“ნეპოტიზმი” გახლავთ მეგობრის ან ნათესავის პრივილეგირებულ მდგომარეობაში ჩაყენება. ასეთი არის განმარტება. ზოგჯერ ჟურნალისტები და არამარტო ჟურნალისტები, არასწორად ხმარობენ ამ ტერმინს. სამუშაოზე ადამიანის მიღება პრივილეგირებულ მდგომარეობაში ჩაყენება არ არის. მით უმეტეს, როცა თანამდებობათა დიდ ნაწილზე დღევანდელი კანონმდებლობა კონკურსს არ ითხოვს. ეს ცუდია. როგორც კი იქნება ამისი მოთხოვნა, პირველი მე ვიქნები, რომელიც დაემორჩილება ამ კანონს. რაც შეეხება იმას, რაც გამოქვეყნდა “გურია ნიუსზე,” მე გავეცანი ამ დილით. მინდა გითხრათ, პირველ რიგში “გურია ნიუსის” კორესპონდენტს და სხვა დანარჩენებსაც: მე ყურადღებით გავეცანი. ეს პირველი მასალა არ ყოფილა. მაშინ ყურადღებით არ გავცნობილვარ. ვიფიქრე, რომ არა უჭირს, ადამიანს ეშლება, მაგრამ ეხლა უნდა გითხრათ, რომ ამ მასალაში აჭარის უმაღლესი საბჭოს 6 თანამშრომლის გვარია დასახელებული. ამ ექვსიდან 4 არის ტყული. შესაბამისად, ტყუილებზე რეაგირებას ვერ მოვახდენ.” – განაცხადა ავთანდილ ბერიძემ.
აჭარის საკანონმდებლო ორგანოს ხემძღვანელს ვთხოვეთ განემარტა, რა იყო კონკრეტულად ცრუ ინოფრმაცია მასალაში. “თქვენ მასალაში წერია, რომ გელა ღოღობერიძე არის ალექსანდრე ჩიტიშვილის ცოლის ძმა. მე გარწმუნებთ, რომ გელა ღოღობერიძე ალექსანდრე ჩიტიშვილის ცოლის ძმა არ არის” – ამბობს ბერიძე.
“გურია ნიუსის” მასალაში ეწერა, რომ წყარო ამბობდა გელა ღოღობერიძე ალექსანდრე ჩიტიშვილის ცოლის ძმააო, რასაც თან ახლდა ალექსანდრე ჩიტიშვილის კომენტარი სადაც იგი ამბობდა, რომ ცოლის ძმა არა, მაგრამ ცოლის ნათესავი ნამდვილად იყო.
“თქვენს მასალაში წერია, რომ ანზორ დუმბაძე არის პოლიციის გენერალი. მე თქვენ გარწმუნებთ, რომ იგი პოლკოვნიკია.” – განაგრძობს ბერიძე. თუმცა რა არსებითი მნიშვნელობა აქვს დანიშნულ ადამიანების შესახებ მასალაში სამხედრო სტატუსს, ნამდვილად არ ვიცი.
ჯამბულ კურცხალიძე არ არის მურმან დუმბაძის მამიდაშვილი. იგი იყო ზონის კოოორდინატორი. არჩევნებში ძალიან მაღალი რანგის ადამიანი იყო. ჯამბულ კურცხალიძე მურმანის მამის დის შვილი არ არის. არც ნუგზარ კეკელიძე არის ავთანდილ ბერიძის ქვისლი. თქვენ უბრალოდ გადაამოწმეთ ინფორმაცია. არსებობს ფეისბუქზე ჩემი გვერდი” ამბობს ავთანდილ ბერიძე.
_ ბატონო ავთანდილ, მე აჭარის მთავრობის სახლთან გთხოვეთ კომენტარი გაგეკეთებინათ ამ ფაქტზე და თქვენ უარი განაცხადეთ.
_ ტყუილია კიდევ ერთი გარემოება. არჩილ ხაბაძესთან შეხვედრები ჩვენ ხშირად გვაქვს. უფრო ხშირად, მთავრობის წევრები გვსტუმრობენ აქ. ჩვენ კანონმდებლები ვართ, ისინი შემსრულებლები და ხშირი კონტაქტი გვაქვს. სხვათაშორის, 12-ის ნახევარზე დამთავრდა ღამით შეხვედრა. როდესაც გამოვედით, ჩემთვის არც ერთ ჟურნალისტს არაფერი უკითხავს. გამოვედი მურმანს დავემშვიდობეთ, რადგან თბილისში მიდიოდა. იქ რამდენიმე ნაცნობი იყო, მაგრამ არა ჟურნალისტი.
_ 17 იანვარს, საღამოს 7 საათზე, აჭარის მთავრობის სახლთან შეგხვდით ბატონო ავთანდილ.
_ თქვენ იყავით? მე მითხარით? მატყუარა!
_ ამოვიღოთ ჩანაწერი მთავრობის დაცვის სამსახურიდან?
_ ამოიღეთ. მე გითხარით, რომ დრო არ მაქვს და ვერ დაგელაპარაკებითო?
_ დიახ
_ არ მახსოვს ასეთი. საღამოს შვიდ საათზე მთავრობის სახლში…
_ გასვენებაში მიბრძანდებოდით.
_ აააა კი, გასვენებაში მივდივარ-მეთქი გითხარით. აა კი, თქვენ იყავით? არც დავკვირვებივარ, სიმართლე გითხრათ. თქვენ მითხარით, რა მინდაო?
_ სიით ვიყავი მოსული და გითხარით კომენტარი მინდა-მეთქი, გითხარით.
_ მერე მე რა გითხარი?
_ თქვენ მითხარით, არ მცალიაო. მურმან დუმბაძემ მითხრა, რომ პანაშვიდზე მიდიოდით.
_ მერე, შე დალოცვილო, დაწერე, რომ პანაშვიდზე მიდიოდა ეს ხალხი და ვერ მომცა კომენტარიო. არ გრცხვენია?
_ რისი უნდა მრცხვენოდეს ბატონო ავთანდილ?
_ იმისი, რომ ტყუილებს წერთ.
_ რატო არის ტყუილი? როდესაც გელა ღოღობერიძის ამბავს ადასტურებს ბატონი ალექსანდრე ჩიტიშვილი, ანზორ დუმბაძის შვილის ამბავსაც ადასტურებს.
_ თქვენ უნდა დაურეკოთ და დაუკავშირდეთ. არსებობს პრესსამსახური. (კვირის განმავლობაში პრესსამსახურს არაერთხელ ვთხოვეთ ავთანდილ ბერიძის ჩაწერაში დახმარება, მაგრამ ვერ მოხერხდა. ავტ.) თქვენთვის გავაკეთეთ ეს. ტელეფონით ვერ დამიკავშირდებით შესაძლებელია, იმიტომ, რომ ჩემი ტელეფონი ყოველ წუთში რეკავს. აი, ახლაც ამ წუთშიც ჩემთან მაგიდაზე დევს ორი ტელეფონი. ისინი ალბათ რეკავენ და ვერ მიკავშირდებიან, იმიტომ რომ ბრიფინგზე ვარ. მთავრობაში რომ შევდივარ, ვთიშავ ტელეფონს. ტირილში რო შევდივარ, ვთიშავ ტელეფონს. მაქვს ბოდიში და იმისი ზრდილობა, სხვათაშორის ზოგადი თემაა, მაგრამ მაინც როდესაც მე ადამიანს ვესაუბრები, როგორც წესი, ტელეფონს არ ვპასუხობ. მე რომ თქვენ გელაპარაკებით და ტელეფონს ვუპასუხო ეს არის უზრდელობა თქვენს მიმართ.
_ მობილურზე არაერთხელ დაგიკავშირდით, მაგრამ არ მიპასუხეთ.
_ მე მყავს თანაშემწე, პრესსამსახური. მე ვარ უმაღლესი საბჭოს თავმჯდომარე და ვარ ძალიან დაძაბულ სამუშაო რეჟიმში. როგორც წესი, არა მაქვს დასვენების დღე. გარდა ამისა, მაქვს უამრავი შეხვედრა, მათ შორის არასამუშაო დღეებში. კვირას დღეს, ვცდილობ არ ვიმუშაო, იმიტომ, რომ ვიცავ ღვთის მცნებას – კვირა დასვენების დღეა. ეს კაცი ვარ მე! ამითი ამირჩიეს… ასე მოვეწონე ამომრჩეველს. შეცვლას არ ვაპირებ! ესა ვარ მე! რაცა ვარ, ამნაირი ვარ!” – ამბობს ავთანდილ ბერიძე.
“გურია ნიუსის” მასალაში “აღმოჩენილ” შეცდომაზე აჭარის მთავრობის პრესსამსახურის ხელმძღვანელმა ნათია სირაბიძემ პირად საუბარში განაცხადა, რომ აჭარის ფინანსთა მინისტრი გიორგი თავართქილაძე მთავრობის თავმჯდომარის მეჯვარე არ არის. მისი თქმით, “თუკი ასე გავაგრძელებთ” (ეუბნება მასალის ავტორს), დაურეკავს რედაქტორს და სხვა დროს კომენტარს აღარ გააკეთებს.
როგორც “გურია ნიუსმა” გაარკვია, გიორგი თავართქილაძე არჩილ ხაბაძის მეჯვარე კი არა, არამედ არჩილ ხაბაძე არის გიორგი თავართქილაძის მეჯვარე.
მასალას საკუთარი “ფეისბუქის” გვერდზე გამოეხმაურა ნათია დუმბაძეც. მასალაში ეწერა, რომ წყაროს ცნობით, მურმან დუმბაძე აჭარის ტელევიზიის საინფორმაციოს უფროსად დანიშვნას უპირებს თავის ძმის შვილს ნათია დუმბაძეს. ნათია დუმბაძე სოციალურ ქსელში წერს: “თურმე აჭარის ტელევიზიის საინფორმაციო სამსახურის უფროსად დანიშვნას მიპირებენ,” შემდეგ კი აკეთებს კომენტარს “გურია ნიუსი”, შენი კარგიც, რომ ცრუ ინფორმაციას ავრცელებ”. მოგვაინებით დუმბაძე უფრო ვრცელ სტატუსს აქვეყნებს:
“ჩემი სამსახური ძალიან მომწონს და კარგი ხელფასიც მაქვს. ჩემთვის დიდი პატივია ვიყო ისეთი კარგი ადამიანის ძმისშვილი, როგორიცაა მურმან დუმბაძე მაგრამ, რომ მოვინდომო სადმე სახელმწიფო სტრუქტურაში მუშაობა, იქ ბიძიას სახელი არ დამჭირდება. მე საკმაო განათლება მაქვს მიღებული იმისათვის, რომ საზოგადოების წინაშე წარვსდგე ჩემი მეობით, როგორც ნათია დუმბაძე და არა მურმანის ძმიშვილი.”
“გურია ნიუსის” მასალაში საუბარი იყო წყაროს მიერ მიწოდებულ სიაზე, რომელშიც კონკრეტული ადამიანების დანიშვნის ან შესაძლო დანიშვნის შესახებ იყო საუბარი. ჩვენ მკითხველს შევთავაზეთ ის კომენტარები, რომელიც გაკეთდა და ისიც, თუ ვინ არ გააკეთა კომენტარი “სიის” შესახებ.
