ასოციაციის ხელმძღვანელობა აცხადებს, რომ კარგად აცნობიერებენ წარმატებამდე რა რთული გზა აქვთ გასავლელი, თუმცა დაბრკოლებების არ ეშინიათ. “საქართველოს კერძო კოლეჯების ასოციაციის” დასაფუძნებლად მზადება ხელმძღვანელობამ ერთი წლის წინ დაიწყო; შესაბამისად, დღეს ზუსტად აქვთ განსაზღვრული ის, რაც უახლოეს მომავალში უნდა განახორციელონ: “ჩვენი მუშაობის საბოლოო პროდუქტი იქნება გამართული პროფესიული განათლების სისტემა. განათლების ბაზარზე კონკურენტული გარემო შეიქმნება. ოლიგოპოლიები, რომელიც არსებობდა – ვიღაცისთვის შესაძლებელი იყო, ვიღაცისთვის _ არა, უნდა მოისპოს. ბაზარზე უნდა იყოს კონკურენცია, რაც დაწევს სწავლის საფასურს და გაზრდის ხარისხს. სტუდენტი იქ მივა, სადაც სწავლა იაფი და ხარისხიანი იქნება. ამაზე დიდი მიზანი რა შეიძლება გვქონდეს?!” _ ამბობს “საქართველოს კერძო კოლეჯების ასოციაციის” პრეზიდენტი კახაბერ ერაძე.
“საქართველოს კერძო კოლეჯების ასოციაციის” დაფუძნებაში ხელმძღვანელობას მნიშვნელოვანი დახმარება გაუწიეს გერმანიის ფედერაციული რესპუბლიკის ეკონომიკური თანამშრომლობის სამინისტროს “სამხრეთ კავკასიაში დამსაქმებელთა გაერთიანების ხელშემწყობი პროექტისა” და “საქართველოს დამსაქმებელთა ასოციაციის ” წარმომადგენლებმა.
“ცნობილია, რომ შრომის ბაზარზე კვალიფიციური კადრების ნაკლებობაა. ეს პრობლემა ბიზნესს მწვავედ აწუხებს. საგანმანათლებლო დაწესებულებებსა და ბიზნესს შორის ხიდი ჩატეხილია. ჩვენი სურვილია, რომ ეს ორი რგოლი ერთმანეთთთან დავაკავშიროთ. გვსურს შევიმუშავოთ ის მექანიზმი, რომლითაც მეწარმეების მოთხოვნა და კოლეჯების მიერ შესრულებული სამუშაოები ერთმანეთთან თანხვედრაში იქნება. დღეს კი საგანმანათლებლო სფერო ისეთ კადრებს ამზადებს, რომელიც ბიზნესისთვის მისაღები ნაკლებად არის,” _ აცხადებს “საქართველოს დამსაქმებეთა ასოციაციის” ვიცე-პრეზიდენტი მიხეილ კორძახია.
პრეზენტაციის შემდეგ “საქართველოს კერძო კოლეჯების ასოციაციის” ხელმძღვანელობამ თანამშრომლობის ორი მემორანდუმი გააფორმა. ერთი _ ჰამბურგის უწყვეტი განათლების ასოციაციასთან, მეორე კი “საქართველოს დამსაქმებელთა ასოციაციასთან”.
“გაოცებას იწვევს, რომ ასოციაციის ხელმძღვანელობამ, დაფუძნებამდე რამდენი მნიშვნელოვანი ღონისძიება განახორციელა… მზად ვარ, ჩვენი ასოციაციის გამოცდილება ქართველ კოლეგებს გავუზიარო. საქართველოში ვიზიტის მიზანიც ეს არის,” _ გვითხრა ჰამბურგის უწყვეტი განათლების ასოციაციის თავმჯდომარემ ჯენს გერტნერმა.
“საქართველოს კერძო კოლეჯების ასოციაცია” ამჟამად 5 კოლეჯს აერთიანებს, თუმცა მასში გაწევრიანების სურვილი უკვე ბევრმა გამოთქვა.
“დარწმუნებული ვარ, ამ ასოციაციის დაფუძნება მხოლოდ ქაღალდზე არ დაფიქსირდება. მჯერა, ასოციაცია საქართველოში პროფესიული სწავლების ხარისხის ამაღლებისთვის და პროფესიული კოლეჯების გაძლიერებისთვის ბევრს გააკეთებს. ეს, საბოლოო ჯამში, სიკეთეს მოუტანს ბიზნესს, დამსაქმებლებს და მთლიანად საქართველოს. გაერთიანება კარგია. ძალა ერთობაშია. ხარვეზი ყოველთვის არის, მაგრამ მარტო მისი გამოსწორება რთულია, ერთად კი ეს ადვილი გასაკეთებელია… რა თქმა უნდა, ვაპირებთ ასოციაციაში გავწევრიანდეთ. დღეს პროფესიულ განათლებას სჭირდება მხარდაჭერა არა მხოლოდ გარედან, არამედ, შიგნიდანაც,” _ ამბობს შიდა ქართლის პროფესიული კოლეჯის ხარისხის მართვის სამსახურის უფროსი მაია თეთრუაშვილი.
