არადა, გუშინ ლომია პოლიციის განყოფილებაში დაკითხვაზე იმყოფებოდა და მის მიმართ საქმეა აღძრული: _ მან რამდენიმე დღის წინ ფიზიკური და სიტყვიერი შეურაცხყოფა მიაყენა აქციის მონაწილეებს და ეს ფაქტი საკრებულოს ვიდეო-კამერებმა დააფიქსირეს, ამოღებულია ფირებიც. საქმე ძიებაშია, თუმცა ძიების დამთავრებას არავინ ელოდება და ალბათ უკვე ორშაბათს ლომია გამგებლის მოადგილის რანგში მოევლინება აბაშას, _ ამბობენ აქციის მონაწილეები.
– ეს კიდევ ერთი დარღვევაა, რასაც აბაშის ხელისუფლება სჩადის. სწორედ ამიტომ არ შევწყვეტთ შიმშილობას და აქციებიც გაგრძელდება. ყველამ უნდა დაინახოს ხალხის ნება და ძალა. დღეს დილით ხმა გავრცელდა, 500–მდე ნაციონალი იკრიბება გოჩა ჭანტურიას მხარდასაჭერადო. ცოტა არ იყოს, შევშინდი _ არ მინდა ხალხი ერთმანეთს დაუპირისპირდეს, მაგრამ აქცია რომ დაიწყო და ფანჯრიდან გადავიხედე, სულ რაღაც 60–70 ადამიანი იქნებოდა, ისიც სულ საკრებულო–გამგეობის თანამშრომლები. ასევე იყვნენ პედაგოგები, საავადმყოფოს თანამშრომლები და კულტურის სახლის ყველა თანამშრომელი. ცოტა ხანში რამდენიმე პედაგოგი ჩვენთან ამოვიდა და გვითხრა, მოტყუებით წამოგვიყვანეს, გვეგონა ირაკლი რუხაძის მხარდასაჭერად მოვდიოდით, მერე საკრებულოს და გამგეობის ხალხი რომ დავინახეთ, მივხვდით, რაშიც იყო საქმე და გავერიდეთ მათ აქციას, თქვენთან ამოვედითო. ასევე დამირეკა ერთმა ლაბორანტმა და მითხრა – ხომ იცით, მე სულით და გულით თქვენთან ვარ, მაგრამ დამავალეს და რომ არ წავიდე, მეშინია _ ეს სამსახურიც რომ დავკარგო რა მეშველებაო, – გვითხრა მოშიმშილე მარინა ქუნთელიამ.
– რას ნიშნავს, დამავალეს? ან რატომ უნდა დაკარგოს სამსახური? ახლა ხომ ახალი ხელისუფლებაა და ბევრი რამ შეიცვალა?
– კი, ეს საქართველოში, მაგრამ აბაშაში არა _ აქ ჯერ ისევ შიშის ფაქტორია. ხალხს ეუბნებიან, ხომ ხედავთ, ხელისუფლებაში ისევ ჩვენ ვართ, გამგებელიც ჩვენი კაცია და ჩვენი ძალა სულ მალე უფრო გაძლიერდებაო.
აბაშელები მოლოდინით ელოდებიან 16 იანვარს, როცა სასამართლო განჩინება იქნება ცნობილი. მანამდე კი პერმანენტული აქციების გაგრძელებას აპირებენ და დიდი იმედი აქვთ, რომ თბილისში გამართული შეხვედრების შემდეგ სამართალს მიაღწევენ.
