განცხადება ამის შესახებ საქართველოს სოფლის მეურნეობის მინისტრმა დავით კირვალიძემ დღეს გამართულ პრესკონფერენციაზე გააკეთა.
მინისტრის განმარტებით, ქართული პროდუქციისთვის რუსული ბაზრის გახსნის საკითხზე მუშაობა მთვრობის ფორმირების პირველივე დღეებიდან დაიწყო და აქტიურად მიმდინარეობს.
“გადადგმულია კონკრეტული ნაბიჯები და მიღწეულია მნიშვნელოვანი შეთანხმებები, კერძოდ: წარმატებით დასრულდა ქართული დელეგაციის ვიზიტი მოსკოვში, რომელსაც ღვინის ეროვნული სააგენტოს თავმჯდომარე ლევან დავითაშვილი ხელმძღვანელობდა. რუსეთის მთავარ სანიტარულ ექიმთან გენადი ონიშჩენკოსთან შეხვედრაზე მიღწეული იქნა შეთანხმება, რომ უახლოეს დღეებში საქართველოში რუსი სპეციალისტების 3 ჯგუფი გამოემგზავრება. ისინი იმ კომპანიებს შეამოწმებენ, რომლებიც სურვილს გამოთქვამენ დაიწყონ პროდუქციის შეტანა რუსულ ბაზარზე. ყველა მსურველი გაივლის შემოწმებას. ხარისხის სტანდარტის დაკმაყოფილების შემდეგ კი ქართული სასმელები რუსულ ბაზარზე, სავარაუდოდ, გაზაფხულზე შევა. ვფიქრობ, ეს ძალიან დიდი მიღწევა და წინასაარჩევნოდ გაცემული ერთ-ერთი დაპირების სწრაფი შესრულებაა,“– ამბობს საქართველოს სოფლის მეურნეობის მინისტრი.
რუსეთში ქართული ხილ-ბისტნეულის ექსპორტს რაც შეეხება, მინისტრის განცხადებით, ამ საკითხზე მოლაპარაკებები მიმდინარეობს.
“ხილის და ბოსტნეულის ექსპორტზე დიალოგი გრძელდება. ეს რუსეთში სხვა უწყების კომპეტენციაა. მათთან დამატებითი შეხვედრა გაიმართება. ძალიან მალე ეს პროცესიც ლოგიკურ დასასრულამდე მივა, თუმცა ამისთვის ალბათ რუსეთში უახლოეს მომავალში კიდევ ერთი დელეგაციის გაგზავნა დაგვჭირდება. ვფიქრობ, ამ სეზონისთვის, როდესაც აბსოლუტურად სხვა ხარისხის და რაოდენობის მოსავალს ველით, ქართველ მეწარმეს საშუალება ექნება, რომ რუსულ ბაზარზე პროდუქცია შეიტანოს და პარალელურად სხვა არსებული ბაზრების ათვისება გააგრძელოს,“ – განაცხადა სოფლის მეურნეობის მინისტრმა.
