მალევე გავრცელდა ინფორმაცია იმის შესახებ, რომ ოზურგეთის მუნიციპალიტეტის გამგებლის მოვალეობის შემსრულებლის კოტე შარაშენიძისა და “ქართული ოცნების” წევრის ნესტორ რამიშვილს შორის მომხდარი ინციდენტის შესახებ აღძრული სისხლის სამართლის საქმე დაიხურა. შეგახსენებთ, რომ გავრცელებული ინფორმაციით, კოტე შრაშენიძემ ურთიერთშელაპარაკების ნიადაგზე იარაღის ტარი ჩაარტყა თავში ნესტორ რამიშვილს და თავი გაუტეხა. ამ შეტყობინების საფუძველზე საქმე აღიძრა და მოწმეებიც დაიკითხნენ.
აღნიშნული ფაქტის შესახებ პარტია “ქართული ოცნება -დემოკრატიული საქართველოს ” თავმჯდომარემ მანანა კობახიძემ საზოგადოებრივ მაუწყებელზე განაცხადა, რომ კოტე შარაშენიძის საკითხზე პოლიტსაბჭო იმსჯელებდა. პოლიტსაბჭოს სხდომა გუშინ ჩატარდა.
გუშინვე, 26 იანვარს უნდა ჩატარებულიყო, პარტია “ქართული ოცნება-დემოკრატიული საქართველოს” კონფერენცია, სადაც ოზურგეთის რაიონული ორგანიზაციის თავმჯდომარე უნდა აერჩიათ, რომლის ვინაობაც პრემიერ მინისტრმა წინასწარ დააანონსა ჟურნალისტებთან. მისი ინფორმაციით, ოზურგეთში მისი კურსელი, დავით დარჩია აირჩის პარტიის თავმჯდომარედ, სინამდვილეში კი კრება საერთოდ არ ჩატარებულა.
‘გურია ნიუსი”დაუკავშირდა საქართველოს პარლამენტის ვიცე – სპიკერს, პარტია “ქართული ოცნება-დემოკრატიული საქართველოს თავმჯდომარეს, მანანა კობახიძეს:
_ ქალბატონო მანანა, როგორც ვიცით, პოლიტსაბჭოზე თქვენს მიერ დაანოსებული განცხადების გატანა უნდა მომხდარიყო, ოზურგეთის გამგებლის ამბავს ვგულისხმობთ.
_ არა, ოზურგეთის თემა საერთოდ ვერ განვიხილეთ, არის უამრავი სხვა პრობლემა. ჩვენ ვნახეთ კოტე შარაშენიძე, გავესაუბრეთ, მოვისმინეთ ახსნა-განმარტება, მაგრამ პარტიაში მის მიმართ რაიმე დისციპლინური ზომა არ მიგვიღია, იმიტომ, რომ როგორც ვიცი, სამართალდამცველების მიერ არც საქმე აღძრულა, არც დანაშაული დადგენილა რაიმე, ამიტომ მე არ მაქვს უფლება, ვინმეს უდანაშაულობის პრეზუმფცია დავარღვიო, შესაბამისად, ვერ გადავცდებოდით იმ ზღვარს, რაც თვითონ სამართალდამცავებმა დაადგინეს.
_ ესე იგი საქმე დახურულია?
_ სისხლის სამართლის საქმე არ აღძრულა, მე რამდენადაც ვიცი და რამდენადაც მაქვს ინფორმაცია, დანაშაულის ნიშნების არ არსებობის გამო საქმე დაიხურა და არ წარმოებს, მე როგორც მაქვს ინფორმაცია.
_ საიდან გაქვთ ქალბატონო მანანა ეს ინფორმაცია?
_ მაჟორიტარი დეპუტატისგან მაქვს ეს ინფორმაცია. გამოძიება სისხლის სამართლის წესით არ წარმართულა იმის გამო, რომ სისხლის სამართლის საქმის აღძვრის ფორმალული ნიშნები იქ არ არსებობდა. შესაბამისად, ვერ დავარღვევ შარაშენიძის უდანაშაულობის პრეზუმციას და ვერც სხვა ვინმე.
ჩვენ დავუკავშირდით ოზურგეთის მაჟორიტარი დეპუტატს ზვიად კვაჭანტირაძეს:
_ ბატონო ზვიად, საიდან იცით, რომ კოტე შარაშენიძის საქმე დახურულია?
_ მე ვიცი?
_ დიახ, ქალბატონმა მანანა კობახიძემ გვითხრა რომ საქმე დახურულია და ეს ინფორმაცია აქვს თქვენგან. . .
_ მე ასე არ მითქვამს, მე ვიცი, რომ ჯერ დახურული არ არის, რამდენადაც მე ვიცი, სისხლის სამართლის ელემენტები არ გამოიკვეთა, _ გვითხრა კვაჭანტირაძემ.
„გურია ნიუსი“ ინფორმაციის დასაზუსტებლად შსს გურიის სამხარეო მთავარი სამმართველოს უფროსის მოადგილეს პაპუნა გობეჯიშვილს დაუკავშირდა, რომელიც ხაზგასმით აღნიშნავს, რომ ოზურგეთის მუნიციპალიტეტის გამგებლის მოვალეობის შემსრულებლის კოტე შარაშენიძის ინციდენტთან დაკავშირებით საქმე დახურული არ არის და გამოძიება მიმდინარეობს.
_ბატონო პაპუნა, ჩვენ რამდენადაც გვითხრეს საქმე დაიხურა.
_საქმე არ არის დახურული, არის ძიებაში, ტყუილია ვინც გითხრათ, რის დახურული, საქმის გამოძიება მიმდინარეობს, _ გვითხრა გობეჯიშვილმა.
