მუხლი1: “საქართველოს მთავრობის სტრუქტურის, უფლებამოსილებისა და საქმიანობის წესის შესახებ”საქართველოს კანონის მე-5 მუხლის “5”ქვეპუნქტის შესაბამისად, დამტკიცდეს სამუშაოს მაძიებელთა აღრიცხვის თანდართული პროგრამა.
მუხლი 2: ამ დადგენილებით გათვალისწინებულ ღონისძიებათა ეფექტიანად განხორციელების მიზნით:
საქართველოს შრომის, ჯანმრთელობისა და სოციალური დაცვის სამინისტრომ ა) უზრუნველყოს სამუშაოს მაძიებელთა აღრიცხვის კითხვარის ფორმის დამტკიცება ინდივიდუალური ადმინისტრაციულ-სამართლებრივი აქტით.
ბ) ამ პროგრამის გახორციელებისთვის საჭირო თანხების მოძიება “საქართველოს 2012 წლის სახელმწიფო ბიუჯეტის შესახებ”საქართელოს კანონით საქართველოს შრომის, ჯანმრთელობისა და სოციალური დაცვის სამინისტროსთვის გამოყოფილ ასიგნებათა ფარგლებში.“_ აღნიშნულია დადგენილებაში, რომელსაც ხელს ყოფილი პრემიერმინისტრი ივანე მერაბიშვილი აწერს.
სწორედ საქართველოს მთავრობის # 234 დადგენილების საფუძველზე, რამდენიმე დღეა, გურიის სამხარეო მთავარ სამმართველოში მოქალაქეების დაკითხვა მიმდინარეობს.
ჩვენს მიერ მოპოვებული ინფორმაციით, ამ დადგენილების შემდეგ, სოციალური მომსახურების სააგენტოს დირექტორის რამაზ სულამანიძის ბრძანების შესაბამისად რაიონებში ხელშეკრულებები გაფორმდა.
სოციალური მომსახურების სააგენტოს გურიის სამსახურის უფროსი ვასილ ხომერიკი “გურია ნიუსთან”აღნიშნავს, რომ მთავრობის დადგენილების შესაბამისად, სოციალური მომსახურების სააგენტოს დირექტორის ბრძანების შემდეგ, ფაქტობრივად, რაიონული განყოფილებები უშუალოდ ბრძანების შესაბამისად, მოცემული სიით უფორმებდა ხელშეკრულებებს, რაც განცხადებებთან ერთდ, თბილისში იგზავნებოდა.
_ ბატონო ვასილ, რა მიზნით ხდებოდა ხელშეკრულებების გაფორმება?
_ არ ვიცი.
_ ვის უფორმებდა სოციალური მომსახურების სააგენტო ხელშეკრულებებს?
_ უბრალოდ მოქალაქეებს.
_ ბატონო ვასილ, როდის მოხდა და რა ვადით ხელშეკრულებების გაფორმება?
_ ერთი თვით გაფორმდა ხელშეკრულებები და ეს ითვალისწინებდა მხოლოდ სექტემბრის თვეს.
_ ანუ წინასაარჩევნოდ…
_ ეს იყო დასაქმების პროგრამა, რომელსაც, ფაქტობრივად, სააგენტო ახორციელებდა. ჯერ ჩვენი სამსახურში არავის მოსვლია შეტყობინება სამართალდამცავი ორგანოებიდან, არ ვიცით რა ხდება, _ გვითხრა ხომერიკმა.
ამჟამად, შსს გურიის სამხარეო მთავარი სამმართველოს სამივე რაიონულ სამმართველოში იმ პირთა დაკითხვები მიმდინარეობს, რომელთაც სოციალური მომსახურების სააგენტომ წინასაარჩევნოდ, დასაქმების მიზნით, ხელშეკრულებები გაუფორმა. როგორც ჩვენთვის გახდა ცნობილი, შსს გურიის სამივე რაიონული სამმართველო პროკურატურის დავალებას ასრულებს, აღნიშნულ საქმეს პროკურატურა სწავლობს.
“გურია ნიუსი” დაუკავშირდა ოზურგეთის რაიონულ პროკურორს კახა კოჩივარს, რომელმაც გვითხრა, რომ გამოძიების ინტერესებიდან გამომდინარე, ვრცელ კომენტარს ვერ გაგვიკეთებდა.
_ კონკრეტულ სისხლის სამართლის საქმეზე მიმდინარეობს გამოძიება. სამივე რაიონულ სამმართველოში მოწმეების დაკითხვა ხორციელდება.
_ ბატონო კახა, შეიძლება თუ არა დადგეს კონკრეტული მაღალჩინოსანი პირების სისხლის სამართლის პასუხისმგებლობის საკითხი?
_ გამოძიების ინტერესებიდან გამომდინარე, კომენტარს ვერ გავაკეთებ. ვნახოთ, რას დაადგენს გამოძიება.
_ როდის დასრულდება გამოძიება?
_არ ვიცი, ვერ გეტყვით, დასაკითხ პირთა რაოდენობა ჯერჯერობით, ბევრია, _ გვითხრა კოჩივარმა.
