ოზურგეთის დემოკრატიული ჩართულობის ცენტრში გამართულ საგანგებო ბრიფინგზე გოგიბერიძის გაკეთებული განცხადება ამ შინაარსის იყო:
“ბოლოს და ბოლოს, ამ ხალხმა უნდა შეიგნოს, რომ მათ წააგეს არჩევნები. მოგვცენ მუშაობის საშუალება. არაფერს ვამბობთ საკრებულოს დეპუტატებზე, რომლებიც არჩეული არიან და 2014 წლამდე აქვთ უფლებამოსილება, მაგრამ გამგეობის სამსახურებსა და ა(ა)იპ-ებში, ასევე ტერიტორიულ ერთეულებში მოკალათებულები არიან “ნაციონალები“, რომლებმაც საზოგადოებას თავი “ქართული ოცნების” დევნითა და შევიწროვებით დაამახსოვრეს. მოვუწოდებთ და გარკვეულ დროსაც მივცემთ საამისოდ, თუ ნებაყოფლობით არ მიიღებენ შესაბამის გადაწყვეტილებას ამ ეტაპზე, შემდეგ უკვე სხვა ზომებს მივმართავთ” _ განაცხადა მან.
რა სახის “სხვა ზომების” გამოყენებას აპირებენ კოალიციის ის მხარდამჭერები, რომლებიც დღეს ჩართულობის ცენტრში იყვნენ მისულები, ამის გარკვევა შოთა გოგიბერიძესთან უფრო დეტალურად ვცადეთ.
_ განცხადებაში ნამდვილად იყო შესაბამისი პათოსი. ჩვენ ვთქვით, რომ გავაკეთებთ წერილობით მიმართვას მაჟორიტარისა და გამგებლის მოვალეობის შემსრულებლის სახელზე, რათა მიიღონ შესაბამისი ზომები საკადრო და ორგანიზაციული კუთხით, ხოლო “ნაციონალური მოძრაობის” საარჩევნო შტაბის ხელმძღვანელობას, სამხარეო ადმინისტრაციის მთელს შემადგენლობას და ადგილობრივი სამსახურების ხელმძღვანელობას მოვუწოდებთ ამ ეტაპზე, რომ თვითონ მიიღონ გადაწყვეტილება და გადადგნენ, რადგანაც რაიონი დადგა უკუპროცესების წინაშე, მიმდინარეობს “ქართული ოცნების” წევრების სამსახურებიდან განთესვის პროცესი და ეს რამდენად ტრაგიკულია, კარგად იცით. ამ ეტაპზე მოვუწოდებთ.
_ და “იმ ეტაპზე” რას აპირებთ, თუ თქვენს მოწოდებას არ გაიაზიარებენ და სავარაუდოდ, ასეც მოხდება?
_ არ ვიცი, ამას ალბათ არსებული ვითარება გვაჩვენებს…
_ თქვენი განცხადებები შეთანხმებული იყო თუ არა კოალიციის ლიდერებთან ან თუნდაც იმ პარტიის, რომლის წარმომადგენელიც ხართ?
_ არავისთან შეთანხმება არ ყოფილა, ეს იყო იმ ადამიანთა პოზიცია, რომლებმაც მოიყარეს თავი და ეს იყო “ქართული ოცნების” მხარდამჭერთა დიდი ნაწილი. მათ ცათვალეს, რომ სასურველია რაღაც რეაგირება მოხდეს.
_ ბატონო შოთა, ძირითადად, გათავისუფლებები მოჰყვა გამგეობის სხვადასხვა სამსახურებში ბიუჯეტის შემცირებას, რაც თავისთავად იწვევს კადრების შემცირებასაც. ახალ გამგებელთან თუ განიხილეთ ეს ამბავი?
_ სამწუხაროდ, მისი ნახვა ვერ მოვახერხეთ, რადგან ის დედაქალაქში იყო საქმეებზე წასული. მაგრამ მასაც აუცილებლად მივმართავთ.
_ თქვენი პათოსიდან გამომდინარე, სხვა პოლიტიკური შეხედულებების მქონე ადამიანებს მუშაობის უფლება არ აქვთ, არადა “ნაცმოძრაობის” ამ პოლიტიკას სულ ცოტა ხნის წინ თავად აკრიტიკებდით. თუ იგივეს გააკეთებთ, ფიქრობთ, რომ მოსაწონი იქნება?
_ აქ საკითხი სხვაგვარად დგას, ” ქართული ოცნების” წარმომადგენლებს გვინდა მოგვეცეს საშუალება მივიღოთ მონაწილეობა რეგიონში განვითარებულ პროცესებში და ჩვენ ავიღოთ პასუხისმგებლობა როგორც არჩევნებში გამარჯვებულმა ძალამ. პარალელურ რეჟიმში, უნდა მოხდეს იმ ადამიანების გათავისუფლება სამსახურებიდან, რომლებიც ხმალამოღებულები იბრძოდნენ არჩევნების გასაყალბებლად. ამ ეტაპზე, ამას თხოვნის ფორმა აქვს, _ აცხადებს შოთა გოგობერიძე.
შოთა გოგიბერიძის განცხადებასთან დაკავშირებით, “გურია ნიუსთან” კომენტარს აკეთებს “ნაციონალური მოძრაობის” ოზურგეთის რაიონული ორგანიზაციის თავმჯდომარე მიხეილ გოგოტიშვილი:
“ქართული ოცნების” ადგილობრივი ლიდერებს მოვუწოდებ, რომ მსგავსი განცხადებებისგან თავი შეიკავონ. მათ არ მოუგიათ ადგილობრივი არჩევნები, მათ მოიგეს საპარლამენტო არჩევნები და უმრავლესობით მოვიდნენ პარლამენტში, რის შემდეგაც დააკომპლექტეს მთავრობა. მე, როგორც “ერთიანი ნაციონალური მოძრაობის” ოზურგეთის რაიონული ორგანიზაციის თავმჯდომარე, თითოეული ადამიანის დამცველი ვიქნები, ვისი უფლების დარღვევაც მოხდება. რატომ უნდა დატოვენ თანამდებობა ამ ხალხმა, “ერთიანი ნაციონალური მოძრაობის” მხარდამჭერები რომ არიან? ეს არ არის დემოკრატია._ განაცხადა გოგოტიშვილმა.
ამ ფაქტთან დაკავშირებით “გურია ნიუსთან” საკმაოდ ვრცელი კომენტარი გააკეთა პარლამენტის ვიცე-სპიკერმა მანანა კობახიძემ, რომელსაც მალე შემოგთავაზებთ.
