აქციის მონაწილეები ამბობენ, რომ გიორგი გვილავა “სახალხო კრების” წარმომადგენელია და ირგვლივ შემოიკრიბა ის ხალხი, რომლებიც წინასაარჩევნო პერიოდში დევნიდნენ “ოცნების” აქტივისტებს. აბაშელები ლაშა სამხარაძეს და ნუგზარ მალაღურიძეს შეხვდნენ. შეხვედრით უკმაყოფილოები პრემიერ-მინისტრთან საუბარს ითხოვენ.
ზურაბ ნინუა: “გიორგი გვილავა არის “სახალხო კრების” წარმომადგენელი. ის არ იყო აბაშაში არჩევნების დროს. როგორც ამბობს, რაიონი დატოვა იმიტომ, რომ არ უნდოდა “ქართულ ოცნებას” გაემარჯვა აბაშაში. ახლა კი პარტიის რაიონულ თავმჯდომარედ ინიშნება და ის ხალხი ჰყავს შემოკრებილი, ვინც ადრე ჩვენ გვავიწროვებდა. რამდენიმე დღის წინ, გვილავამ კოალიციაში შემავალი ეროვნული ფორუმის რაიონული თავმჯდომარე, გოჩა მიმინოშვილი ცემა და აღძრულია სისხლის სამართლის საქმე. ჩვენ არაფრით შევეგუებით მის თავმჯდომარედ დანიშვნას”.
აღნიშნული ფაქტზე, “გურია ნიუსი” დაუკავშირდა შსს აბაშის პოლიციის რაიგანყოფილებას, სადაც გვითხრეს, რომ გოჩა მიმინოშვილმა მართლაც მიმართა პოლიციას, მაგრამ მხოლოდ განცხადების დონეზე და საქმე იქვე შეწყდა: “არანაირი სისხლის სამართლის საქმე არაა აღძრული, ვინაიდან არ იკვეთება სისხლის სამართლის დანაშაული”.
ჩვენ გიორგი გვილავასაც დავუკავშირდით, რომელმაც გვითხრა, რომ დამფუძნებელი კრების დამთავრების შემდეგ ყველა ჩვენს კითხვას ამომწურავ პასუხს გასცემს, იქამდე კი მცირე კომენტარით შემოიფარგლა: “წინასაარჩევნო პერიოდში ლაგოდეხში ვიყავი და ლუკა კურტანიძის მხარდამჭერთა რიგებში ვიდექი, ტერიტორიას რა მნიშვნელობა აქვს _ ლაგოდეხში იგივე გადავიტანეთ, რაც სხვა რაიონებმა და შეიძლება უფრო უარესიც. მე ჩემს თავზე გადავიტანე 7 ნოემბერიც და 26 მაისიც. ასე რომ, ნაციონალებთან არასდროს ვყოფილვარ. ახლა რაც შეეხება იმ ბრალდებას, თითქოს მე გოჩა მიმინოშვილი ვცემე და სისხლის სამართლის საქმეა აღძრული, მიდით და გადაამოწმეთ პოლიციაში, ნახეთ, მისი დაწერილი განცხადება თუა სადმე, რომ მე ვცემე. თუ არ უწერია, მაშინ დასაჭერია სამართალდამცავებისთვის სწორი ინფორმაციის დამალვაში. გპირდებით, დამფუძნებელი კრების დასრულების შემდეგ ყველა კითხვაზე გიპასუხებთ”.
“ქართული ოცნების” აქტივისტები დილიდან იკრიბებიან და კრების გადადებასითხოვენ.
დამფუძნებელი კრება 14 საათისთვის არის დანიშნული, როგორც ამბობენ, მედია მოწვეული არ არის და კომენტარები მხოლოდ კრების დასრულების შემდეგ გაკეთდება.
P.S. როგორც ამ წუთებში გაირკვა, “ქრთული ოცნება – დემოკრატიული საქართველოსთვის” აბაშის რაიონული პარტიის დამფუძნებელი კრება უკვე ჩატარებულა და პარტიის თავმჯდომარედ გიორგი გვილავა აურჩევია იმ 40 დელეგატს, რომლებიც კრებას ესწრებოდნენ. ეს ინფომაცია ტელეფონით თავად გიორგი გვილავამ მოგვაწოდა.
