“შეიძლება ბევრმა თქვენთგანმა არ იცის, რომ პოლიციის რეფორმა სრულად დაფინანსდა ბატონი ბიძინა ივანიშვილის მიერ. ეს რეფორმა განხორციელდა მისი ფინანსური მხარდაჭერით. ერთ-ერთი თანაავტორი იყო ლევან იზორია, რომელიც ჩემი მოდგილეა და აქტიურად მეხმარება სტრატეგიის შემუშავებაში. ეს რეფორმა ადრე დაიწყო, მაგრამ ვერ მოხერხდა მისი განხორციელება, რადგან სამწუხაროდ შეჩერდა წლების წინ. იმ სახით ვერ მივიღეთ რეფორმა რა სახითაც იყო განსაზღვრული. ჩვენი მიზანია, ეს რეფორმა მივიყვანთ ბოლომდე. ამაში საჭიროა თქვენი და საზოგადოების ჩართულობა.
ჩვენ დავიწყებთ შინაგან საქმეთა სამინისტროს, პოლიციის რებრენდინგს, რომელსაც ალბათ ფსიქოლოგიური დატვირთვა ექნება. პოლიცია საზოგადოების წინაშე განახლებული სახით წარსდგება. ეს იქნება პატრული, უბნის ინსპექტორი, პოლიციის თანამშრომელი. ჩვენი მიზანია განახლებული, გაჯანსაღებული, დასუფთავებული პოლიცია წარვუდგინოთ და დაუბრუნოთ ქვეყანას და თქვენ, საზოგადოებას. სწორედ ამიტომ ვარ ამ თანამდებობაზე. მე მაქვს ჩემი პრინციპები. ჩემი ძალიან მტკიცე პოზიციები და არ ვაპირებ ჩემი პრინციპების ღალატს.
ახლა ყველაზე მთავარი, რაც მინდა რომ შემოგთავაზოთ: ერთ დროს მეც ვიყავი სტუდენტი. ყოველთვის ვფიქრობდი იმ დღეზე, როდესაც დავამთავრებდი უნივერსიტეტს და დავიწყებდი მუშაობას. მოგეხსენებათ, რომ დასაქმება საქართველოში ეს არის ძალიან აქტუალური. 2004 წლის გაზაფხულს, როცა პარიზიდან საქართველოში დავბრუნდი, მქონდა 2 შესაძლებლობა: პირველი, დამეწყო მუშაობა სააკაშვილის ადმინისტრაციაში ერთ-ერთ სპეციალისტად და სრულიად შემთხვევით გამიჩნდა მეორე შესაძლებლობა, _ დამეწყო მუშაობა კერძო სტრუქტურაში, ვგულისხმობ “ქართუ ჯგუფს” და “ქართუ ბანკს”. მე ავირჩიე მეორე. ასე რომ, როგორც შინაგან საქმეთა მინისტრს, სურვილი მაქვს ხელი შევუწყო ახლგაზრდების, წარჩინებული სტუდენტების ჩვენს და სხვა სამინისტროებში დასაქამებას და გთავაზობთ შემდეგ ინიციატივას: ჩვენ მოგცემთ კოორდინატებს, საკონტაქტო ინფორმაციას, სადაც თქვენ შეგიძლიათ გამოაგზავნოთ თქვენი “სივი” და პირადად მე, გაძლევთ სიტყვას, რომ მაქსიმალურად მალე დაგასაქმებთ. რათა მთლიანად გაჯანსაღდეს სისტემა (სტუდენტები ტაშით შეხვდნენ შსს მინისტრის წინადადებას. ავტ)
ჩემი სურვილია, სამინისტროში შევიტანო რაღაც ახალი ძალა, ახალი სისხლი და დაგეყრდნოთ მომავალ თაობას. იმიტომ, რომ თქვენ ხართ მომავალი ხელისუფლება, ყოველგვარი გადაჭარბების გარეშე. არ შეიძლება, ერთი და იგივე კლანი თუ დაჯგუფება მართავდეს სახელმწიფოს, _ განაცხადა ღარიბაშვილმა.
