ხალხი დაშლას არ აპირებს. მათ იციან, რომ 8 იანვარს, დილის 10 საათზე საკრებულოს სხდომა დაინიშნა, სადაც საბოლოოდ გადაწყდება გამგებლის დანიშვნის საკითხი. მიუხედავად იმისა, რომ დღეს უკვე შეიტანეს სარჩელი სენაკის სასამართლოში, პასუხი ვერ უსწრებს საკრებულოს სხდომას.
საკრებულოს თავმჯდომარემ, დავით თოფურიამ გააკეთა განცხადება და თქვა:
_ მე, დავით თოფურია გადავდგები მხოლოდ საკონსტიტუციო ვადის გასვლის შემდეგ და არავითარ შემთხვევაში, უფრო ადრე. რაც შეეხება გამგებლის კანდიდატს, გოჩა ჭანტურიას, არასოდეს ყოფილა “ნაციონალური მოძრაობის” წევრი და ის არის დღევანდელი უმრავლესობისა და კოალიციის მხარდაჭერილი კანდიდატი“.
“გურია ნიუსი” დაუკავშირდა თბილისში კოალიცია „ქართული ოცნების“ წევრებს, რომლებმაც თქვეს, რომ დავით თოფურია ცრუობს, როცა ასეთ განცხადებას აკეთებს. _ „კოალიციის მხარდაჭერილი ერთადერთი კანდიდატი არის ირაკლი რუხაძე, ეს დღეს დავით საგანელიძემაც გააჟღერა თავის სატელევიზიო ინტერვიუში“, _ გვითხრეს სხდომიდან გამოსულმა კოალიციის წევრებმა.
_ როგორც გავარკვიეთ ხალხის მოთხოვნებს სოლიდარობას უწევს აბაშის „ქართული ოცნების“ ახალგაზრდული ფრთა და ხვალიდან ისინიც აპირებენ გამაფრთხილებელი აქციების მოწყობას.
_ ჩვენ გვინდა, მივმართოთ “ქართულ ოცნებას”. როგორც რაიონის საკრებულოს თავმჯდომარე ამბობს, გოჩა ჭანტურია “ოცნების” კანდიდატია. სად იყო და რატომ არავინ ვიცოდით, რომ ეს პიროვნება ოცნების წევრი იყო წინასაარჩევნოდ? მაშინ სად იყო გოჩა ჭანტურია, როცა იგივე საკრებულოს თავმჯდომარე, მაშინდელი პოლიციის უფროსი, კობა მსხილაძე და “ნაციონალები” ჩვენს ოჯახებს ატერორებდნენ? რატომ არ იდგა ჭანტურია ჩვენთან არჩევნებზე ან არჩევნების წინა დღეებში, როცა კაჭარავა და აწ უკვე მოხსნილი პოლიციელები განაგებდნენ და წყვეტდნენ აბაშაში ყველაფერს, მაშინ რატომ ვათენეთ ღამეები და რატომ ვიბრძოლეთ? რატომ ჩვენ არავინ შეგვითანხმა ჭანტურიას კანდიდატურა? ჩვენ გაჩუმებას არ ვაპირებთ და ვითხოვთ, ამ კითხვაზე პასუხს, _ განაცხადეს ახალგაზრდული ფრთის წევრებმა.
ხალხის აღშფოთებას საზღვარი არ აქვს. აქციის ერთ-ერთი მონაწილე, ზურაბ ნინუა ამ წუთებში თბილისში იმყოფება. ჩვენთან საუბრისას მან განაცხადა:
_ ხვალ მივდივარ და მინდა, ფინანსთა მინისტრს შევხვდე. ერთ ხელში ბენზინს დავიჭერ და მოვითხოვ მთავარი პროკურორის ნახვას. ყველაფერს ვიტყვი და მოვითხოვ ხვალვე დაიწყონ ფინანსური გამოძიება და რეაგირება გააკეთონ იმ დარღვევებზე, რომლებიც მივაწოდეთ აბაშის საკრებულოს წინააღმდეგ. მილიონებია შეჭმული და ასეთი ხალხი კიდევ თანამდებობებზე სხედან.
ხვალვე აბაშელების მხარდასაჭერად თბილისსა და სხვა ქალაქებში მცხოვრები აბაშელები აპირებენ გამოსვლას და მომიტინგეებისთვის სოლიდარობის გამოცხადებას.
