(გურია ნიუსი, ლანჩხუთი) _ გასულ ხუთშაბათს, ქრისტიან-დემოკრატების” ლანჩხუთის ორგანიზაციის ლიდერმა და საკრებულოს ოპოზიციური ფრაქციის თავმჯდომარემ მარიკა თურნავამ პრესკონფერენცია გამართა. პრესკონფერენციის ძირითადი თემა სექტემბრიდან მომატებული პენსიები და მასთან დაკავშირებული საკითხები გახლდათ:
_ ბოლო ერთი წლის განმავლობაში ჩვენი მოძრაობა აქტიურად ითხოვდა, რომ რეგიონებში არსებული პენსია თბილისში არსებულს გათანაბრდებოდა. როგორც ჩანს, ხელისუფლებამ ისმინა ჩვენი ინიციატივა. ეს ყველაფერი მისასალმებელია და კარგია, მაგრამ სექტემბრამდე საკმაოდ დიდი დროა _ დღეს 70 ლარით ნაყიდი მაშინ შეიძლება 100 ლარადაც ვერ ვიყიდოთ. რეალურად პენსია იმატებს მხოლოდ 10%-ით, მაშინ როდესაც ბოლო დღეების განმავლობაში ფასების თითქმის 30%-იანი მატება მოხდა. აღსანიშნავია ის ფაქტიც, რომ პენსიების მატება ყველასთვის არ მოხდება. როგორც ჩვენთვის არის ცნობილი, 100 ლარი მხოლოდ ასაკის პენსიონერებს გაუხდებათ, ხოლო ინვალიდებს და სხვებს იგივე ექნებათ. პრეზიდენტმა ისიც თქვა, რომ სტაჟის და დამსახურებისთვის დამატებით 7 ლარს მიიღებს პენსიონერი. ეს სასაცილო ციფრია და დამსახურებული ადამიანის აბუჩად აგდებაა. გაიძახიან, დაზღვევის პროგრამა ამოქმედდებაო. იქაც ბევრი ხარვეზია. არავინ ფიქრობს ონკოლოგიურ ავადმყოფებზე _ 60 წელს ზემოთ მომსახურება კი არის უფასო, მაგრამ თუ ადამიანი 60 წლის ან უფრო ახალგაზრდაა, რა ქნას, ექიმთან ვერ უნდა მივიდეს?! დღეს სტატისტიკის დეპარტამენტის მიერ მოწოდებული ინფორმაციით ქვეყანაში საარსებო მინიმუმი 250 ლარია. ჩვენ მოვითხოვთ, რომ პენსია საარსებო მინიმუმს გაუტოლდეს და 250 ლარი გახდეს. ხელისუფლება უნდა ვაიძულოთ.
აქვე უნდა ვთქვა, რომ ხელისუფლება ხშირ შემთხვევაში ისე იქცევა, თითქოს ყველაფერს თავად აკეთებს. არადა, მთელი რიგი ინიციატივები სწორედ ჩვენგან, “ქრისტიან-დემოკრატებისგან” მოდის _ ჩვენ ვამბობდით, რომ უფასო სახელმძღვანელოები დაერიგებინათ სოციალურად შეჭირვებული ბავშვებისთვის, ჩვენ მოვითხოვდით, რომ სოფლების გადარჩენისთვის 40 მილიონი ლარი გამოყოფილიყო. მოგვიანებით ასეც მოხდა და ეს ყველაფერი ხელისუფლებამ მიიწერა. “ქრისტიან-დემოკრატების” ინიცირიბულია, აგრეთვე ძალოვანი უწყების ყოფილი თანამშრომლებისთვის პენსიების გაზრდა. დღეს მათი შრომა ძალიან მიზერულად არის შეფასებული, რაც ბუნებრივია, ცუდია, _ თქვა თურნავამ.
