რაც შეეხება თავად ნინო გოგუაძეს, მან “გურია ნიუსს” თავი აგრესიით და ბილწსიტყვაობით დაამახსოვრა, _ 2012 წლის 20 დეკემბერს ჩვენს ვებგვერდზე გამოქვეყნდა ინფორმაცია, ეთიკური ნორმების სრული დაცვით. ახალი ამბავი ეხებოდა ავღანეთში სამშვიდობო მისიით წასულ კიდევ ერთ გურულ ჯარისკაცს, რომელიც იქ დაიჭრა. („გურია ნიუსი“, 2011 წელი 20 დეკემბერი, “ავღანეთში კიდევ ერთი ქართველი ჯარისკაცი ნაღმზე აფეთქდა?“).
ინფორმაციაში ჯარისკაცის არც გვარ-სახელი იყო მითითებული და არც საცხოვრებელი ადგილი. ერთ-ერთმა ცენტრალურმა გაზეთმა კი, ორი დღით ადრე, აღმიშნულ თემას ვრცელი წერილი მიუძღვნა და ჯარისკაცის ვინაობიანად, ყველაფერი იყო მითითებული.
აღნიშნული ინფორმაციის “გურია ნიუსში” გამოქვეყნების შემდეგ, ნინო გოგუაძე დაუკავშირდა ჩვენს ჟურნალისტს და უწმაწური სიტყვებით პირდაპირ შეურაცხყოფაზე გადავიდა, “ეს რა გაბედე და როგორ გამოაქვეყნეო.”
_იმ სიტყვების, რასაც გოგუაძე ტელეფონში მეძახდა, არათუ თქმა, არამედ გამეორებაც ქალისგან თუ კაცისგანაც, ერთობ საჩოთიროა. მე მას ტელეფონი გავუთიშე, ისე იყო ეგზალტირებული. თუმცა, კვლავ არაერთხელ დამირეკა,მაინც არ ვუპასუხე. საინტერესოა, საჯარო მოხელედ მოაზრებული გოგუაძე, მომავალში ასე აპირებს ხალხთან და მედიასთან ურთიერთობას? _ ამბობს ჟურნალისტი მარინე ჩიხლაძე.
სატელეფონო ლანძღვის შემდეგ, როცა ჟურნალისტი გოგუაძის განმეორებით ზარს აღარ პასუხობდა, ქალბატონმა ნინომ “საქმის გარჩევა” “გურია ნიუსის” ოზურგეთის ოფისში გააგრძელა. ის რედაქციაში მოვიდა და ავტორთან შეხვედრას აგრესიულად ითხოვდა. ჟურნალისტები მას აგრესიულ ქმედებაში არ აჰყვნენ, მშვიდად უთხრეს, რომ ფაქტის არანაირ დამახინჯებას ადგილი არ ჰქონია და დაცული იყო ეთიკის ნორმები.
ნინო გოგუაძემ ერთი წლის წინანდელ ამბავზე ასეთი კომენტარი გააკეთა: _ მე არ ვთვლი, რომ ის ქალბატონი ჟურნალისტია, რომელიც მსგავს რამეს დაწერს, როდესაც ოჯახში ტრაგედიაა და ოჯახის დედას და მამას უმალავდნენ, რომ შვილს ორივე ფეხი ამპუტირებული აქვს და ჟურნალისტი ამის გამო გაზეთს გამოიყენებს იმისთვის, ეს ამბავი ოჯახში მისულიყო. მე, დავურეკე იმ ქალს და გავეცანი. ერთი წლის წინ იყო ეს. აქ არაფერ შუაშია პოლიტიკა, მან დაწერა ჩემს ბიძაშვილზე და მინდოდა მასთან საუბარი ამ თემასთან დაკავშირებით. რა თქმა უნდა, ემოციური საუბარი შედგა და მან სამჯერ გამითიშა ტელეფონი. ჩემი სათქმელი არ დამასრულებინა. რედაქციაში მოვედი მეორე დღეს და იქ არ იყო მარინა, სხვა იყო და ყველაფერი ავუხსენით. იმ სიტყვებს, რასაც ვეძახოდი, ნებისმიერი ადამიანი დაიძახებდა, ისეთი რამ გააკეთა მაგ ქალბატონმა. არცერთი ჩემი სიტყვის არ მრცხვენია.(?)
როდის დაინიშნება “რესპუბლიკელი” ნინო გოგუაძე ოზურგეთის გამგებლის მოადგილედ, ამ ეტაპზე ცნობილი არ არის. ჩვენთან საუბრისას არ ადასტურებს დანიშვნის ფაქტს, მაგრამ ინფორმაცია იმის შესახებ, რომ მან შეიტანა განცხადება ოზურგეთის მუნიციპალიტეტის გამგეობაში დასაქმებასთან დაკავშირებით, არ უარუყვია.
_ როგორც მოგეხსენებათ, ოზურგეთის მუნიციპალიტეტის გამგებლის მოვალეობის შემსრულებელმა განაცხადა, რომ მოსალოდნელია საკადრო ცვლილებები და მე უკვე შევიტანე განცხადება დასაქმებასთან დაკავშირებით, – გვითხრა ნინო გოგუაძემ.
გავრცელებული ინფორმაციით, თანამდებობებს ძალიან მალე დატოვებენ გამგებლის ორი მოადგილე, ლაშა ღლონტი და ვლადიმერ ქვილორია. ამ ორი ადამიანის გათავისუფლების შესახებ ინფორმაციას, გამგეობის პრესსამსახური არ ადასტურებს და არც აკონკრეტებს. მათგან მხოლოდ ეს ინფორმაცია მივიღეთ:
_ გაცნობებთ, რომ სოფლის მეურნეობის განვითარების სამსახური აღარ იფუნქციონირებს, ვინაიდან სოფლის მეურნეობის სამინისტროს გადაწყვეტილებით, ქვეყნის 54 მუნიციპალიტეტში საინფორმაციო-საკონსულტაციო ცენტრი ამოქმედდება. თითოეულ სამსახურში დარგის 4-5 სპეციალისტი დასაქმდება. საინფორმაციო-საკონსულტაციო სამსახურებში ვაკანტური თანამდებობების დასაკავებლად ჩატარდა ტესტირება, მათ შორის, ჩატარდება ოზურგეთის მუნიციპალიტეტშიც.
როგორც ლაშა ღლონტმა აღნიშნა, იგი, როგორც კონკურსანტი, ისე მიიღებს ტესტირებაში მონაწილეობას.
“გურია ნიუსი” ოზურგეთის მუნიციპალიტეტის გამგებლის მოვალეობის შემსრულებელს, კოტე შარაშენიძეს დაუკავშირდა. მან გვითხრა, რომ ამ საკითხთან დაკავშირებით, კომენტარს ცოტა მოგვიანებით გააკეთებს.
_ ახლა სოფელში ვარ შეხვედრაზე და როგორც კი დავბრუნდები, აუცილებლად გეტყვით ამის შესახებ, _ გვითხრა მან.
