ისინი პროტესტს გამოთქვამდნენ დაბა ნასაკირალის რწმუნებულად ადგილობრივი მკვიდრის შოთა ართმელაძის დანიშვნის გამო. მათი განცხადებით, შოთა ართმელაძე ძალიან დიდი ხანია მუშობდა დაბა ნასაკირალის მეურნეობის დირექტორად, რომელიც ფაქტიურად ძველ დროში, სოფელს განაგებდა და მათ არ სურთ ისევ ძველი კადრები დაინიშნონ სოფლის მმართველად. მათი განცხადებით, სწორედ ამ პიროვნების მუშაობის დროს გაჩანაგდა და დაინგრა ნასაკირალში კულტურის ცენტრი, ასევე ჩაის ფაბრიკები, ადმინისტრაციული შენობა, გაიყიდა ჰექტრობით მიწის ნაკვეთები და ა.შ.
როგორც დაბა ნასაკირალის მცხოვრებლები აცხადებენ, სოფელში მოინახება ისეთი კანდიდატურები, რომლებიც ახალგაზრდები, ნიჭიერები და „ნაციონალებთან“ გასვრილნი არ არიან, შოთა ართმელაძეს კი ამ სოფლისთვის არაფერი კარგი არ შეუქმნია.
_ ეს ძველი ხალხი საკუთარი ჯიბისთვის მუშაობენ, თუ კი სოფელში რაიმე თანხები შემოვიდოდა არავინ ხალხს არაფერს არ ეკითხებოდა ისე იხარჯებოდა ყველაფერი, ყველას გული შეგვტკივა, ჩვენ არ დავუშვებთ სოფლის რწმუნებულად ასეთი კადრების დანიშვნას, ახლა თუ 100 კაცია შეკრებული, ეს არის გამაფრთხილებელი აქცია, ჩვენ არ გავჩერდებით და თუ კი რაიმეს ისე გადაწყვეტენ, რომ ხალხს არ შეეკითხებიან, ადმინისტრაციულ შენობაში არავის არ შევუშვებთ, კარებს ავჭედავთ, აცხადებდნენ დაბის ცენტრში შეკრებილები.
_ ეკა კიკვაძე, დაბა ნასაკირალის სკოლის პედაგოგი: ეგ ადამიანი 20 წლის მანძილზე მუშაობდა ნასაკირალში, იყო სააქციო-საზოგადოება ნასაკირალის დირექტორი, თუ კი რაიმე განადგურდა სოფელში და თუ კი რამ მიწისქვეშ თუ მიწის ზევით წასაღები იყო, ყველაფერი წაიღო და გაანადგურა, ყველაფერი მაგის ხელშეწყობით მოხდა ამ სოფელში. სულ დაიქცა ყველაფერი. იურიდიულად ეგ პიროვნება ახლაც არის ამ სააქციო საზოგადოება „ნასაკირალის“ დირექტორი, აქვს ბეჭედიც. არ ვიცით იურიდიულად უკვე დანიშნილია თუ არა, მაგრამ ჩვენ გავიგეთ, რომ 31 ში დანიშნეს უკვე.
მაგათ ჰგონიათ, ახლა ხალხი ისევ პასიურია და ისევ ცხვრის ფარად იქცევა, და საითაც უნდათ იქეთ გარეკავენ, არავითარ შემთხვევაში, მასე აღარაა ღვთის წყალობით შეიცვალა დრო და სიტუაციაც.
შოთა ართმელაძე ამ ბოლოს წასული იყო რუსეთში, ჩამოიყვანეს და იყო არჩევნებზე კომისიის თავმჯდომარე “ნაციონალებიდან“, როგორ და რა მაღალი პროცენტებით მოიგეს არჩევნები ნასაკირალში “ნაციონალებმა” ყველამ კარგად იცის, რაც თავი გვახსოვს შოთა ართმელაძე არჩევნების დროს კომისიის თავმჯდომარეა. წავიდა არჩევნების შემდეგ და ახლა ისევ ჩამოვიდა. ალბათ ჩამოიყვანეს, რადგან რწმუნებულად ინიშნება.
„გურია ნიუსი“ დაუკავშირდა ოზურგეთის მუნიციპალიტეტის დაბა ნასაკირალის რწმუნებულს ტარიელ ანთაძეს, რომელიც აცხადებს, რომ ჯერ მას ოფიციალურად გათავისუფლების შესახებ ბრძანება არ მისვლია და ის თავის უფლება-მოვალეობას ასრულებს.
_მე ჩვეულებრივ რეჟიმში ვმუშაობ, დღესაც ვიყავი სამსახურში, – გვითხრა ანთაძემ.
ოზურგეთის მუნიციპალიტეტის გამგეობის პრესსამსახურში აცხადებენ, რომ ჯერჯერობით არც დაბა ნასაკირალში და არეცრთ სოფელში ოფიციალურად ახალი რწმუნებული დანიშნული არაა და რწმუნებულები ჩვეულებრივ რეჟიმში აგრძელებენ მუშაობას.
