მერაბიშვილის მეუღლეს სუფრაზე შეურაცხყოფა მიაყენეს. დათა ახალაიამ და სოსო თუფურიძემ მინისტრის მეუღლის ღირსების დასაცავად მოდულის შენობაში სავარაუდო ეჭვმიტანილები დაიბარეს და სასტიკად გაუსწორდნენ. როგორც მოგვიანებით გაირკვა, მათ შეცდომა მოუვიდათ და სულ სხვა პოლიციელი ცემეს. ამის შემდეგ მათ მინისტრის ცოლის ნამდვილ შეურაცხმყოფელსაც მიაგნეს და სასტიკად აწამეს. პროკურატურაში სწორედ ამ პოლიციელებმა იჩივლეს მომხდარიდან 7 წლის შემდეგ.
2012 წლის 19 ნოემბერს, საქართველოს მთავარ პროკურატურაში მთაწმინდა-კრწანისის შს. სამმართველოს მუშაკთა ცემის ფაქტზე გამოძიება დაიწყო . დადგინდა, რომ 2005 წლის 5 იანვარს, მთაწმინდა-კრწანისის შს სამმართველოს სს სამძებროს უფროსს მობილური ტელეფონით დაუკავშირდა საქართველოს შს სამინისტროს კონსტიტუციური უსაფრთხოების დეპარტამენტის დირექტორის მოადგილე იოსებ თოფურიძე და იმ მოტივით, რომ მისი ნახვა სურდა დეპარტამენტის დირექტორს დავით ახალიას, მოდულის შენობაში დაიბარა .
დაახლოებით 1400 საათზე, სამძებროს უფროსი მთაწმინდა-კრწანისის შს სამმართველოს პირველი განყოფილების უფროსთან ერთად მივიდა ,,მოდულის” შენობაში. ისინი დავით ახალაიას მიერ დაშვებული საშვით ავიდნენ იოსებ თოფურიძის სამუშაო ოთახში, რომელმაც 15-20 წუთის ინტერვალით ჯერ ერთი, ხოლო შემდეგ მეორე შეიყვანა დავით ახალაიასთან. დეპარტამენტის დირექტორთან შესულ სამძებროს უფროსს დავით ახალაიას გარდა, ოთახში დახვდნენ გერონტი ალანია, ოლეგ მელნიკოვი და სხვა პირები.
მცირეოდენი გამოკითხვის შემდგომ, რომელიც ეხებოდა 2005 წლის 2 იანვარს რესტორან ,,ძველ სახლში“ შს მინისტრის მეუღლის,თაკო სალაყაიასთვის შეურაცხყოფის მიყენების ფაქტს, დავით ახალაიამ, გერონტი ალანიამ, ოლეგ მელნიკოვმა, იოსებ თოფურიძემ და ოთახში მყოფმა სხვა პირებმა სასტიკად სცემეს მთაწმინდა-კრწანისის შს სამმართველოს სს სამძებროს უფროსი, რაც გაგრძელდა დაახლოებით 7 წუთი. ნაცემი მთაწმინდა-კრწანისის შ.ს სამმართველოს სამძებროს უფროსი გაიყვანეს დავით ახალაიას ოთახიდან და მოათავსეს იმავე სართულზე მდებარე ერთ-ერთ ოთახში. აღნიშნულის შემდეგ, იოსებ თოფურიძემ უკვე მთაწმინდა-კრწანისის შს სამმართველოს პირველი განყოფილების უფროსი შეიყვანა დავით ახალაიასთან, რომელმაც მას დაუწყო გამოკითხვა თაკო სალაყაიასთან დაკავშირებულ ინციდენტზე, რა დროსაც გაირკვა, რომ 2005 წლის 2 იანვარს, რესტორან “ძველ სახლში” ოჯახურ სუფრაზე ნაცვლად ნაცემი სამძებროს უფროსისა იმყოფებოდა სხვა პირი – მთაწმინდა-კრწანისის შს სამმართველოს პირველი განყოფილების სისხლის სამართლის სამძებროს უფროსი. დავით ახალაია, იოსებ თოფურიძესთან ერთად სასწრაფოდ მივიდა ცალკე ოთახში მყოფ სამძებროს უფროსთან ბოდიშის მოსახდელად, დაპირდნენ სამსახურებრივ წინსვლას და გამოუშვეს “მოდულის” შენობიდან ისე, რომ არ დაუბრუნებიათ სამსახურეობრივი პირადობის მოწმობა და ტაბელური იარაღი.
სწორედ ამის შემდეგ, დაახლოებით 1600 საათზე, „მოდული”-ს შენობაში, გერონტი ალანიას მიერ დაშვებული საშვით შევიდა დავით ახალაიას მიერ დაბარებული, მთაწმინდა-კრწანისის შ.ს. სამმართველოს პირველი განყოფილების სისხლის სამართლის სამძებროს უფროსი. დავით ახალაის დავალებით და სიტყვებით „გაიყვანეთ სხვა ოთახში და იქ მიხედეთო”. კუდ-ის თანამშრომლებმა, გი გაიყვანეს ერთ-ერთ ოთახში, დასვეს სკამზე, ქამარზე იარაღის ჩამოსაკიდი ღვედით ზურგსუკან შეუკრეს ხელები და სცემეს. ცემა განხორციელდა სამ ეტაპად. ნაცემ შ.ს. სამმართველოს პირველი განყოფილების სისხლის სამართლის სამძებროს უფროსს, ცემის თითოეული ეტაპის დასრულების შემდეგ, სკამზე ხელებგაკრულს, იატაკზე წაქცეულს ტოვებდნენ ოთახში. ნაწამები და უკანონოდ თავისუფლება აღკვეთილი „მოდული”-ს შენობიდან გამოუშვეს მხოლოდ 2355 საათზე.
აღნიშნული დანაულისთვის ბრალი უკვე წარედგინათ :
1. დავით ახალაიას – საქართველოს სისხლის სამართლის კოდექსის 143-ე მუხლის მე-2 ნაწილის „ა” და „თ” ქვეპუნქტებით (თავისუფლების უკანონო აღკვეთა), 1441 მუხლის მე-2 ნაწილის „ა”, „ბ”, „გ” და „ე” ქვეპუნქტებით (წამება) და 333-ე მუხლის მე-3 ნაწილის „ა”, „ბ” და „გ” ქვეპუნქტებით (სამსახურებრივი უფლებამოსილების გადამეტება) (2006 წლის 31 მაისამდე მოქმედი რედაქციით);
2. იოსებ თოფურიძეს, გერონტი ალანიას და ოლეგ მელნიკოვს – 1441 მუხლის მე-2 ნაწილის „ა”, „ბ”, „გ” და „ე” ქვეპუნქტებით (წამება), 333-ე მუხლის მე-3 ნაწილის „ა”, „ბ” და „გ” ქვეპუნქტებით (სამსახურებრივი უფლებამოსილების გადამეტება) (2006 წლის 31 მაისამდე მოქმედი რედაქციით).
მერაბიშვილის მეუღლე საქმეზე მოწმის სახით არის დაბარებული.
