_ ეკა იქნება ჩემი სტუმარი, ასევე სხვა მეგობრებიც ჩამოდიან ოზურგეთში, _ გვითხრა ზვიად კვაჭანტირაძემ, მაგრამ არ დააკონკრეტა კიდევ ვინ აპირებს ღონისძიებაზე დასწრებას.
ოზურგეთის გამგეობის მუნიციპალიტეტის პრესამსახურის ნინო სალუქვაძის თქმით, ღონისძიება დათქმულ დროზე, დილის 12 საათზე არ დაიწყება და ცოტა მოგვიანებით გაიმართება. ჩვენთვის ასევე ცნობილი ხდება, რომ კალანდობას მომღერალი, გიორგი უშიკიშვილი დაესწრება.
წელს კალანდობის დღესასწაული სოფელ დვაბზუს ეთნოგრაფიულ მუზეუმში გაიმართება.
ძველი ტრადიციების აღდგენა 2010 წელს მოხდა, სოფელ ცხემლისხიდში, ოზურგეთელი კოლორიტის საყვალა სალუქვაძის ოჯახში თეატრალიზებული წარმოდგენით დაიწყო. წარმოდგენისა და ოჯახის მთავარი სტუმარი საქართველოს პრეზიდენტი, მიხეილ სააკაშვილი იყო. პრეზიდენტი სამ საათზე მეტხანს დარჩა გურიაში და ტრადიციულ სუფრასთან მოილხინა.
მიხეილ სააკაშვილი ოზურგეთში, კალანდის დადგომამდე, ხუთი საათით ადრე ჩამოვიდა. იგი მივიწყებულ და ახლადაღდგენილ ტრადიციულ საკალანდო “აგუნობას” დაესწრო. ყველა რიტუალი, რასაც გურული გლეხი კალანდის დადგომისას აკეთებდა, ოზურგეთელმა მსახიობებმა და ადგილობრივმა ხელისუფლების წარმომადგენლებმა, საქართველოს პირველ პირთან ერთად გააცოცხლეს.
მთავარი რიტუალი ღვეზლის შემოტარება იყო: “თქვენი მუცლის სატკივარი წაეღოს აღმა ქარს, დაღმა ქარს, თქვენი ყველა სატკივარი წაეღოს აღმა ქარს, დაღმა ქარს.” ამ ღონისძიებას, რა თქმა უნდა, შემდეგ საქართველოს პირველი პირი არ დასწრებია. დაესწრება თუ არა წელს მიხეილ სააკაშვილი კალანდობას, ჩვენთვის ცნობილი არ არის. ისე, არ არის გამორიცხული, რომ ახალი და ძველი მთავრობის კოჰაბიტაცია ღვეზლის შემოტარებით მოხდეს.
