ამ ოჯახური ჩამონათვალის მიუხედავად, ნოდარ დუმბაძის სახელობის საბავშვო თეატრის ყოფილი მმართველი მიხეილ ანთაძე მიიჩნევს, რომ “საქმიანობის პროცესში ხელმძღვანელობდა “საქართველოს კანონით საჯარო სამსახურში ინტერესთა შეუთავსებლობისა და კორუფციის შესახებ” მიხედვით და არ დაურღვევია მისი მოთხოვნები.”
საქართველოს კულტურისა და ძეგლთა დაცვის მინისტრის მოადგილის, ალექსანდრე მარგიშვილის წერილის პასუხად, მიხეილ ანთაძე განმარტავს, რომ ზემოთ ჩამოთვლილი ადამიანები არ მიეკუთვნებიან ახლო ნათესავებს და მეტი დამაჯერებლობისთვის მოჰყავს მე-4 მუხლი “საქართველოს კანონიდან საჯარო სამსახურში ინტერესთა შეუთავსებლობისა და კორუფციის შესახებ”
ა) “ოჯახის წევრში” იგულისხმება პირის მეუღლე, არასრულწლოვანი შვილი და გერი, აგრეთვე მასთან მუდმივად მცხოვრები პირები;
ბ) “ახლო ნათესავში” იგულისხმება პირის ოჯახის წევრი, პირდაპირი აღმავალი და დაღმავალი შტოს ნათესავი, გერი, და და ძმა, აგრეთვე მშობლის და შვილი გერები.
აბსოლუტურად განსხვავებული შეხედულება აქვს კულტურისა და ძეგლთა დაცვის სამინისტროს იურიდიული დეპარტამენტის დირექტორს, თემურ ჩიხრაძეს, რომელიც თავის მოხსენებით ბარათში, რომელიც სამართლებრივი დასკვნის ხასიათს ატარებს, აღნიშნავს:
“ადმინისტრაციული ორგანოების საქმიანობა ექვემდებარება საჯარო სამართლის ადმინისტრაციული სამართლის პრინციპებს. კერძოდ: ადმინისტრაციული ორგანოების საქმიანობის ძირითადი პრინციპებია მიუკერძოებლობის პრინციპი. „ზოგადი ადმინისტრაციული კოდექსის“ მე-8 მუხლის მეორე ნაწილის თანახმად, ადმინისტრაციულ წარმოებაში არ შეიძლება მონაწილეობა მიიღოს თანამდებობის პირმა, რომელსაც აქვს პირადი ინტერესი, ანდა არსებობს სხვა გარემოება, რომელიც ზეგავლენას მოახდენს სქმის გადაწყვეტაზე“
აღნიშნული პრინციპიდან გამომდინარე, ადმინისტრაციულ ორგანოში (საჯარო სამართლის იურიდიულ პირში) თეატრის მმართველის, მისი შვილების და ოჯახის წევრების ერთობლივი საქმიანობა კანონსაწინააღმდეგოა და არ შეესაბამება მიუკერძოებლობის პრინციპის განვრცობითი განმარტების შინაარსს”, _ აღნიშნავს თემურ ჩიხრაძე.
როგორც “გურია ნიუსს” კულტურის სამინისტროში განუცხადეს, მიხეილ ანთაძე გადაყენებულია თეატრის ხელმძღვანელობიდან, ის 31 დეკემბერს გაათავისუფლეს დაკავებული თანამდებობიდან სამინისტროს მიერ შექმნილი კომისიის დასკვნის საფუძველზე. დასკვნა კი, სადაც გარდა საოჯახო მმართველობისა, სხვა უამრავი დარღვევაა დაფიქსირებული, ფინანსთა სამინისტროს გადაეცა რეაგირებისთვის.
საბავშვო თეატრის საქმიანობის შემსწავლელი კომისიის დასკვნის შესაბამისად, მმართველი თვითნებურად, არამიზნობრივად, საქართველოს კულტურისა და ძეგლთა დაცვის სამინისტროსთან შეუთანხმებლად განკარგავდა თეატრის სახელფასო ფონდს. კულტურის სამინისტროდან გამოყოფილი თანხა სრულად არ ურიგდებოდათ საშტატო განრიგით გათვალისწინებულ თანამშრომლებს. მიხეილ ანთაძე აღნიშნულ საბიუჯეტო თანხებს, ბიუჯეტის შესახებ კანონის დარღვევით, უნაწილებდა ხელშეკრულებით აყვანილ პერსონალს, რომელთაც ჰონორარები და პრემიები უნდა მიეღოთ თეატრის მხოლოდ საკუთარი შემოსავლებიდან-იჯარებიდან, ბილეთებისა და აბონემენტების რეალიიზაციიდან.
დასკვნაში ასეთი არაერთი მაგალითია მოყვანილი:
თბილისის ნოდარ დუმბაძის სახელობის სახელმწიფო ცენტრალურ საბავშვო თეატრს პოლიგრაფიულ მომსახურეობას უწევდა შპს “ტორი პლუსი”. საზოგადოებაში, საქართველოს კულტურისა და ძეგლთა დაცვის სამინისტროდან გაგზავნილი იქნა წერილი, რომლითაც მოთხოვნილი იყო ბოლო სამი წლის განმავლობაში საბავშვო თეატრზე პოლიგრაფიულ მომსახურეობაზე გაწეული ხარჯების დამადასტურებელი დოკუმენტების ქსეროასლები. მიღებული დოკუმენტაცია შეუდარდა საბავშვო თეატრის ბუღალტერიაში საწყობში არსებულ დოკუმენტებს. აღმოჩნდა, რომ 2011 წლის 9 მარტის საგადასახადო ანგარიშ-ფაქტურით მიღებული აქვთ 7200 ბილეთი, რომელიც ბუღალტერიაში აღრიცხული არ არის. საგადასახადო ანგარიშ-ფაქტურაზე და სასაქონლო ზედდებულზე საქონლის მიღებაზე ხელს აწერს თეატრის მმართველის მძღოლი გ. ფურცელაძე, რომელიც განმარტავს, რომ აღნიშნული 7200 ბილეთი მიტანილი იქნა თეატრის ბუღალტერიაში.
თეატრის ყოფილი ბუღალტრის ნ. ძაძამიძის განმატებით, აღნიშნული საგადასახადო ანგარიშ-ფაქტურა და სასაქონლო ზედდებული არ უნახავს და შესაბამისად, დღგ-სსაგადასახადო დეკლარაციაში ნაჩვენები არ არის. შემდგომ, თეატრის ადმინისტრაციის მიერ მოიძებნა დოკუმენტები და ბილეთები, რომელიც ადმინისტრაციის განმარტებით, დაბეჭდილი იყო ჯგუფ “მგზავრებისა” და ცენტრალური საბავშვო თეატრის ერთობლივი ღონისძიებებისთვის. აღსაღნიშნავია, რომ ჯგუფ “მგზავრებთან” ხელშეკრულება ვერ მოიძებნა.
2011 წლის ივლისიდან, თეატრიდან განთავისუფლებული იყო თეატრის მთავარი ბუღალტერი ნ. ძაძამიძე, რომელმაც ბუღალტრული და საწყობის ნაშთები არ გადააბარა მის თანამდებობაზე დანიშნულ პირს. აღნიშნული ნაშთების გადაბარება უნდა მომხდარიყო სახელმწიფო ცენტრალური საბავშვო თეატრის მმართველის ბრძანების საფუძველზე. გარდა ამისა, თეატრში 2010-2011 წლების სასაქონლო – მატერიალურ ფასეულობათა ინვენტარიზაცია ჩატარებული არ აქვთ.
კომისიის მიერ დადებული დასკვნის თანახმად, რომელსაც დევი დევიძე თავმჯდომარეობდა, ბოლო სამი წლის განმავლობაში, ნოდარ დუმბაძის სახელობის საბავშვო თეატრში ადგილიო ჰქონდა შემდეგი სახის კანონსაწინააღმდეგო ქმედებებს:
დასაქმებულებთან გაფორმებული ხელშეკრულებები არასრულყოფილადაა გაფორმებული – რიგ შემთხვევებში ხელშეკრულებები ცალმხრივადაა გაფორმებული, არ არის მითითებული მოქმედების ვადა, ასანაზღაურებელი თანხის ოდენობა, არასრულადაა შევსებული დასაქმებულის პირადი მონაცემები;
თეატრის მმართველის მიერ უგულველყოფილია და არ არის დაცული, მის მიერ ბრძანებით დამტკიცებული და სამინისტროსთან შეთანხმებული საშტატო ერთეულებისა და თანამდებობრივი სარგოების ოდენობა, მათში მომხდარი ცვლილებები სამინისტროსთან არ შეთანხმებულა;
თეატრში ადგილი აქვს საბიუჯეტო დაფინანსებიდან შტატგარეშე თანამშრომლების სახელფასო და საჰონორარო ანაზღაურების გაცემის ფაქტებს, წინა წლების სახელფასო დავალიანებების დაფარვას;
საჩუქრად გაცემული აბონემენტები და სპექტაკლზე დასასწრები უფასო მოსაწვევები არ არის შემოსავალში აღებული და შესაბამისად, არ არის დაბეგრილი გადასახადებით, გამოვლენილია ბილეთების დანაკლისი;
თეატრში ერთობლივ საქმიანობას ეწევიან მმართველი, მისი შვილები და ოჯახის წევრები.
უფრო დეტალურად ამ და სხვა დარღვევებზე, ფინანსთა სამინისტროს შესაბამისი სამსახურები იმსჯელებენ.
