თუმცა, წელს რიონი უკვე რამდენჯერმე ადიდდა, ჯებირი გაარღვია და მიმდებარე ტერიტორია დატბორა. მალე წვიმები დაიწყება. სოფელი შიშობს, რომ, სულ რაღაც, 2-3 თვეში მდინარე კიდევ უფრო ადიდდება და მათ სახლებსა და ეზოებს დატბორავს. სოფელი დახმარებას ითხოვს. სოფლის მოსახლეობის თქმით, გაზაფხულამდე 150-მეტრიანი ჯებირის გაკეთება აუცილებელია, რათა მდინარე სოფელში არ შეიჭრას.
ზურაბ გრიგოლია (კეთილარის მკვიდრი)–ეს პრობლემა პირველ რიგში გადასაჭრელ პრობლემათა სიაში უნდა იყოს შეტანილი. დამბა მიაქვს რიონს და წყალი სოფელში ვარდება. რიონი ისეთი მდინარეა, სადაც ნახავს სუსტ ადგილს, იქ არღვევს და ახლა უკვე რამდენიმე ადგილზე გაარღვია. თუ დროზე არ მიეხედა, არც გზა გვექნება, არც ელექტროენერგია და სოფლის ზარალიც დიდი იქნება. აუცილებელია გაგრძელდეს ნაპირსამაგრი სამუშაოები, თუნდაც ერთი კილომეტრით, რომ მდინარე სოფელს აცდეს, თორემ მალე წვიმები დაიწყება და მდინარე უმართავი გახდება. ეს ძალიან დიდ ხარჯებთანაა დაკავშირებული, სოფელი საკუთარი სახსრებით ვერ შეძლებს და ვითხოვთ დახმარებას ხელისუფლებისგან.
როინ ქობულია (კეთილარის გამგებელი) – ამ წლის გაზაფხულზე რიონი ადიდებას რომ დაიწყებს, როგორც ყოველთვის სოფელს დიდი პრობლემები შეექმნება. აუცილებელია გაგრძელდეს ეს ჯებირი კიდევ თუნდაც 150 მეტრით, რომ სოფელი არ დაზიანდეს და მოსახლეობას საფრთხე არ დაემუქროს. ადრე გარემოს დაცვის სამინისტროს ეგიდით ჩატარდა ეს სამუშაოები. ახლაც ვითხოვთ დახმარებას, თორემ ზარალი სერიოზული იქნება.
სოფლის მოსახლეობა ამბობს, რომ წინა მთავრობა არაერთხელ დაპირდა დახმარებას, მაგრამ დღემდე შედეგი არ ჩანს. შარშან აზომვითი სამუშაოები ჩატარდა და 500 მეტრი ჯებირის გაკეთება იყო გეგმაში, მაგრამ გაკეთდა მხოლოდ ის ადგილი, სადაც მთავარი ელექტროგადამცემი ბოძებია, რომ სოფელი უშუქოდ მაინც არ დარჩენილიყო. ხალხი იმასაც ამბობს, რომ ადგილობრივმა მთავრობამ ძალიან კარგად იცის ეს პრობლემა, წინა გამგებელი დაპირდა კიდეც დახმარებას, მაგრამ წავიდა და ეს დაპირებაც თან გაიყოლაო. ახალი გამგებელი კი ჯერ არც უნახავთ. გამგებლები კი იცვლებიან, მაგრამ ჩვენი პრობლემა უცვლელი რჩევა–ამბობს მოსახლეობა. კეთილარელების თქმით, მათი სოფელი მოწყვეტილია რაიონულ ცენტრს და სხვა პრობლემიც აქვთ, მაგრამ ნაპირსამაგრი სამუშაოების დაწყება ამ ეტაპზე უმნიშვნელოვანესია.
“გურია ნიუსთან” საუბრისას აბაშის მუნიციპალიტეტის გამგებლის მოადგილე ვახტანგ გაბელაია აცხადებს, რომ პრობლემა მართლაც სწრაფ რეაგირებას ითხოვს, თუმცა ადგილობრივ ბიუჯეტში ასეთი თანხა არ არსებობს. მისი თქმით, მთავრობის წინაშე იგი საკითხის დროულად დაყენებას გეგმავს, რომ აღნიშნული პრობლემის გადასაწყვეტად ტრანსფერი გამოიყოს.
