“მე დიდი გამოცდილება მაქვს და მარტო ჩემი ხმა რომ მქონდეს, მაინც ვიყრი კენჭს!”

რევაზ ჩიტიძის გადადგომისთანავე გავრცელდა ხმა, რომ საკრებულოს ახალი რჩეული ამირან გიგინეიშვილი იქნებოდა. ჟურნალისტებისთვის გამართულ საინფორმაციო ხასიათის შეხვედრაზე ამირან გიგინეიშვილმა დაადასტურა, რომ ლანჩხუთის საკრებულოს ყოფილ უმრავლესობასთან კონსულტაციების გავლის შემდეგ, საერთო გადაწყვეტილებამდე მივიდნენ.

პრესკონფერენციამდე ერთი დღით ადრე, 24 იანვარს, ლანჩხუთის მუნიციპალიტეტის საკრებულოს სხდომათა დარბაზში, საკრებულოს მთლიან შემადგენლობას კოალიცია “ქართული ოცნების” წევრები შეხვდნენ და საკოორდინაცი საბჭოს გადაწყვეტილება გააცნეს. მათი განცხადებით,  საკრებულოს დეპუტატებმა მხარი თავმჯდომარედ დავით წულაძეს, ხოლო გამგებლად ზაზა ურუძაძის კანდიდატურას უნდა დაუჭირონ.

ამირან გიგინეიშვილი, ლანჩხუთის მუნიციპალიტეტის საკრებულოს წევრი: მოვიდნენ კოალიცია “ქართული იცნებიდან” ჩვენთან  და განგვიცხადეს, კოალიციის მიერ გამოგზავნილი ხალხი ვართ და არსებული სიტუაციიდან გამომდინარე, თქვენ უნდა აირჩიოთ საკრებულოს თავმჯდომარედ დავით წულაძე,  გამგებლად ზაზა ურუშაძეო. მე ამაზე ვუპასუხე, რომ როგორც კი თქვენი წაყენებული ულტიმატუმების შემდეგ  რეზო ჩიტიძე გადადგა, მაშინვე განვაცხადე საკრებულოში, რომ თუ რეზო  წავა,  მაშინ მე უნდა ვიყარო კენჭი, იმიტომ, რომ ამ საქმეში მაქვს დიდი გამოცდილება, თვითმმართველობის საკითხებში ევროპის საბჭოს ექსპერტი ვარ და მარტო ჩემი ხმა რომ მქონდეს და მეტი არა, ნებისმიერ შემთხვევაში ვიყრი კენჭს – თქო.

_თქვენი აზრით, დღევანდელი შეხვედრა ერთგვარი ზეწოლა ზეწოლა იყო?

_პირდაპირ ვერ ვიტყვი, თუმცა ხმის ტონი იყო ცუდი. ეს არ იყო მოლაპარაკება, რადგან ნებისმიერი მოლაპარაკება მთავრდება კონსესუსით. გვეუბნებოდნენ, როგორც ჩვენ გვინდა, ისე უნდა გააკეთოთო. მე, ყველა შემთხვევაში, ჩემს კანდიდატურას დავაყენებ.

_ დაუჭერთ თუ არა მხარს გამგებელს?

_ რა თქმა უნდა. საკრებულოს წევრებს არცერთს არ გვყავს გამგებლის კანდიდატურა, საკრებულოში არის ოთხი ფრაქცია და ვართ ორი ადამიანი ვინც უფრაქციოა, შესაბამისად, ჩვენ მზად ვართ, ნებისმიერ კანდიდატურას დავუჭიროთ მხარი და განვიხილოთ, ოღონდ ამაზე თავად კოალიცია უნდა შეთანხმდეს, რომ ამ ადამიანმა შეძლოს მუშაობა, დანარჩენ შემთხვევაში, ჩვენ პრეტენზია არ გვექნება. ნებისმიერი საკრებულოს წევრი თანახმა იქნება კოალიციის შემოთავაზებაზე, თუ ეს იქნება ერთიანი, მაგრამ თუ ისე მოხდება, რომ ამ ადამიანს ერთი ნაწილი კარს აუჭედავს, იმის გამო, რომ მას არ მოსწონს, როგორ უნდა იმუშაოს გამგებელმა ან საკრებულომ?  ერთს ვთხოვთ, რომ შეთანხმდნენ ერთმანეთში.

ლანჩხუთის მუნიციპალიტეტის საკრებულოს წევრი, კოალიცია “ქართული ოცნების” წევრი მაკა კვირკველია “გურია ნიუსთან” აღნიშნავს, რომ შეხვედრა იყო ჩვეულებრივი, დეპუტატებს სააკორდინაციო საბჭოს გადაწყვეტილება გააცნეს. მისი თქმით, “ნაციონალურმა მოძრაობამ”  წააგო არჩევნები და თანამდებობებზე არ უნდა ინიშნებოდეს “ნაციონალი” წევრები, მაშინ რა აზრი ჰქონდა არჩევნებს?” – ამბობს კვირკველია ჩვენთან საუბარში.

დავით წულაძე “გურია ნიუსთან” გუშინ აცხადებდა, რომ  რომ მასაც აქვს პრეტენზია გახდეს საკრებულოს თავმჯდომარე.