წუხელ, გვიან ღამით კიდევ გახორციელდა მუქარის ზარები აქციის მონაწილეებზე, ამჯერად ყოფილი პოლიციელების მხრიდან.
_ ჩემს შვილს, ანანოს დაურეკა თავისმა ნათლიამ, ლაშა აბშილავამ, რომელიც სულ ახლახან განთავისუფლდა აბაშის პოლიციის უფროსის მოადგილის თანამდებობიდან და უთხრა, რომ სულ მალე სიტუაცია შეიცვლება, გამგებლად ჩვენი მეგობარი და თანამოზიარე მოდის, ამიტომ უთხარი დედაშენს, აღარ გაეკაროს აქციას. თუ დაგვიჯერებს, როგორც კი გამგებლად გოჩა ჭანტურია დაინიშნება, კარგ სამსახურს შევთავაზებთ, მაგრამ თუ მაინც თავის აზრზე დარჩება და არ გამოვა საკრებულოდან, მასაც სხვებივით ბორკილდადებულს გავუყენებთ გზას ციხისკენ, _ გვითხრა აქციის მონაწილე ნატო ნოდიამ.
წუხელვე სიტუაცია დაიძაბა აქციის მონაწილეებსა და მაჟორიტარი დეპუტატის ბიუროს ხელმძღვანელს, ხათუნა მსხილაძის შორის. საჭირო გახდა პოლიციის ჩარევა. აღსანიშნავია, რომ წინა აქციის დროს, როდესაც აქციის მონაწილეებმა დეპუტატის ბიუროს წევრებთან შეხვედრა მოითხოვეს, მსხლიძემ განაცხადა, რომ ბიურო გაუქმებულია და მაჟორიტარს საკრებულოს შენობაში ვერ ნახავდნენ.
აქციის მონაწილეები დაშლას არ აპირებენ. მათი ვარაუდით, სწორედ დღეს გაიმართება საპრეტენზიო კომისიის სხდომა, რომელმაც გამგებლობის კანდიდატის, ირაკლი რუხაძის საჩივარი უნდა განიხილოს, თუმცა იმის იმედი, რომ ეს კომისია ზურაბ მხეიძის თავმჯდომარეობით რაიმე გადაწყვეტილების შეცვლას შეძლებს, არავის აქვს. არც იმას ელოდებიან, რომ წინა კომისიის მიერ დაშვებული დარღვევები გამოსწორდება.
„გურია ნიუსი“ გამგებლის კანდიდატურის განმხილველი კომისიის თავმჯდომარის მოადგილეს, როლანდ შონიას ესაუბრა, რომელმაც აღნიშნა, რომ “კომისიის გადაწყვეტილების მიღება მოხდა პოლიტიკურ-ნაციონალური ნიშნით”: მე დავაფიქსირე განსხვავებული აზრი. კომისიამ გადაწყვეტილება მიიღო და 4 ხმით აირჩია გოჩა ჭანტურია, რომლის მიერ არ იყო წარმოდგენილი სამწლიანი გამოცდილების დამადასტურებელი არანაირი უტყუარი მტკიცებულება. გასაუბრებისას დადასტურდა მისი შეუსაბამობა მინიმალურ და სპეციალურ საკვალიფიკაციო მოთხოვნებთან. #1 დანართში მითითებულ საკანონმდებლო და ნორმატიული აქტების ცოდნაში საერთოდ ნული აქვს. წარმოდგენა არა აქვს ადამიანის უფლებების ნორმებზე. ვერ გამოკვეთა რაიონის პრობლემები და არანაირი კონკრეტული გეგმა-პროგრამა არ წარმოუდგენია. კომისიის გადაწყვეტილების მიღება მოხდა პოლიტიკური-ნაციონალური ნიშნით, თოფურია-ახალაია-დარცმელიძის გეგმის შესაბამისად. რაც მთავარია საერთოდ უგულებელყოფილია საზოგადოებრივი აზრი“.
საკრებულოს აპარატის ხელმძღვანელი, გოჩა ხურცილავა ამბობს, რომ საკრებულო პარალიზებულია და არავის აქვს მუშაობის საშუალება, თუმცა ეს ორი დღეა, არც საკრებულოს თავმჯდომარე, არც მისი მოადგილე და არც აპარატის წევრები სამუშაო ადგილას არ გამოცხადებულან და კარები ყველგან დაკეტილია.
