გამგებელი მხოლოდ აქციის დაშლის შევიდა გამგეობის შენობაში.
“გურია ნიუსი” გოჩა ჭანტურიას სამუშაო კაბინეტში შეხვდა და მასთან პირველი ინტერვიუ ჩაწერა.
– ბატონო გოჩა, თქვენი დანიშვნა საკმაოდ ხმაურიანად მოხდა, დღეს გამგეობის თანამშრომლები სირცხვილის კორიდორის გავლის შემდეგ შევიდნენ შენობაში, აქცია ისევ გრძელდება… რას გვეტყვით შექმნილი მდგომარეობის შესახებ?
– ჩვენ მაქსიმალურად ვეცადეთ ამ ადამიანებთან კონტაქტზე გავსულიყავით და მოგვესმინა მათი ჩამოყალიბებული მოთხოვნები. მათ, რომლებიც აქციებს აწყობენ და ჩვენს წინააღმდეგ გამოდიან, საერთო აზრი არ გააჩნიათ. ისინი მოითხოვენ საკრებულოს და გამგებლის გადადგომას, მათ ჰყავთ საკუთარი კანდიდატი, მაგრამ ეს კანდიდატი ჩვენთან კონტაქტზე არ გამოდის. ერთხელ მოვახერხე ირაკლი რუხაძესთან შეხვედრა _ სამწუხაროდ, ის არის ამ მაპროვიცირებელ ძალაზე დამოკიდებული და ამბობს, რომ მათ ვერ ჩაეხსნება. ის მათ დაკვეთას ასრულებს, თავად მოშიმშილეები ვის დაკვეთას ასრულებენ, დღემდე ვერ გავიგე. ესენი არიან სრული პროვოკატორები _ “ზონდერქალები” შემიძლია ვუწოდო მათ. გარკვეულია მათი წარსული _ ისინი ცნობილი ზვიადისტები არიან და ყოველთვის ცდილობდნენ, უმართავი სიტუაციებისთვის შეეწყოთ ხელი. მათ არანაირი შეხება არ აქვთ რაიონის განვითარების ხედვასთან. ისინი მხოლოდ და მხოლოდ პროვოკაციებზე მიდიან და სურთ დესტაბილიზაცია. მათი უმრავლესობა არ არის ჩვენი რაიონის მცხოვრები _ პირდაპირ შემიძლია ვთქვა, რომ იმერული სოფლებიდან არიან ჩამოყვანილები და ამიტომ არც კი იციან, სინამდვილეში რა ხდება რაიონში. ასევე ჩამოყავთ სხვა ქალაქებიდან და რაიონებიდან ხალხი, რომლებიც თითქოსდა ზურგს უმაგრებენ მათ.
– მოშიმშილეების მდგომარეობა დამძიმდა _ დღეს ერთ-ერთი მათგანი ექიმებმა საავადმყოფოში გადაიყვანეს…
– რაც შეეხება მათ შიმშილობას, იქ არის დამონტაჟებული კამერები და კარგად ჩანს, რომ მათთან მთელი დღის განმავლობაში უამრავი მნახველი მიდი-მოდის, შეაქვთ და გამოაქვთ რაღაცეები. ჩვენ, საბედნიეროდ თუ სამწუხაროდ, იგივე წესებით არ ვებრძვით მათ. ვიცით, რომ ჩვენი რაიონის სახელი ილახება _ ეს არ არის სასიამოვნო მოსახლეობისთვის, საკრებულოს მუშაობაში ხელი ეშლება. შესაბამის ორგანოებსაც არა ერთხელ მივმართეთ ამ საკითხის გამო და ყველა შეგუებულია _ დღეს თუ ხვალ მიხვდებიან, რომ მათ შიმშილს აზრი არ აქვს და ადგებიან, მათ არავინ არ ჰყავთ მხარდამჭერი.
– ბატონო გოჩა, როცა აგირჩიეს გამგებლად, თქვით, რომ თქვენი მხარდამჭერი არის “ქართული ოცნება” და ახალი მთავრობა, შემდეგ კი საინფორმაციო სააგენტო “ივერიონთან” განაცხადეთ, რომ თქვენ წარგადგინათ საინიციატივო ჯგუფმა. რა საინიციატივო ჯგუფი იყო ეს?
– მე, როგორც კანდიდატი, არც ერთი კოალიციის თუ პარტიის წევრი არ ვიყავი. შეიძლება ითქვას, ვიყავი ნეიტრალური პიროვნება. დღევანდელი ხელისუფლების და “ქართული ოცნების” მხარდაჭერა მქონდა იქედან, რომ ეს ადამიანები ჩემი საქმიანობიდან გამომდინარე მიცნობდნენ, ჩემი აზრი იცოდა ამ საინიციატივო ჯგუფმა. ეს ჯგუფი იყო რაიონის საკრებულოს საინიციატივო ჯგუფი, რომელიც კანდიდატებს ირჩევდა. მიცნობს ქალაქი, ადამიანები და წარმოდგენილი კანდიდატურებიდან ყველაზე უკეთესი ვარიანტი აარჩიეს.
– ჩვენ აბაშაში, აბაშელები გამოვკითხეთ და ვკითხეთ, იცნობდნენ თუ არა ახალ გამგებელს. უმრავლესობის პასუხი იყო _ არა. რამდენი წელია აბაშაში არ ყოფილხართ?
– ჩემი რაიონის მაჯისცემა არასოდეს არ დამიკარგავს. ვმუშაობდი თბილისში, მაგრამ თვეში ორ-სამჯერ ჩამოვდიოდი აქ და გარკვეული ურთიერთობები გარკვეულ ადამიანებთან მაკავშირებდა და მქონდა. მე ვარ ძირძველი აბაშელი, აქ მაქვს საშუალო სკოლა დამთავრებული, გარკვეული პერიოდი ვმუშაობდი რაიონში, მქონდა და მაქვს ურთიერთობა საზოგადოებასთან და არანაირი პრობლემა არ მქონია არც საკრებულოსთან და არც იმ საინიციატივო ჯგუფთან, რომელმაც არჩევანი გააკეთა. ფართო მასისთვის უცხო არ ვარ _ შეიძლება, უცებ სახელით და გვარით ვერ გამიხსენონ, მით უმეტეს, სოფლებში, მაგრამ ქალაქის მცხოვრებლებისთვის უცხო არ ვარ. აი, ის ადამიანები კი, რომლებიც აქციის მონაწილეებს უდგანან გვერდით, მართლაც უცხონი არიან რაიონისთვის. ეს ქალბატონები, არ მინდა არც მათ და არც მათ კანდიდატს შეურაცხყოფა მივაყენო, მაგრამ არიან კომუნისტები, კომუნისტური იდეოლოგიით და მეთოდებით მებრძოლები, ბევრი კორუმპირებული და რაიონის აზრს არ ითვალისწინებენ _ მათ ამოძრავებთ მხოლოდ პირადი ამბიციები. ძალიან ვწუხვარ ამაზე და იგივე მეთოდებით არ ვებრძვით, რადგან ვიცით, რომ ადრე თუ გვიან ეს პროცესი დამთავრდება და ადგილსაც ვტოვებთ მათთან ურთიერთობისთვის, თუ ისინი გონს მოეგებიან.
– ჩვენ ვაშუქებდით როგორც აბაშელების, ასევე ლანჩხუთელების, მარტვილელების აქციებს. ამ თემაზე კომენტარი ვთხოვეთ სხვადასხვა კომპეტენტურ ადამიანებს, კანცელარიის საზოგადოებასთან ურთიერთობის დეპარტამენტის უფროსს, ბატონ რუსეცკის, ასევე “ქართული ოცნების” პრესსამსახურისა და საზოგადოებასთან ურთიერთობის სამსახურის უფროსებს, იმ პერიოდში კომენტარი გააკეთეს დავით საგანელიძემ და მანანა კობახიძემ. ყველა მათგანმა თქვა, რომ არც ერთი რაიონის გამგებლის არჩევაში ახალი მთავრობა და “ქართული ოცნება” არ ჩარეულა და ეს ყველაფერი ადგილობრივი თვითმმართველობის გადაწყვეტილებით მოხდა. რატომ ამბობთ ან თქვენ, ან ირაკლი რუხაძე, ან სხვა კანდიდატები, რომ სწორედ თქვენ იყავით კოალიციის მხარდაჭერილი კანდიდატი?
– მე არ მინდა პოლიტიკური განცხადებები გავაკეთო. ეს თავიანთი შეხედულებაა, ვისთან როგორ განცხადებას გააკეთებენ და როგორ განავრცობენ, მაგრამ ერთი რამ მინდა გითხრათ _ დღესდღეობით არ ხდება ისე, რომ თუ დღევანდელი ხელისუფლების მხარდაჭერა არ აქვს ადამიანს, ის დაინიშნოს გამგებლად. ჩვენ ვამბობთ ზოგადად და არ ვკონკრეტდებით, თუ ვისგანაა მხარდაჭერა, რომ ზედმეტი კითხვებს და გაუგებრობას არ ჰქონდეს ადგილი. მაგრამ დამერწმუნეთ იმაში, რომ დღევანდელი გამგებელიც, საკრებულოც არის ახალი მთავრობის კურსის გამტარებელი და მზად არის ემსახუროს დღევანდელ ხელისუფლებას, იმ იდეებს და მხარდამჭერებს, რასაც ჩვენ ველოდებით ახალი ხელისუფლებისგან. ყველაფერი გარკვეულია და სხვა დანარჩენი, რაც დღეს რაიონში ხდება, პროვოცირებულია.
