“ოთხი წელია ციხესა და სასამართლოს შორის დავდივარ. “ნაციონალური მოძრაობიდან” მუდმივად შეურაცხყოფილი ვიყავი და უსამართლობის განცდაც გამძაფრებული მქონდა. მაგრამ ვიცოდი, რომ მტერს ვებრძოდი. დღეს კიდევ უფრო შეურაცხყოფილი და შერცხვენილი ვარ, რადგან ვიღაცეები გამოძვრნენ ბუჩქებიდან და ცდილობენ იმ ხალხის ნაშრომი და ნამოღვაწარი გადაფარონ, რომელიც გამუდმებით წნეხის ქვეშ იყო, მაგრამ ღიად მუშაობდა. დღეს ბევრი უღირსი მოკალათდა პარლამენტსა და სამინისტროებში. ხალხი კი, რომელმაც მათი თანამდებობებზე მოყვანა უზრუნველყო, დაივიწყეს.” _ აცხადებს ელგუჯა ჩხაიძე.
საქმე იმაშია, რომ გუშინ გამართულ პრესკონფერეციაზე ლანჩხუთის მუნიციპალიტეტის გამგებლობის კანდიდატის ზაზა ურუშაძის გვერდით, კოალიცია “ქართული ოცნების” წარმომადგენელი ვახტანგ ზენაიშვილიც იმყოფებოდა. ისე ჩანდა, რომ კოალიციასა და გამგებლობის კანდიდატს შორის შეთანხმება მოხდა და ისინი საერთო პოზიციამდე მივიდნენ. ზაზა ურუშაძემ არც ის დამალა, რომ ზენაიშვილს, დანიშვნის შემთხვევაში, პირველ მოადგილეობას შესთავაზებდა.
მაგრამ პრესკონფერენციის შემდეგ, მოვლენები სწრაფად შეიცვალა _ პარტია ,”თავისუფალი დემოკრატების” ადგილობრივი ორგანიზაციის თავმჯდომარემ ელგუჯა ჩხაიძემ განაცხადა, რომ ვახტანგ ზენაიშვილი ურუშაძის პრესკონფერენციას ესწრებოდა არა როგორც პარტიის წარმომადგენელი, არამედ, როგორც კერძო პირი.
მისი საუბრიდან გაირკვა ისიც, რომ კოალიციაში შემავალი ერთადერთი პარტია “თავისუფალი დემოკრატები”, რომელმაც დახურული შეხვედრა გამართა ურუშაძესთან გამგებლობის კანდიდატის რანგში, არაა თანახმა, საკრებულოს დასამტკიცებლად მისი კანდიდატურა შესთავაზოს. თითქოს ყველაფერი გარკვეული იყო. ზაზა ურუშაძე გამგებლად დაინიშნებოდა, ხოლო ბიწაძე და ზენაიშვილი _ მოადგილეებად, მაგრამ პირველი “თავისუფალი დემოკრატის” მოულოდნელმა წინააღმდეგობამ ყველაფერი შეცვალა.
ელგუჯა ჩხაიძე ღიად აფიქსირებს, რომ არ აპირებს ლანჩხუთის მომავალ გამგებლად ზაზა ურუშაძის კანდიდატურას დაუჭიროს მხარი. “თავისუფალ დემოკრატებს” ამ თანამდებობაზე საკუთარი კადრიც ჰყავდათ შერჩეული, რომელსაც მხარს “ქართული ოცნების” ლანჩხუთელი დამფუძნებლებიც უჭერდნენ. “გურია ნიუსი” ამაზე უკვე წერდა. მაგრამ მას შემდეგ, რაც გამგებლის კანდიდატურის შესარჩევად კონკურსი გამოცხადდა და კომისია შეიქმნა, გელა პატეიშვილმა უარი განაცხადა კონკურსში მიეღო მონაწილეობა. უარი კი იმით ახსნა, რომ “კონკურსის შედეგები ყველასთვის წინასწარ იყო ცნობილი.”
ახლა მისი კანდიდატურა კვლავ აქტუალური გახდა. მას მხარდამჭერთა საკმაოდ დიდი არმია ყავს. გელა პატეიშვილი მამათელია, ზაზა ურუშაძის თანასოფლელი. მაგრამ, ეტყობა მათ ერთმანეთთან არც ისე კარგი ურთიერთობა აქვთ.
პატეიშვილი განათლებით ზოოინჟინერია და ამ სფეროში, როგორც ამბობენ, საკმაოდ დიდი გამოცდილებაც აქვს. მისი სახელი არასოდეს ყოფილა დაკავშირებული სკანდალურ და საეჭვო მოვლენებთან. იგი პარტია “თავისუფალი დემოკრატების” წევრია და თუ გავითვალიწინებთ, რომ ალასანიას მიერ დაფუძნებულ პოლიტიკურ ორგანიზაციას საკმაოდ მყარი პოზიციები აქვს როგორც მთავრობაში, ისე პარლამენტში, გამორიცხული სულაც არაა, იგი ლანჩხუთის გამგებლად ვიხილოთ.
