ადმინისტრაციულ სამართალდარღვევათა კოდექსის 166-ე მუხლის შესაბამისად დაკავებულნი არიან მელორ ვაჩნაძე და მიხეილ მესხი. ისინი წინასწარი დაკავების იზოლატორში იმყოფებიან.
სამართალდამცველებმა დღეს დილით დააკავეს გიორგი მამალაძეც, რომელმაც საპარლამენტო უმცირესობის წევრს, დეპუტატ ჩიორა თაქთაქიშვილს ფიზიკური შეურაცხყოფა მიაყენა. ბრალდებულის მიმართ სისხლის სამართლის საქმე 239-ე მუხლის 1-ლი და მე-2 ნაწილის შესაბამისად მიმდინარეობს.
ხულიგნობის ფაქტთან დაკავშირებით გამოძიება გრძელდება. ამ მოვლენებზე სასაუბროდ “გურია ნიუსი” საპარლამენტო უმრავლესობის წევრს, გიგა ბუკიას დაუკავშირდა.
– დაკავებულია ბიბლიოთეკასთან მიმდინარე აქციის 3 მონაწილე. რა ბედი ელით მათ და ხომ არ გამოიწვევს ეს ხალხის ხელახლა გამოსვლას ქუჩაში მათ მხარდასაჭერად?
– მიუხედავად იმისა, რომ 8 თებერვალს ბიბლიოთეკასთან მიმდინარე აქცია პროვოცირებული იყო გიგი უგულავას და მისი ზონდერების მხრიდან, ფიზიკურ დაპირისპირებას ადგილი მაინც არ უნდა ჰქონოდა. ჩვენ კარგად გვესმის, რომ აქციაზე შეიკრიბნენ ის ადამიანები, რომლებიც 9 წლის განმავლობაში დაჩაგრულები და აბუჩად აგდებულები იყვნენ. მათ აბსოლუტური უფლება ჰქონდათ თავიანთი პროტესტი გამოეთქვათ. არც არაფერი მოხდებოდა, უგულავა რომ არ შეჭრილიყო ხალხის მასაში და არ გამოეწვია ისინი. ქალაქის მერი არჩეულია ხალხის მიერ და მისი მოვალეობა იყო, როგორმე გაენეიტრალებინა სიტუაცია, დაეშოშმინებინა იქ მყოფნი ან სულ გარიდებოდა იქაურობას. მაგრამ ეს პროვოკაცია დაგეგმილი იყო მათ მიერ და სისრულეშიც მოიყვანეს. კიდევ ერთხელ ვამბობ _ ყველაფერში გამოიკვეთა ორი ადამიანის ინტერესები, ერთი – მიხეილ სააკაშვილის და მეორე _ გიგი უგულავასი. არის კადრები, როგორ აყენებს ქალაქის მერი ხალხს სიტყვიერ შეურაცხყოფას. ისინი ყველაფერს იკადრებენ საკუთარი კეთილდღეობისათვის. მათი დევიზია – “თუ ჩვენ არ ვიქნებით, ქვა ქვაზე არ დარჩენილა!” ჩვენი ხელისუფლება იმით განსხვავდება წინა ხელისუფლებისგან, რომ გვაქვს პასუხისმგებლობა, გამოცდილება, ვალდებულება. ფაქტია, რომ აქციის მონაწილეები წამოეგნენ პროვოკაციას და ფიზიკურ შეურაცხყოფაზე გადავიდნენ. მიუხედავად იმისა, რომ ვიცით მათი გულისწყრომა რამ გამოიწვია, ვიცით, რომ ქართველი ხალხის მოთმინება ფიალიდან გადმოვიდა, მაგრამ ჩვენ არავის დავაფარებთ ხელს _ თუ დანაშაული ჩადენილია, პასუხიც უნდა მოეთხოვოთ დამნაშავეებს, მაგრამ აუცილებლად უნდა იქნას გამოძიებული იმ ადამიანების ქმედებებიც, ვინც ხალხი ამ ზომამდე მიიყვანეს. გიგა ბოკერია რომ ამბობს, სამოქალაქო დაპირისპირებისკენ მიჰყავს მთავრობას მდგომარეობაო და “მხედრიონელებს” იხსენებს, დაავიწყდა რომ სწორედ ბოკერია და ძმანნი მათნი იყვნენ ერთ-ერთი მხარდამჭერები ჯაბა იოსელიანის და “მხედრიონის”? სწორედ მათ უნდათ ის წლები გაიმეორონ, მაგრამ ხელისუფლება არ დაუშვებს ამას და ყველას აგებინებს პასუხს კანონის ფარგლებში. არც ისინი დარჩებიან დაუსჯელნი, ვინც პროვოკაცია დაგეგმა და სისრულეშიც მოიყვანა.
– როგორ ფიქრობთ, მართლა უფუნქციოდ იყო პოლიცია? უმცირესობა ამბობს, რომ ირაკლი ღარიბაშვილს არაფერი გაუკეთებია და მისი გადადგომის შესახებაც გაჩნდა მოთხოვნები.
– ყველაფერი კარგად დაგეგმა “ნაციონალურმა მოძრაობამ”. ახლა ასე ამბობენ, მაგრამ როცა უგულავა მომიტინგეებში შეიჭრა, პოლიციას ძალა რომ გამოეყენებინა მოქალაქეების წინააღმდეგ, აგრესია პოლიციაზე გადავიდოდა და ორივე შემთხვევაში ნაცმოძრაობა დარჩებოდა მოგებული. არასოდეს ვყოფილვარ ძალადობის მომხრე და როცა ჩიორა თაქთაქიშვილს ფიზიკურად შეეხნენ, ძალიან არ მომეწონა ეს ფაქტი, მაგრამ თუ კარგად ჩავუკვირდებით და გავაანალიზებთ მოვლენებს, დავინახავთ, რომ უგულავამ გაიმეტა ჩიორას ცხვირი. არც ისაა მართალი, რომ შინაგან საქმეთა მინისტრმა არაფერი გააკეთა _ მე პირადად მაქვს ინფორმაცია, რომ ნამდვილად იყო ორი კორიდორი გაკეთებული, მეორე საკითხია, რომ არ უნდათ ამის დანახვა, მაგრამ სააკაშვილმა თვითონ აღიარა გამოსვლაში – რატომ უნდა შევსულიყავი უკანა კარიდანო. მაშასადამე, მას ჰქონდა საშუალება და არ გამოიყენა, არ ისარგებლა. ღარიბაშვილი მივიდა აქციაზე, პირადად ჩაერია, განმუხტა სიტუაცია. რომელი მინისტრი მოქცეულა ასე ადრე? დაავიწყდათ როგორ არბევდნენ ხალხს მიტინგებზე? მისულა ოდესმე შინაგან საქმეთა მინისტრი ხალხთან? ასე რომ, როგორც არ უნდა მიქცეულიყო პოლიცია, მაინც მოახერხებდნენ მათ დადანაშაულებას.
– მაგრამ უმცირესობა ამბობს, რომ არანაირი ალტერნატიული შესასვლელი არ ყოფილა.
– უარყოფა მათი სტილია. მიზეზს ეძებენ, მაგრამ ფაქტებს სად წაუვლენ? კიდევ ერთხელ ვიმეორებ _ თვითონ სააკაშვილმა თავისი სიტყვებით დაამტკიცა, რომ უკანა შესასვლელიდან შეეძლო შესვლა, მაგრამ არ მოინდომა, არ მეკადრებაო.
– უმრავლესობას მხარი რომ დაეჭირა პრეზიდენტის უფლებამოსილების შეწყვეტისთვის, როგორ განვითარდებოდა მოვლენები?
– ახლა უმცირესობა ყველაფერს კადრულობს, იმაშიც კი გვდებენ ბრალს, რომ პოლიტიკური ნიშნით მიმდინარეობს ზეწოლაო. თურმე, ზეწოლაა ის, რომ ახალაია უნდა დაიკითხოს მისი საქმეების გამო, ზეწოლა ყოფილა ის, რომ ციხის კადრების გავრცელების შემდეგ ჩვენ პასუხი მოვითხოვეთ ამ ჯალათებისგან. თურმე, რაც არ უნდა აკეთონ, მოიპარონ, სახელმწიფო ქონება დაიტაცონ, არავინ არავის პასუხი არ უნდა აგებინოს. თურმე, ყველა ცოდვა და დანაშაული უნდა ჩამოეწეროს ძველ ხელისუფლებას. ჩვენ ყველანი ვამბობდით, რომ საკმაოდ დაძაბულია სიტუაცია. წარმოიდგინეთ დენთი ყრია და ამათ კი ანთებული ასანთი დააგდეს ზედ. საჭირო იყო ის ცვლილებები კონსტიტუციაში, მათი პასუხები კი ან გაურკვეველია, ან თავს არიდებენ და მხოლოდ პროვოკაციებზე მიდიან. რაც შეეხება მოვლენებს, მოდით ასე ვთქვათ _ რა სიტუაციაშიც და სადაც არ უნდა მომხდარიყო სააკაშვილის გამოსვლა, ხალხი თავის სამართლიან და მშვიდობიან პროტესტს ყველგან გამოხატავდა. იქ გამწარებული ადამიანები, მათი ნათესავები და გულშემატკივრები იყვნენ შეკრებილები. მე ისიც კი ვთქვი, რომ თუ თოფი გდია, ის გაისვრის კიდეც და ამიტომ სასწრაფოდ გავიტანოთ ეს თოფი,-მეთქი, მაგრამ რაც მოხდა ყველამ ნახა. ორხელისუფლებიანობის დროს, როცა პრეზიდენტი ოპოზიციაშია, ეს ნიშნავს, რომ ხელისუფლება დენთის კასრზე ზის და ყველამ უნდა ვეცადოთ, რომ ანთებული ასანთი არ დავაგდოთ ახლოს.
– ვანო მერაბიშვილმა განაცხადა, რომ 2013 წლის საპრეზიდენტო არჩევნებზე “ნაციონალური მოძრაობის კანდიდატი ის იქნება. როგორ იმოქმედებს ეს საზოგადოების იმ ნაწილზე, რომელიც ჯერ კიდევ ვერ გამოსულა შიშის სინდრომიდან?
– მჭერმეტყველებით ხალხს ვეღარ დააშინებენ და სწორ გზას ვეღარ ააცდენენ. აი, რა დღეში არიან, ვანოს მეტი ვერავინ იპოვეს საპრეზიდენტო კანდიდატად. ხალხს ყველაფერი ახსოვს, რაც მან ჩაიდინა და არა მგონია, ასე ადვილი დასავიწყებელი იყოს ის საშინელი დღეები. მისი დანაშაული მისი წარსულია, ისევე როგორც მთლიანად “ნაციონალური მოძრაობის”.
– და ბოლოს, ბატონო გიგა, როგორ ფიქრობთ რა შეფასება მოჰყვება 8 თებერვლის აქციას დიპლომატიური კორპუსისგან?
– შეფასებები უკვე გაკეთდა. მაგალითად რიჩარდ ნორლანდმა თქვა, რომ რაც მოხდა, არ იყო დემოკრატია. მერე ვინ ამბობს, რომ ეს დემოკრატია იყო? თუმცა, მედალს ორი მხარე აქვს _ ისიც უნდა გავითვალისწინოთ, რომ იქ შეკრებილები იყვნენ წლების მანძილზე უსაფუძვლოდ დასჯილი და გაწამებული ადამიანები. ეს იყო უგულავას და მისი თანამოზიარეების მიერ კარგად დადგმული და სისრულეში მოყვანილი პროვოკაცია. ახლა სააკაშვილიც და უმცირესობაც ეცდებიან ყველა დანაშაული მოიხსნან და თავი მსხვერპლად გამოიყვანონ, მაგრამ ჩვენ ყველაფერს გავაკეთებთ იმისთვის, რომ მხოლოდ სწორი ინფორმაცია მიეწოდოს მსოფლიოს.
