18 თებერვალს, ოზურგეთის ფოლკლორის ცენტრში, საქართველოს პარლამენტის წევრები „ქართული ოცნება-დემოკრატიული საქართველოს“ წარმომადგენლები: ირაკლი კობახიძე, ნინო წილოსანი, მაია მენაღარიშვილი, რიმა ბერაძე და სხვები იმყოფებოდნენ.
მათ საქართველოში ქალთა ორგანიზაციის შექმნის შესახებ დააანონსეს, რომელიც ერთ თვეში მოხდება. გაიმართება კონფერენცია, შემდეგ კი შეიქმნება რეგიონული ორგანიზაციები.
შეხვედრას ესწრებოდნენ რეგიონის მუნიციპალიტეტების საკრებულოების წევრი და მერიებში მომუშავე „ქართული ოცნების“ წარმომადგენელი ქალბატონები.
ირაკლი კობახიძემ, ვიდრე საუბარს დაიწყებდა, ქალთა ორგანიზაციის შექმნის შესaხებ, ბიძინა ივანიშვილს დაბადების დღე მიულოცა.
_ დღეს ბიძინა ივანიშვილის დაბადების დღეა. მინდა მივულოცო. მან შეძლო გამარჯვება თავისი სიმართლითა და სიყვარულით , რომლითაც ის დღემდე ემსახურება საქართველოს, – თქვა მან. დარბაზში მყოფებმა ტაში დაუკრეს.
ირაკლი კობახიძემ ისაუბრა საქართველოში ქალთა ორგანიზაციის შექმნის თაობაზე და თქვა, რომ მისი დაფუძნება 2016 წლიდან განიხილებოდა. თუმცა, პროცესები შეფერხდა იმის გამო, რომ ხშირად იმართებოდა არჩევნები, რომელთა შორის, მისივე თქმით, განსაკუთრებით მნიშვნელოვანი იყო ადგილობრივ თვითმმართველობის არჩევნების მოგება.
_ ახლა კი მუნიციპალიტეტებს ჰყავთ არაჩვეულებრივი მერები და გვაქვს სამწლიანი დრო, საქმეს შევუდგეთ, _ თქვა მან.
ირაკლი კობახიძემ განაცხადა, რომ ქალთა ორგანიზაცია იქმნება პარტიული მიზნით.
_ ჩვენ გვინდა ამ ორგანიზაციის შექმნა იმიტომ, რომ კიდევ უფრო გააქტიურდეს ქალთა როლი პოლიტიკურ ცხოვრებაში, პარტიულ პროცესებში და ზოგადად, საზოგადოებრივ ცხოვრებაში, _ განაცხადა მან.
ქალთა ორგანიზაციის შექმნის მიზნებსა და როლზე საუბრისას, კიდევ უფრო ღია მინიშნებით გამოვიდნენ შეხვედრაზე მყოფი პარლამენტარი თუ „ქართული ოცნების“ მხარდამჭერი ქალბატონები. მათ პირდაპირ განაცხადეს, რომ ქალთა ორგანიზაცია „ქართული ოცნების“ მხარდამჭერ ქალბატონების გაძლიერებისა და მათი პროცესებში ჩაბმისთვის გასააქტიურებლად იბრძოლებს. ხაზი გაუსვეს გურული ქალის ბრძოლის ჟინს, რაც განსაკუთრებით უნდა იქნეს ამოქმედებული 2024 წლის არჩევნების მოსაგებად.
_ ოზურგეთში ადგილობრივი თვითმმართველობის არჩევნებზე ვიყავი ჩამოსული და ინგა დუმბაძესთან ვცხოვრობდი იმ დღეებში. გურიაში ნებისმიერი ქალი არის პოლიტიკოსი… ბევრი გამოწვევა გვაქვს წინ. ახლა მესამე მოწვევაა და შეიძლება იფიქროთ, რა დროს მეოთხე მოწვევის პარლამენტზე ფიქრია, თუმცა ვფიქრობთ, რომ საჭიროა, ვიფიქროთ სწორედ ამაზე,_ თქვა პარლამენტარმა მაია მენაღარიშვილმა თავისი ვრცელი გამოსვლისას. მან გურული ქალის ბრძოლის ჟინის თვისებას განსაკუთრებით გაუსვა ხაზი.
„გურია ნიუსი“ ესაუბრა და კითხვები დაუსვა პარლამენტარებს _ ირაკლი კობახიძეს და ნინო წილოსანს. კითხვები, ძირითადად, შეეხებოდა ფასების კატასტროფულ ზრდას და გურული ქალების, გურული დედების დუხჭირ ეკონომიკურ ყოფას, რომლებიც შვილების წესიერად გამოკვებას ვერ ახერხებენ.
სტატიებს მალე შემოგთავაზებთ.
