_ ” ეს ახალგაზრდა ჩვენს კლინიკაში სახელმწიფო დაფინანსებით გადიოდა დეტოქსიკაციის კურსს. მკურნალობის დამთავრებამდე დარჩენილი ჰქონდა სულ რაღაც ხუთი დღე. პოლიციელებს ვთხოვე, რომ არ დაეპატიმრებინათ, რადგან ყველაფერი წყალში ჩაგვეყრებოდა. ახალგაზრდა ნარკომომხმარებელია, მისი ოჯახის ფინანსური მდგომარეობა უკიდურესად მძიმეა და მხოლოდ იმიტომ, რომ შვილს 2 ათასი ლარი ვერ გადაუხადეს, ის დღეს პატიმარია”.
ზურაბ სიხარულიძე ჰყვება, რომ კლინიკაში პოლიცია და ადვოკატი გუშინ, საღამოს 5 საათზე გამოცხადნენ და სასამართლოს განჩინება წარადგინეს. როგორც გაირკვა, ახალგაზრდაზე, ადმინისტრაციული ჯარიმის გადაუხდელობის გამო, ძებნა იყო გამოცხადებული.
”საერთოდ, პოლიციელებს კლინიკაში არ ვუშვებთ, რადგან ჩვენთან მკურნალობა ანონიმურია. პაციენტის მშობლები ძალიან დაბნეულები იყვნენ და მათ შემოუშვეს სამართალდამცავები. როდესაც მითხრეს, რომ ჩემს პაციენტს აპატიმრებდნენ, ამაზე მქონდა საშინელი რეაქცია . 20 წელია, ამ დარგში ვარ და ჯერ არ მომხდარა, რომ პაციენტი ბორკილდადებული გაეყვანოთ კლინიკიდან. ეს არის მახინჯი კანონი, რომელიც ავადმყოფ ადამიანებს სისხლის სამართლის პასუხისმგებლობას აკისრებს მხოლოდ და მხოლოდ იმის გამო, რომ ვერ იხდიან ამხელა თანხას“.
ზურაბ სიხარულიძის თქმით, პოლიციელები მცხეთის სამმართველოდან იყვნენ. როდესაც ექიმის წინააღმდეგობას წააწყდნენ, დაპატიმრებით მასაც დაემუქრნენ პოლიციისთვის ხელის შეშლის მოტივით.
”ვერაფრით გავაგებინე პოლიციელებს, რომ სულ 5 დღე გვჭირდებოდა კურსის დასამთავრებლად, რის შემდეგაც ახალგაზრდა თავად გამოცხადდებოდა პოლიციაში, ამაზეც უარი მითხრეს . ვარ სრულიად უსუსური, რა უნდა გავაკეთო, საშინლად შეურაცხყოფილი ვარ, როცა ადამიანი მკურნალობს, როცა აქვს შანსი რომ ნორმალურად იცხოვროს, მხოლოდ იმიტომ, რომ ოჯახმა ვერ გადაიხადა ჯარიმა, ციხეში მიჰყავთ. რა აზრი აქვს ჩემს მუშაობას. რა დახმარებას გაუწევენ მას საპატიმროში?” _ აცხადებს ზურაბ სიხარულიძე “გურია ნიუსთან“ საუბარში.
კობა დავითაშვილის მიერ პარლამენტში ინიცირებულ კანონპროექტს, რომელიც ნარკომომხმარებელს სისხლის სამართლის პასუხისმგებლობისაგან ათავისუფლებს, როგორც ამბობენ, სერიოზული წინააღმდეგობა შეხვდა შინაგან საქმეთა სამინისტროს მხრიდან. მოხმარების აბსოლუტურ დეკრიმინალიზაციას ეწინააღმდეგება ნარკოლოგთა ერთი ნაწილიც.
საზოგადოებრივი გაერთიანება ”ბემონის” წარმომადგენელი თამარ სირბილაძე ნარკომანიასთან დაკავშირებული საკანონმდებლო ცვლილებათა პაკეტის ერთ-ერთი ავტორია. ის თვლის, რომ ნარკომომხმარებელი სისხლის სამართლის წესით არ უნდა ისჯებოდეს, თუმცა ადმინისტრაციული ჯარიმის გაუქმების წინააღმდეგია.
“მიგვაჩნია, რომ ნარკოტიკის მოხმარებისთვის სისხლის სამართლის პოლიტიკა დაუყოვნებლივ უნდა შეიცვალოს, თუმცა, ამავე დროს, ვფიქრობ, რომ ჯარიმის საერთოდ მოხსნა გამართლებული არ არის. ჩვენ ხომ მხოლოდ ნარკოდამოკიდებულებზე არ ვსაუბრობთ, რომლებსაც მკურნალობა სჭირდებათ. არსებობს ისეთი მომხმარებელი, რომელსაც ჯერ დაავადება არ ჩამოჰყალიბებია და მისთვის ეს ჯარიმა გარკვეული პრევენციაა. დღევანდელ სიტუაციაში მთლიანად რეგულაციის მოხსნა ძალიან საშიშია”, _ ამბობს თამარ სირბილაძე “გურია ნიუსთან” საუბარში.
ნარკოტიკის ექიმის დანიშნულების გარეშე მოხმარება 300 ლარით დაჯარიმებას იწვევს, განმეორებით შემთხვევაში ნარკოდამოკიდებული 600 ლარს იხდის, ხოლო პირი, რომელსაც წლის განმავლობაში ორჯერ ან მეტჯერ შეეფარდა ადმინისტრაციული სასჯელი, 3600 ლარით ჯარიმდება. კობა დავითაშვილის კანონპროექტით , გადახდილი ჯარიმით პირს შესაძლებლობა აქვს, გადახდილი ჯარიმით მკურნალობის კურსი სპეციალიზებულ დაწესებულებაში გაიაროს. საქართველოში ნარკომომხმარებელთა უმეტესობა კუსტარულად დამზადებულ იაფფასიან ნივთიერებებს მოიხმარს, შესაბამისად, სოლიდური ჯარიმის გადახდა მათთვის პრობლემაა , რაც ადმინისტრაციული პატიმრობით მთავრდება.
