“შარაშენიძეს ომი თუ უნდა, ომს ვაჩვენებ მაგას”

ამ ინფორმაციას ჩვენთან საუბარში ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძეც ადასტურებდა _ მისი თქმით, რწმუნებულების უმრავლესობა შეიცვლება და ახალი რწმუნებულები სამთვიანი საგამოცდო ვადით დაინიშნებიან.

_ ბატონო კოტე, რა კრიტერიუმებით უნდა მოხდეს სოფლის ახალი რწმუნებულების დანიშვნა?

_ სოფლის რწმუნებულები ხალხის აქტივის გადაწყვეტილებით დაინიშნებიან.

_ რა არის სოფლის რწმუნებულების მასობრივი დათხოვის მიზეზი?

_ ეს საკითხი შესწავლის პროცესშია. ყველაფერი გადაწყდება ისე, როგორც მოსახლეობას სურს. ვინც ვერ იმუშავა სოფლის სასიკეთოდ, ის წავა; ვინც ყველაზე ეფექტური და საქმიანი იქნება, ის დაინიშნება, _ გვითხრა შარაშენიძემ, -გვითხრა რამდენიმე დღის წინ კოტე შარაშენიძემ.

25 იანვარს ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძე ოფიციალურად შეუდგა სოფლის რწმუნებულების დაბარებას. გასათავისუფლებელთა სიაში პირველი ოზურგეთის მუნიციპალიტეტის სოფელ ოზურგეთის რწმუნებული გია ჩხაიძე აღმოჩნდა.

გია ჩხაიძე: _ დილით ათის ნახევარზე დამირეკა რაიონის გამგებელმა კოტე შარაშენიძემ და მივედი. წამიკითხა ჩემი თანაშემწეების სახელი და გვარები და მითხრა, აქედან ორი წავა და ერთი დარჩებაო. ამათ მე ყველას დაველაპარაკები და პირადად თქვენ პირველი თებერვლიდან სამსახურში აღარ იქნებითო.

_ რა გითხრათ, რის საფუძველზე გათავისუფლებთო?

_მე ვკითხე რატომ მათავისუფლებ, რის საფუძველზე,-მეთქი და მითხრა, თქვენ ხომ გინდოდათ არჩევნების მოგება, ახლა ჩვენ გამოცდის ვადით ვღებულობთ ახალ რწმუნებულებსო. ვთხოვე, რომ პატიმრის პატრონი ვარ, ბავშვი ჯარში მყავს, მეუღლე ავადმყოფი მყავს და ბანკის ვალები მაქვს უამრავი,-მეთქი. მიპასუხა, ვალები მეც კი მქონდა, მაგრამ ვიშრომე და აქამდე მოვედი, ახლა ნუ შემაცვლევინებ აზრს, თუ გინდა, რომ მომავალში გავითვალისწინო თქვენი დასაქმების საკითხი. იცოდე, მე რომ ვიტყვი სიტყვას, იმას ვასრულებ და კარგად იყავი _ პირველი თებერვლიდან უკვე აღარ იქნები, ეს გადაწყვეტილია, რწმუნებულების უმრავლესობა სამსახურს დატოვებსო.

_ რას აპირებთ?

_ მე არანაირი დანაშაული არ მაქვს, რატომ დავწერ განცხადებას? არავითარ შემთხვევაში არ ვაპირებ განცხადების დაწერას. მე ვარ ჩემი ქვეყნის და სოფლის პატრიოტი კაცი და შარაშენიძემ ნათქვამზე რატომ წავალ სახლში? ომი თუ უნდა, ვაჩვენებ მაგას, ომი როგორ უნდა _ მთელ სოფელს დავაყენებ ფეხზე და არანაირ განცხადებას არ დავწერ! – გვითხრა გია ჩხაიძემ.

აღნიშნულ ფაქტზე კომენტარს აკეთებს ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძე:

_ მსგავსი ფაქტი ნამდვილად იყო. მე შევხვდი სოფლის რწმუნებულს გია ჩხაიძეს და გავაცანი გადაწყვეტილება, რომელიც სოფელმა მიიღო. მე არც ერთ რწმუნებულს ჩემი პირადი ინიციატივით არ ვათავისუფლებ _ გადაწყვეტილებას სოფლის უმრავლესობა იღებს. ეს არ არის პოლიტიკური აქტივი, თუმცა, მე, სრული უფლება მაქვს, როცა უკმაყოფილო ვიქნები რწმუნებულის მუშაობით, გავათავისუფლო ის. ნამდვილად ვარ ამ ადამიანის მუშაობით უკმაყოფილო ამ ორი თვის მანძილზე, თუმცა, ეს არ არის მიზეზი გათავისუფლებისა. კიდევ ერთხელ ვიტყვი _ გადაწყვეტილებას სოფლის მოსახლეობა იღებს, _ თქვა კოტე შარაშენიძემ, თუმცა, არ დააკონკრეტა, რატომ იყო უკმაყოფილო რწმუნებულის მუშაობით.

ჩვენი ინფორმაციით, სოფლის რწმუნებულების გათავისუფლების პროცესი კვლავ გაგრძელდება, თუმცა რა ფორმით მოხდება და აპირებენ თუ არა რწმუნებულები თავისით დაწერონ განცხადებები სამსახურიდან წასვლის შესახებ, ჯერ ჩვენთვის უცნობია.