობალიას მამა გრიგოლ ქობალიაც აღმოჩნდა, რომლის მიმართ საკომპენსაციო თანხის ოდენობა 38 241 ლარს შეადგენდა. როგორც გაირკვა, რაიონის მუნიციპალიტეტის გამგებელმა, ალექსანდრე ქობალიამ სიაში შეყვანის შესახებ საკუთარ მამასაც კი არ აცნობა, რადგან არ არსებობდა არანაირი საბუთი ან განცხადება, რომლის საფუძველზეც გრიგოლ ქობალია თავს დაზარალებულად ცნობდა.
გარდა ამ ორი ფაქტისა, ალექსანდრე ქობალიას სახელი ფიგურირებს ზუგდიდის ბაზრის გახმაურებულ თემაშიც.
