მძღოლები მოითხოვენ გაუქმდეს 2010 წელს ჩატარებული ტენდერი და ახალი კონკურენტუნარიანი ტენდერი გამოცხადდეს; მათ მიერ გადასახდელი დღიური გეგმის საფასური განისაზღვროს ფიქსირებული 20 ლარით. დღეს კი მძღოლების განცხადებით დღიური გადასახადი 60 ლარიდან იწყება და ხაზებზე მგზავრთა ნაკადის მიხედვით 130 ლარამდე მერყეობს; მათი მოთხოვნაა ასევე, მგზავრობის საფასური 30-დან 50 თეთრამდე შემცირდეს. სოციალურად დაუცველი მოსახლეობისთვის კი აღდგეს 2013 წლის პირველი იანვრიდან გაუქმებული შეღავათები. სოციალურად დაუცველები იანვრამდე ყვითელი მიკროავტობუსებით მგზავრობისას საფასურის ნახევარს, მხოლოდ 40 თეთრს იხდიდნენ.
მძღოლები აცხადებენ, რომ დღეს ისინი ვალდებულნი არიან ტრანსპორტის დაზიანების შემთხვევაში, მიკროავტობუსი ”თეგეტა მოტორსში” შეაკეთონ. ხარჯებს კი თავად ფარავენ. მძღოლების განცხადებით, ისინი ამ შეზღუდვის გამო მიღებულ მომსახურებაში 30-40 პროცენტით მეტს იხდიან.
“ტენდერი რომ გაუქმდება, ყველა უკანონობას დაესმება წერტილი… რაც შეეხება მგზავრობის ფასის 80 თეთრამდე გაზრდას, თბილისის მერიის ტრანსპორტის საქალაქო სამსახურის უფროსი კაკო ჯოხაძე კატეგორიულად მთხოვდა, მძღოლებთან მიხვალ და ეტყვი, რომ ტარიფი აწიონო. სწორედ ჯოხაძის მეშვეობით თბილისის მერს, საკუთარ კაბინეტში რამდენიმე მძღოლი შეხვდა. მათ შორის მეც ვიყავი. მგზავრობის საფასურის გაზრდა გიგი უგულავას მითითება იყო,” – აცხადებს 85 ნომერი სამარშრუტო ხაზის დისპეჩერი ოთარ ციგლაშვილი.
მძღოლების გაფიცვას თბილისის მერიაც გამოეხმაურა და განცხადება გაავრცელა:
“თბილისის მერიის მთავარ ამოცანას თბილისელების უსაფრთხო, კომფორტული გადაადგილება და მგზავრობის ხელმისაწვდომი ტარიფის არსებობა წარმოადგენს. შესაბამისად მიგვაჩნია, რომ სამარშრუტო ტაქსების მოწესრიგება, ავტოპარკის სრული განახლება და მგზავრობის უსაფრთხოების ამაღლება, პირველ რიგში სწორედ თბილისელების ინტერესების გათვალისწინებით ხორციელდება. ამასთანავე, გვინდა ავღნიშნოთ, რომ კომპანია “თბილისის მიკროავტობუსსა” და სამარშრუტო ტაქსების მძღოლებს შორის არსებული ურთიერთობა, კერძო სამართლებრივ საკითხს წარმოადგენს. მოვუწოდებთ ორივე მხარეს, დაიწყონ მოლაპარაკებები და დროულად გადაჭრან კომპანიის შიდა პრობლემები, რათა თბილისელები არ დაზარალდნენ.
დღეს ასევე გაჟღერდა ინიციატივა, რომ გაუქმდეს თბილისის მერიის მიერ 2011 წელს ჩატარებული კონკურსის შედეგები. მიგვაჩნია, რომ აღნიშნული კონკურსი კანონის სრული დაცვით ჩატარდა და ის სამართლიანობის პრინციპზე იყო დაფუძნებული. მისი რევიზიის უფლება მხოლოდ სასამართლოს აქვს და თუ რომელიმე მხარე, მათ შორის ე.წ. “ხაზების ძველი მეპატრონეები” კონკურსის შედეგებს სადაოდ მიიჩნევს, შეუძლია მიმართოს სასამართლოს და საკუთარი პრეტენზა დააფიქსიროს.
კიდევ ერთხელ მოვუწოდებთ მძღოლებსა და კომპანია “თბილისის მიკროავტობუსის” წარმომადგენლებს გამონახონ საერთო ენა, ცივილიზებული გზით გადაწყვიტონ არსებული დავა და პარალელურად ქალაქში სამარშუტო ტაქსებმა ჩვეულ რეჟიმში განაგრძონ მუშაობა, რათა გათვალისწინებული იქნას თბილისელების ინტერესები. _ ნათქვამია განცხადებაში.
