ჩვენი დღევანდელი ნომრის სტუმარია საქართველოს თეატრის, მუსიკისა და ქორეოგრაფიის სახელმწიფო მუზეუმის ფოტოარქივის თანამშრომელი რუსუდან სიხარულიძე.
_ ქალბატონო რუსუდან, მუზეუმში საკმაოდ მნიშვნელოვანი სამუშაოები მიმდინარეობს, როგორც ფუნდამენტური რემონტისა, ასევე მრავალფეროვანი ღონისძიებების კუთხით.
_ დიახ, წლევანდელი წელი საკმაოდ დატვირთულია _ გრანდიოზული სარემონტო სამუშაოები მიმდინარეობს, რაც პირველ რიგში, ჩვენი ხელმძღვანელის გიორგი კალანდიას დამსახურებაა. რაც შეეხება ღონისძიებებს, მოვაწყვეთ აკაკი წერეთლის ნაწარმოებების სხვადასხვა თეატრებში დადგმული სპექტაკლების დეკორაციებისა და კოსტუმების ესკიზების ჩვენება; საქვეყნოდ ცნობილი მოცეკვავის ნინო რამიშვილის ეროვნული ცეკვის კოსტუმებისა და პირადი ნივთების გამოფენა; საინტერესო გამოფენა მოვაწყვეთ ქართული კინოს ვარსკვლავის ნატო ვაჩნაძის საიუბილეოდ, სადაც აქამდე უცნობი მასალები წარმოვადგინეთ; მნიშვნელოვანი გახლდათ სამეგრელო-აფხაზეთის სამთავროს უკანასკნელი დედოფლის ნინო დადიანის პორტრეტის დაბრუნება, რომლის პრეზენტაცია კულტურის სამინისტროში მოეწყო და მრავალი სხვა.
_ თქვენ მნიშვნელოვანი ურთიერთობები გაქვთ საზღვარგარეთის ქვეყნებთან.
_ შემოქმედებითი ურთიერთობები დავამყარეთ კალიფორნიაში არსებულ ჰოლივუდის აკადემიის მარგარეტ ჰეროკის ბიბლიოთეკასთან, რომელიც მსოფლიო კინოინდუსტრიის ყველაზე დიდ საცავს წარმოადგენს. საფრანგეთში ქართული კულტურის დღეებთან დაკავშირებით მოწყობილ გამოფენაზე, მუზეუმის სხვა ექსპონატებთან ერთად წარვადგინეთ გამოჩენილი სცენოგრაფის პეტრე ოცხელის ნამუშევრები. ინტენსიურად მიმდინარეობს უცხოეთის სხვადასხვა ქვეყნებთან შემოქმედებითი კავშირების გაღრმავება.
_ მუზეუმის ფოტოსაცავებში საქართველოს ყველა რეგიონის ფოტომასალები ინახება, მათ შორის არის ჩოხატაურის თეატრალური ცხოვრების ამსახველი ფოტოებიც.
_ ჩვენს ფონდში 1990 წლამდე გვიგზავნიდნენ სპექტაკლების სურათებს ჩოხატაურიდან. მაგრამ შემდეგ, სამწუხაროდ, შეწყდა მოწოდება. ითანამშრომლეთ ჩვენს მუზეუმთან, გამოგვიგზავნეთ სპექტაკლების ამსახველი ფოტომასალა, ფოლკლორული და ქორეოგრაფიული ანსამბლების სურათები, პროგრამები, აფიშები, ღვაწლმოსილი ხელოვანების პირადი არქივები. ჩვენ გეგმაში გვაქვს რეგიონების გამოფენების მოწყობა. ვიმედოვნებ, რომ ჩოხატაურიდან მოწოდებული მასალებით საინტერესო გამოფენას მოვაწყობთ._ ჩვენც იმედი გვაქვს, რომ თანამშრომლობით ბევრ სასიკეთო საქმეს გავაკეთებთ და ჩოხატაურის კულტურული ცხოვრება კიდევ უფრო წარმოჩნდება. ამაში თქვენს თანადგომასაც ვგულისხმობთ _ თქვენ ხომ ძალიან გიყვართ ჩვენი კუთხე.
_ ძალიან მიყვარს გურია. მე ჩოხატაურში დავიბადე, იქ ძალიან ბევრი მეგობარი მყავს, თითქმის ყოველ ზაფხულს ჩავდივარ. გურიის ულამაზეს ბუნებაში ყოფნას არაფერი შეედრება.
